DABE 23 - Biblía Axweesantá Hhohho' ar Mungú 2004

Múk ta harmeetin dír dinku'uumár múk Munguhe

¹ «Hhawaatuú taa karmúy, laqaá oo taa xooslár xwayla tsaát miwa dáh baraá dinku'uumár múk AAKOÓ MUNGÚ.

² «Umuúqo na/oó doroowayhe, laqaá baraá xwaylarose tam oo nángw sagaá wa mibaangw miwa dáh baraá dinku'uumár múk AAKOÓ MUNGÚ.

³ «Múk Amoni laqaá múk Moabu tam heé wák, tam ay nángw sagaá wa mibaangw miwa dáh baraá dinku'uumár múk AAKOÓ MUNGÚ,

⁴ asma qoomaadá' kuungá' niwa baraá yaamaá Misrír wa ti'ité', inooín kuungá' naa baraá loohírí al'ayi'iiká ar muruú /ayma nee ar ma'aay. Ala inooín Bala'amu garmoó Beori kuduú Petorír daáhh, tidár baraá yaamaá Mesopotamia, nguna tlaxwiyé', as kuungá' nuwa lu'usi.

⁵ Ala AAKOÓ MUNGÚ, Munguúhúng Bala'amu gwa iiárií qaasiiká, kitaangose Mungú lo'oodá' gana warqeés tawa tsuuqa dirhunge, asma AAKOÓ MUNGÚ, Munguúhúng kuungá' nuna ló'wa slaá'.

⁶ Gawaá adoorihe, baraá hotaahúng sleémeero kuká' mi baloó alee/isaara' as wayda nee diihhooa ngiwa slaya'.

⁷ «Múk Edomu mu ahhitara', asma mukwí a hhaeehúng. Sleeme múk Misri mu ahhiitara', asma kuungá' ana baraá yaamuuín wa hoté' adór dahaaye.

⁸ Xwaylar'ín ar sagaáwa tám tam i ya/aán kawa dahaasi baraá dinku'uumár múk AAKOÓ MUNGÚ.

Hhohhoartá xafoó slaqwaruuse

⁹ «Bara slaqwarár eeré', xafaay kuri tlehhé', umuú hee ti harmagaahhi, baraá muruú tlakwe.

¹⁰ Barnaxes hee baraá tla/angwhunge xweeraawo aa pisahhaát, heewí i tsee/aá xaftií ti'iiti, miwa dáh baraá xafi.

¹¹ Ala tsiindo birna xayé' i hamtlin ar ma'aay, nee looa bira dát i ki/i baraá guruú xafi.

¹² «Amór tsee/aá xafaywo dír tay /o/odaá aeera' masók i deer.

¹³ Baraá xooslarhunge masók kurmo i deer as qoomár bar /o/ór slá' bohoongw kuwa fol ar kurmo, nee /o/ooro bara hhe'és kari típ.

¹⁴ Xafoó hotaahúng masók ku hhohhó', asma AAKOÓ MUNGÚ, Munguúhúng ni baraá xafayhúng wa hi'iimiit as nuwa ba/amisi, nee wakuuserhúng ngiwa gawaá dabaahúng i haniisi. Gawaá adoorihe gár slasla/aar mingiwa ár dír tla/angwhunge. Bar adooriheeká inós i warqáy nuri geexáy.

Dabér dimbadimbé

¹⁵ «Barnaxes lawaalmo aakoowós ngwa ilagoów, niri hardáh amór do'ók, mu ki/isar dír aakoowós.

¹⁶ I dír do'ók wa hooti, didá' aa tsawaár hotaawo, didá' kuúng ta hot, tidá' inós gu sla'atamis. Mu hara/uuntsimaar.

¹⁷ «Heé Israeli oo hhawaata laqaá /ameeni i baloó harinká iwa fuquusi dír doó munguaá hatlá' wa aleeró.

¹⁸ Bu'utuú tsaatu'uuma oo taa sleér as seeu'uumár fuqi mu huwaar amór doó AAKOÓ MUNGÚ, Munguúhúng as al'axweesani kawa boo/es. Asma AAKOÓ MUNGÚ, Munguúhúng, muruuwí tsaraawo gu waak.

¹⁹ «Hhiyaawók oo heé Israeli mu gaárí kirkitisaar as ngiwa aldaafi. Aldaafi ma leelehhitaar daanduú kirkimér peesaaro, laqaá muruú /ayma, laqaá umuúqo gaaro ar muu i kirkaakiti ar aldaafi.

²⁰ Kuúng gaa bara kirkitís dír heé xoordaá hatlá', aldaafi iinaaro a aleesleér, ala dír hhiyaawók oo heé Israeliro aldaafi ma leelehhitaar, nee AAKOÓ MUNGÚ, Munguúwók u tsuuq baraá umuúqo gár ta tlehha, umuúqo dír tay hotaá eera nee kawa al.

²¹ «Qoomár al'axweesani bara qás dír AAKOÓ MUNGÚ, Munguúhúng, boo/eesaro ma tligaar, asma AAKOÓ MUNGÚ, Munguúwók ga dirók i iinuus, aluuwo kuúng a dát baraá dakuús.

²² Ala kuúng al'axweesani bara qasiká, dakuúsár ta koon i káhh.

²³ Ti ló'wa harmagahh, al'axweesani kawa boo/es tidá' taa afkók ar kát dír AAKOÓ MUNGÚ, Munguúwók i ale, asma gadaádá' kuúng ana ó' ar sla'aarirók ar kilá'.

²⁴ «Barnaxes aga waaráhh ar baraá qaymór sabiíbu ar inslaawmoowók, mamaá sabiíbu awa ta didá' wa /ak bueek, ala mu buaar kuri baraá tlakwaywók i qás kuri ar tleér.

²⁵ Barnaxes aga waaráhh ar baraá qaymór inslaawmoowók ar angaáno i ya/aán kuwa geeqeer dakoge, ala tsataay mu taataahhaar, nee balaangós kuri tláq.»