DABE 26 - Biblía Axweesantá Hhohho' ar Mungú 2004

Ilahhooár bu'uungw ar ta hanmiisi

¹ «Alaá bara hardaté' baraá yaamuudá' AAKOÓ MUNGÚ, Munguúhúng ni kuungá' i haniisi as kiwa ala', nee tari baraadá' wa hotá',

² bu'úngw geera oo ta baraá yaamuudá' wa bu'uun, kudá' AAKOÓ MUNGÚ, Munguúhúng naa kuungá' i haniís, bu'ungwdá' un húp ar lakwaanti ay didá' AAKOÓ MUNGÚ, Munguúhúng aa tsawaár tawa didá' umuuwós kuwa ateetin.

³ Kuúng ta dír kaahamusmoó Mungú keér, oo gadiyuús qoomaadae, ku beer, ‹Laarí afkueene an dír geeraá AAKOÓ MUNGÚ, Munguúeé' wa oó', adór aníng nira dáh baraá yaamuudá' AAKOÓ MUNGÚ aa lo'ór wa /aáy dír baabi'iirén ngiwa haniisi.›

⁴ «Nee kaahamusmoó Mungú qoomaarihe lakwaanti gari gawaá dabaawós wa taataahh gari qaas gawaá kitangwduú ilahhooa oo AAKOÓ MUNGÚ, Munguúwók.

⁵ /Aymi'iiká' kiri dír geeraá AAKOÓ MUNGÚ, Munguúwók wa ó', ‹Baabuúeé' a heé Aramu, kudá' aa tonganuumamiis amorqá' nee tiqae, aluuwo iri tláy ay yaamaá Misri, iri amoodá' wa hoót adór dahaaymo. Inós nee múk do'ose, qoomaadae a múk ló'wa niiná, aluuwo inooín niri tlahhiyé' tari xoorór yaariir, nee ar /uuruú koom.

⁶ Xoorór Misri tiri i xarásl, tiri slahh'eemiís, tiri /uurutimisiyé' baraá gadiyér gawit adór lawaale.

⁷ Aluuwo atén AAKOÓ MUNGÚ, Munguú baabi'iirén una i /aa/aán nee AAKOÓ MUNGÚ /aa/eerén giri axaás, nee slahh'amuudá' taa slawaán guri ár, nee gadiyeédaá gawdene, nee baramaanirene.

⁸ Naagáy AAKOÓ MUNGÚ, atén tiri duúx baraá yaamaá Misrír wa ale ar /uuruuwós, nee ar dakós kudá' aa tleés, nee ar dae tlaqa, nee ar aleesleemu, nee layu nee muruú waa/oo/amo.

⁹ Tiri huúw baraá yaamuukaá diihhooár ilwa nee dane.

¹⁰ Ala hám daxta AAKOÓ MUNGÚ nguna bu'úngw geeraá i huúw oo naa sláw baraá yaamuudá' naa aténí haniís wa ale.› «Naagáy lakwaanti kari yaamií qás dír geeraá AAKOÓ MUNGÚ, Munguúwók nee ta tumbararaa'át dirós.

¹¹ Kuúng nee múk do'oge hhooeemaadá' sleémeero AAKOÓ MUNGÚ, Munguúwók nuy tleéhh, saqwalalaa/aak dinkwa nee tlahhoó Laáwi nee hoomoó ayaahúng hoota.

¹² «Umuúqo kurkú tame, umuúqo heewo dirhunge baraá bu'ungós sleémeerowo, ar wák baraá mibaango gan haniis as tlahhoó Laáwi, nee hoomoó ayaahúng hoót, nee na/aá panaay nee /ameenár kwaeeli, as inooín muruú /ayma, nee umuúqo gár taqo slai kawa slay, qoomár barta baraá yaamuuhúng i dirii'.

¹³ Naagáy aluuwo tari geeraá AAKOÓ MUNGÚ, Munguúwók wa ó', ‹Boohharí hhoohhoo' ngina amór dooeé' wa huúw, ngiri haniís dír tlahhoó Laáwi, nee dír hoomár ayaarén hoot, nee na/aá panaay nee /ameenár kwaeeli, adoodá' kuúng aníng ira hara'ayiín. Aníng hara'ayarók aga si'iiká laqaá aga gunqareesiiká.

¹⁴ Aníng bu'ungwduú ar gár wák baraá muruú mibaango ugwa /ayiiká qoomár niwa tsuunqumiis, nee sleeme ugwa tsee/ií duxiiká tam qoomaadá' tiwa meetagaás, nee bu'ungwduú gár wák baraá muruú mibaango sleeme ugwa hanisiiká dír gi'i. Aníng kuúng ugwa ilaiwawaá/, aá AAKOÓ MUNGÚ, Munguúeé', aníng umuúqo gár iwa hara'ayiindí daanduú bu'ungwduú gár wák baraá muruú mibaango aga iialooeés.

¹⁵ Gimáy daxta baray qaytsitang, iimír didár hotaawók tidá' hhoohhoo' gawaá dooriwo, mukók oo Israeli tsuuqeek, nee yaamuuká' naa atén hanís adoodá' kara ó' dír baabi'iirén, yaamaá diihhooár ilwa nee dane.›

Múk AAKOÓ MUNGÚ

¹⁶ «Laarír kilá' AAKOÓ MUNGÚ, Munguúhúng nun hara'ayiyín, kaahirós nee dabeero kawa ota'. Gawaá adoorihe harmagahhaak ar ilakaahara ar munerhúng sleémeero nee qeeremoohúng sleémeero.

¹⁷ Laarír kilá' aferhunge aga katé' adór AAKOÓ MUNGÚ tar Munguúhúng, nee adór loohirós kuungá' kar eehadá' nee kaahirós kawa ota' nee hara'ayarose nee dabeerose, nee inós kuwa iialooesá'.

¹⁸ Nee AAKOÓ MUNGÚ laarí ooaro gaa gwa/atís adór kuungá' tar mukós oo kilá' adoodá' ngira oó', nee kuungá' gár tunduwa hariím a hara'ayaarós sleémeero an otá'.

¹⁹ Kuungá' nu xoorór ur tleehh ta xoorduukaá hatlá' sleémeero aa tlehhahhiít ba/a, as kuungá' inós kuwa xirfayeemisa', nee kuwa aleekala/a', nee kuwa ilaiwawaa/a'. Kuungá' tari mukós oo hhohhó' adoodá' AAKOÓ MUNGÚ, Munguúhúng ngira al'axweés.»