DABE 25 - Biblía Axweesantá Hhohho' ar Mungú 2004

¹ «Barnaxes múk tsár taa áy tari kwasleemár áy, har'ohuuse qaa/ay'ín ngu tsat, heé gan'amuú koóm gana'amuwós ngu slay, nee kuduú dakuúsár koóm ku sakwasleemuuti.

² Barnaxes heedá' aa dakuus gár kuwa hariím a muxta, har'ohusmo ngu yaamií qaatisi, nee ku muxi ar qawaay dír geeraá har'ohusmoó wa ale. Muxta ka faari ar adoodá' dakuúsarós i diri'.

³ Heé dakuúsár koóm ku muxi qawaay ay mibeeri tsiyáhh, ala miwa tláhh. Bar aga tlahhasé', hhiyaahúng ugwa mureekesé'.

⁴ «Awuú balángw adaráh as nguwa pur/umiisi mu afaá tseegaar.

Hara'aya daanduú kwaalo'ór hhiya' kawa aali

⁵ «Barnaxes hha ta dír wák hoot, nee dir'ine oo wák iri gwaá', na/oó garma gu konká, hareedá' hhawaatuuwós aa gwaa' makawa duúx nee heé hatlá' oo tlahhaywoseeká. Hareedá' aqo kan duux nee hhiyoó heedaádá' aa gwaa', asma a hariímarós.

⁶ Garmoó baris oo hareedá' i laqwal kun harafaar tawa na/oó heedaádá' aa gwaa', do'ós miwa qwaár, baraá yaamaá Israeliwo.

⁷ Barnaxes hhiyaaduú heedaádá' aa gwaa' kwaalo'oodá' aaliro ga slaiiká, naagáy /ameenidár kwaalo'o i tleer dír geeraá bariisér gixsa, nee i o', ‹Hhiyoó hhawaatuueé' aa sií' doó hhiyaawós kudaá gwaa' tleesaro baraá Israeliwo. Hariimadá' inós tawa hhiyoó hhawaatuueé' tleehhamooro gaa sií'.›

⁸ Daqaní bariisér gixsadá' hhiyaadá' ngu atet as tawa axweesi nee inós. Barnaxés i adoodár si'imií kaahh, /ameenidá' ngiwa duuxiiká,

⁹ /ameenidár kwaalo'o ngu dír geeraá bariisedá' wa ya/ati dux, ngu gitsee/a i tsuq nee ngu beer, ‹Adoorí an adór hariim kawa tleehhi dír heé doó hhiyaawós gwaa sii' tleesaro.›

¹⁰ Umuú do'ós baraá Israeliro kuri bay ‹Doó heé taa ya/ati duúx.›

Dabér hatlá'

¹¹ «Hhawaataá tsár barnaxes taa ayé', nee harér hhawaatuú wák hhawaatuuwós burngwa alee/iisár eér, heedaádá' nee hhawaatuuwós taa aye' gway xooslár xwayla ót,

¹² dákw doó /iyáy oo /ameenidá' tsataak, ma gurtlawaara'.

¹³ «Tlaa/eedaá kílo kar qoomeemesi daa'awemoowós mi tsár wa koomara', oo wák ku iiloó' nee oo tsár ku inslaáhh. Qoomoó al/agiím mur qoomeemesaara'.

¹⁴ Laqaá kuungá' daa'awemaá tsár awa qoomaay kur qoomeemeesa' oo úr nee oo niiná mi koomara' baraá marayhunge.

¹⁵ Qoomoó ganaá' nee tlaa/aá ilo' awa hariimá' ar qoomeemesaak, as hotaá tleer kiwa sleera' baraá yaamaá AAKOÓ MUNGÚ, Mungúhung ni haniisi.

¹⁶ Asma muu sleémeero oo muruuwi gu tlehhiít, nee sleémeero awa al/agigiimá', AAKOÓ MUNGÚ, Munguúhúng gi ahhiit.

Hara'ayár múk Amaleki kuwa tsu/i

¹⁷ «Kangwdaádá' múk Amaleki naa kuungá' i tleéhh, qoomár tawa baraá aaí, diria' niwa baraá yaamaá Misrír wa ti'ité', inslawaak.

¹⁸ Axáy inslawaak adoodá' nura baraá loohír wa i haratlayé', qoomár tawa nusqumiité' nee tawa slaaqamiité', nee adór mukdá' aa alií kii/ as tawa slaaqamiít ngura tsu/iyé'. Múk Amaleki Mungú ngwaa da'ayuti'iiká.

¹⁹ Gawaá adoorihe qoomár AAKOÓ MUNGÚ, Munguúhúng burna amohhooárí haniís dír wakuuserhúng sleémeero, nee burna dahaás baraá yaamuudá' naa dirhúng i haniís tawa aalirhúng, daqaní múk Amaleki sleémeero ku suquurá' baraá yaamuwo. Gaarí ma baloó gunqaareesara'.»