DABE 24 - Biblía Axweesantá Hhohho' ar Mungú 2004

Dabér duuxo gaasa nee duuxo alkomti

¹ «Barnaxes hhawaata /ameeni gaa duúx, aluuwo gari sií', asma gár muunaáwose i slaiiká gaa tléhh, naagáy gari talaákárí haniís, gari guús dír do'ose, aluuwo /ameenidá' iri diyaa/át,

² /ameenidá' kari duux nee hhawaatuú hatlá',

³ hhawaatuuduú tsár birnga duúx, aluuwo gari talaákárí haniís, gari guus dír do'ose, laqaá barnaxes hhawaatuuduú tsár gaa duux aa gwaá',

⁴ naagáy hhawaatuuduú geera /ameenidá' ngiwa inki/i tawa male hareerós i hariindaaká, asma kaa qaroó meetagaás. Adoorí biringa tleéhh, dír AAKOÓ MUNGUHE a gár tlaakw. Gawaá adoorihe yaamuudá' AAKOÓ MUNGÚ, Munguúhúng naa kuungií haniís as kiwa ala' mi tlakweemár awaara'.

Dabér dimbadimbé

⁵ «Hhawaatuú aa sa duuxun miwa daqáy baraá slaqwaraaro, laqaá mukuwa gadiyér hatlá' i haniís, inós ku tawo may ay kurkú wák, as iwa dó' wa hooti, nee hareerós ngiwa qwal/atamiisi.

⁶ «Hee tlaa/ár xoosliingw, laqaá tlaa/anoó xoosliingw munguwa arhaánír wa óh, asma adoorí bara tléhh, a adór heé slafíngw hee gwaa arhaánír wá oh.

⁷ «Hee barnaxes hhiyaawós oo Israeli gwaa fiís, nee guri lawaalmoowós tleéhh, laqaá burgwa weeriís amór lawaali'iima, heé adór kwí a fisusmo, i harín kuwa gaasi. Adoorí an adoodá' tlakweema kir hingeesa' baraá tla/angwhunge.

⁸ «Barnaxes hee i tiqtír tsatmitú kón, ti harmagahhe' ar adoodá' kaahamuusér tlahhoó Laáwi nura ádbeér. Adoodá' aníng inooín ngaa báw tleehhaak.

⁹ Inslawaak adoodá' AAKOÓ MUNGÚ, Munguúhúng aa tleéhh dír Miriamu, qoomaadá' niwa ti'ité' baraá yaamaá Misrír wa alé.

¹⁰ «Barnaxes hee ugwa gaárí kirkitís, ma dahaar baraá do'ós gár arhaáni kawa lehh.

¹¹ Inós tsee/a tiwa daan, inós kilós i baraá do'ós i dahi, inósuú kilá' arhaánirós tidá' ngi kilós huwi.

¹² Barnaxes heesíng a narkutmo, arhaánirós looa mingiwa dirók wa tlés.

¹³ Umuú tsiindoowo inqwaaridár arhaáni ki/imiseek, as inós ngiwa tsiiti nee kuúng uri tsuuq. Adoorí bara tléhh, adór ganaa' aga tléhh dír geeraá AAKOÓ MUNGÚ, Munguúhunge.

¹⁴ «Heé ta bu'un oo narkutmo nee oo aleemaá kooma mu hara/uuntsimaar, tam heé Israeli, laqaá hoomoó ayaahúng hoót.

¹⁵ Umuú deelooro dír looa ira datiká bu'utuuwós, asma inós a narkutmo bu'utuuwí an gár inós ir hooti, bar adooriheeká AAKOÓ MUNGÚ gun i /aa/aá áy as kuúng, nee kuúng tari dát baraá dakuús.

¹⁶ Xwaylité makawa tsuú/ as daanduú tlakweemaá na/ii'ín, laqaá na/ii mikiwa tsuú/ as daanduú tlakweemaá xwaylitér'ín. Umuú hee aqo kun gaas as dakuúsarós kilós.

¹⁷ «Kwasleemár hoomoó ayaahúng hoót ma paslisara', nee ar na/aá panaay. Kuúng tlawuú kwaalo'o mu arhaánír wa oohaar.

¹⁸ Inslawaak adór kuungá' aáng tar lawaale baraá yaamaá Misriro, nee AAKOÓ MUNGÚ, Munguúhúng nuna tuú/ baraadá' wa ale. Gawaá adoorihe án kuungá' nu baw, adoorí tleehhaak.

¹⁹ «Qoomár bar qamuuhúng fiqitá', ufeedá' taa gunqaaresé' baraá qaymoórí ale, ma leehhara'. Tidá' aa met an meerá' as hoomár ayaahúng hoot, nee na/aá panaay nee /ameenár kwaeeli, as AAKOÓ MUNGÚ, Munguúhúng nuwa tsuuqi baraá gadiyeduuhúng sleémeero.

²⁰ Barnaxes a mamaá seituúnír bu'uundá', ma male ki/aara' tidá' aa met kawa lehha'. Tidá' aa met an meerá' as hoomaadá' ayaahúng hoot, nee ar na/aá panaay, nee /ameenár kwaeeli.

²¹ Qoomár bar sabiíbuú bu'uundá', ma alií ki/aara' mamaá sabiíbu kudá' naa meetiye' mi alhhe'eesár awaara', mawaak dír hoomaadá' ayaahúng hoot, nee na/aá panaay, nee /ameenár kwaeeli.

²² Inslawiimé' adoodá' kuungá' aáng tar lawaale baraá yaamaá Misriro. Gawaá adoorihe án kuungá' na ádbáw adoorí kawa tlehha'.»