DABE 22 - Biblía Axweesantá Hhohho' ar Mungú 2004

¹ «Kuúng bar slér inslawmoowók laqaá bee/irós aga aán aa qwát, ma tawo mawaar, kwaáo ana qo aandiiká, ala amór do'ós ti ki/is.

² Ala barnaxes do'ós ku saáw laqaá u xu'uká, gimáy kuúng ar watleek amór do'ók, sleedaádá' i dír do'ók wa hot ay dír seebuúwós nay hardihi, kuúng daqaní ka ki/ís.

³ Kuúng adoorír kilá' tleehheek bar daqwaywós, laqaá tlawu, laqaá umuúqo gaaro ar inslawmoowok bira qwát, hee alee/isaro mu baloó mawaar miti ilaqaasaar tawa adór heé gaa ariiká.

⁴ «Barnaxes daqwaay, laqaá slér inslaawmoowók aa hú' baraá loohi, alee/isaaro mu mawaar, inós ku alee/ís tleesaro.

⁵ «/Ameena tlabaá hhawaate mingiwa tsitít, nee sleeme hhawaate tlabaá /ameena mingiwa tsitiitiyé'. Asma heé adoorí gaa tleehh gár AAKOÓ MUNGÚ, Munguúhúng i waki gan tlehhiit.

⁶ «Kuúng barnaxes doó tsir/i ugwa aán gawaá xa'ano, laqaá baraá loohi, i na/aá kón, laqaá qanhha, tsir/i i na/aá umiín, laqaá qanhha, tsir/idá' nee na/iiwose mi ar tlawaar.

⁷ Tsir/ír ur tidá' umiim geemaweek ala na/ii ar tleemuuwo i aleesleér. Adoorí bara tléhh, diihhooa a sleér nee kureeraá yaariir i hót.

⁸ «Doó /abén bur tlehhít, dír gar/oó do'o gaangeefi tleehheek, as hee miwa /eét, do'ók lo'o munguwa eér, barnaxes hee aa /eét gawaá daanduú dó' wa alé, nee iri gwaá'.

⁹ «Qaymoorók ar sabiíbu ma dahasíngw hatlá' i dahasaar. Adoorí bara tléhh, bu'uungw sleémeero oo qaymoodá', tam mamaá sabiíbu sleeme, gár kuwa hariím an ilahhooár wa hanís dír Mungú.

¹⁰ «Qaymoorók bar dósl, awu nee daqwaay mi dinkwárí altseegaar.

¹¹ «Tlabaá taa tleéhh ar aleedoogír se'éngw bee/aangw nee neewór kitaáni mi tsiitaar.

¹² «Inqwaarirók ar tsitaay paslemoowós tsiyahhaawo afuuntlureek.

Ilaiwa/ame daanduú hhawaata nee /ameeni

¹³ «Barnaxes hhawaata /ameeni gaa duúx, aluuwo gari sií',

¹⁴ nee gari sakwasleemuút iwa kaahi, ‹/Ameenirí nee hhawaata naa alqaatiyé' án ngiwa duuxa, aníng ana tsaáhh qoomár niwa alqaataán.›

¹⁵ «Naagáy barnaxes adoorí ar ló', xwaylitér dasi lamabu'úngw dasir'ín adór nee hhawaata tara alqatiiká ngu dír bariisér afkú gixsár i hup.

¹⁶ Baabuú dasiidá' bariise ngi bay, ‹Dasiirén ana haniís dír heewí as tawa hareerós, ala hám inós ga slaiiká,

¹⁷ nee gaa lámtí tsaát, i kaahi, dasiirí nee hhawaata taa qaroó alqaát, aníng ngiwa duuxa.› Aluuwo inooín inqwaaridár lamabu'uungw ngi dír geeraá bariisér gixsár wa laqane'.

¹⁸ Bariisér gixsadá' hhawaatudá' guri ót, guri múx.

¹⁹ Nee heedaádá' sleeme ngun doohhisiyá' ar parhheemaá peésár tsiiruú wák, (kiri haniis dír baabuú dasiidá') asma hhawaatudá' dasír Israeli ar nee hhawaata naa alqati'iiká gaa tawo lámtí tsaát. Nee /ameenidá' aqo an hareerós, si'iimaawo ga baloó aleeslayká baraá hotaawós sleémeerowo.

²⁰ «Barnaxes adoorí ar ló' nee lamabu'úngw dáw i kaahh adór inós nee hhaawaata tara alqatiiká,

²¹ inooín dasiidá' ka huwi ay dír afkú doó baabuúwós nee hhaawaataá baraá gixsadá' ngi tlaqutiye' ar tlaa/e ay dír i gwa', asma gár alsi'ím gaa tléhh baraá Israeliwo qoomár iwa doó baabuúwós i diri'. Adoorí an adoodá' tlakweema kir hingeesa' baraá tla/angwhunge.

²² «Hee burkwa óh dír harér heé hatlá' wa ale, inooín tsaraawo aqo kin tsuu/, hhawaata nee /ameenirihe. Adoorí an adoodá' tlakweema kir hingeesa' baraá tla/angwhunge.

²³ «Barnaxes dasír ta lehhiiti nee hhawaata ta doogiyé' baraá gixsa, tari alqaát,

²⁴ inooín tsaraawo duuxaak baraá gixsaro nee ki tlaqutá' ar tlaa/e ay dír i qatliya'. Dasiirí in hariín kawa tlaa/ér tlaquuti as inós iwa tseiká, as kawa alee/isi, inós iqo baraá gixsárí dirí'. Hhawaata aqo kun gaas asma dasír inslaawmoowós i lehhiiti ga alsi'imúr áy. Adoorí an adoodá' tlakweema kir hingeesa' baraá tla/angwhunge.

²⁵ «Barnaxes hhawaata nee dasír taa lehhiít taa doogiyé' gari óh ar /uuru, tari alqaat nee dasiidá', hhawaatuuwí gár kusa hariím a gaasa inós kilós.

²⁶ Kuungá' dasiidá' ma kwatitara' asma inós gár aa dakús i káhh ar inós kawa hariím kawa gaasi. Gár adoorí a slaqamís nee hee burkwa i haratláy nee inslaawmoowós kuri gaas, asma

²⁷ hhawaatudá' dasiidá' gana /uurúr óh qoomár tawa baraá slá/átí dirii'i, nee dasiidá' tam aa tsei, ala heé gaa axaas i kaahh, heé ga /iís iri qwaár.

²⁸ «Hhawaata barnaxés dasír taa sa axweesiiká gaa óh ar /uuru, kiri uhín,

²⁹ hhawaatuuwí baabuú dasiidá' gun buu' ar parhheemaá mibeeri kooán awa peésa, asma dasiidá' gana /uurúr óh, nee dasiidá' aqo an hareerós, as ma adoodá' ngiwa alsi'imúr áy i baloó ya/andaaká ngiwa si'i baraá slafiingós sleémeerowo.

³⁰ «Umuúqo hhawaatuuwo harér baabuúwós mingiwa duúx, laqaá tam mingiwa tlaba' waatleés.»