DABE 20 - Biblía Axweesantá Hhohho' ar Mungú 2004

Daanduú slaqwara

¹ «Kuungá' barnaxes aga slaqwarár eeré' amór wakuuserhúng, naxés farsuuín nee gardaá slaqwarar'ín, nee slaqwaruuser'ine bira aandé' toohúng ka baa/ uraywo, kuungá' inooín mi da'ayutara'. Asma AAKOÓ MUNGÚ, Munguúhúng kudá' kuungá' naa baraá yaamaá Misrír wa duux i dinkwa nee kuungá'.

² Dír slaqwara kara iimu/undi'iiká, kaahamusmoó Mungú i sihhiiti nee slaqwaruuse ngi i axweesi,

³ ngi bay, ‹Xoorór Israeli, iia qaasaak! Kuungá' laarí slaqwara a tsaxwaá kawa iimu/uunda' nee wakuuserhúng. Gimsé' ma mune siaara', laqaá mada'ayumiitaara', laqaá ma daaraaxara', ma kwislmiitara'.

⁴ Asma AAKOÓ MUNGÚ, Munguúhúng i dinkwa nee kuungá' baraá slaqwaraaro. Inós i slaaqw kitangwhúng wa ale, amór wakuuserhúng, nee nuri baalírí haniis.›

⁵ «Aluuwo geeraharuuse slaqwaruuse ngi beer, ‹Diirihe hee i deéro oo do'ós gwaa tleehh, ala gwa aldafinká? Heé adoorí i amór do'ós i watli, miwa baraá slaqwarári gwaá', nee heé hatlá' do'ós guri aldafín.

⁶ Hee i deéro diirihe oo sabiíbu gwa dahaas handá' mamaá geera gaa tsaqiiká? Bir deer i watli amór do'ós. Aluuwo burkwa gaás baraá slaqwaraaro heé hatlá' mamaá sabiíbuudá' giri giiriis /aymaaro.

⁷ Dirhunge hhawaatuú dasír doó hee duuxooro gaa naka/aas i deéro? Bir deer i amór dó' i watli, as kahhó' mukuwa gaás baraá slaqwara nee hhawaatuú hatlá' dasiidá' gari duux.›

⁸ «Geeraharuuse i kumit yaahamisuuwo, ‹Xáy, heé daimiít laqaá heé aa daba' tsatiit i deéro? Bir deer i watli amór do'ós, aluuwo múk hatlá' munguwa daba' tsaát adór inós wa aleeró.›

⁹ Barnaxes geeraharuuse axweesantá dír muko aa hhe'és, daqaní geeraharuusér slaqwara muu ngu geerahat.

¹⁰ «Qoomár bar gixsa a i haratleemuú wa sla'á' yaamuloouusér gixsadá' ka geerií ádbeerá' áx wayda ku slái?

¹¹ Barnaxes yaamuuloouusér gixsadá' wayda gu sla', nee dabaaín ngaa hanís, daqaní múk baraadií dirií' sleémeero kuungá' nu sagadiyuus, nee gadiyeedaá kiwa /uurutimiisi ngi tlehhiitiyá'.

¹² Ala barnaxes inooín wayda ngu slaiaaká tleehharo, nee kuungá' nuri i haratláyá' as nuwa i slaqwiya', tari slaqwá' nee kuungá', naagáy gixsar'ín ka harwedá'.

¹³ Nee AAKOÓ MUNGÚ, Munguúhúng gixsadá' ngi qaas gawaá dabaahúng, daqaní hhawaate sleémeero ki tsu/á' ar paánga.

¹⁴ Ala /ameena, nee na/ii, nee hikwa nee mura' sleémeero kudá' baraá gixsár i dirií' haasaáng tiwa ar tleere' as tawa koohúng. Muruuduú wakuuserhúng /ayaak, kudá' AAKOÓ MUNGÚ, Munguúhúng naa haniís.

¹⁵ Adoorí an adoodá' ta tlehha' dír gixsaduudá' sawen dirhunge dír yaamuudá' kuungá' sleémeero ta ala'a.

¹⁶ «Ala baraá gixsadudaá yaamuudá' AAKOÓ MUNGÚ, Munguúhúng naa haniís kiwa ala', umuúqo gár hiinsla ma slafíngwí mawaara'.

¹⁷ Muu sleémeero hhaamisaak, múk Hiti, nee oo Amori, nee oo Kana'ani, nee oo Perisi, nee oo Hifi nee oo Yebusi, adoodá' AAKOÓ MUNGÚ, Munguúhúng ngira oó'.

¹⁸ As kahhó' inooín kuungá' munduwa intsaahhatisiyé' tlehhmi'ii'ín kudá' ta waki, kudá' i tlehhahhitiya' dír munguii'ín, nee kuungá' tlakweema kiri tlehhá' dír AAKOÓ MUNGÚ, Munguúhúng.

¹⁹ «Gixsa bar aga harwedé' har afiqoomár tleere, tari slaqwé' as kawa hayota', xaa'aá mamaá koomá' mi tlaaqara' tsabuuwo. Xáy xaai a múko? Heé i haratlaya' a heemá? Mamuuín /ayaak, ala mi tlaaqara'.

²⁰ Xaa'aá hatlá' awa mamuuín ta /ayiiká tlaqaak ki /aampúr tlehhá' awa ta gixsár ar harwedá' ay dír kay hayota'.»