DABE 2 - Biblía Axweesantá Hhohho' ar Mungú 2004

Kureeraá hotaá baraá xaanxaay

¹ «Naagáy aluuwo tari alií warqawaán, aaiiwo tari kumiitaán ay baraá xaanxaay, tari amór tlawtá Shamu xuaán adoodá' AAKOÓ MUNGÚ iga báy. Ana tongaanumaamisaán afiqoomár yaariire isaapoó tloomár Seirír wa ale.

² «Aluuwo AAKOÓ MUNGÚ iri báy,

³ ‹Afiqoomár bu'uuta aga tongaanusé' baraá yaamuukaá tlom'iiwo. Hám daxta bihhaá /iíkwí warqawé'.

⁴ Aga naka/é' yaamaá tlom'aá Seiri kiwa waarahha', yaamaá hhaeehúng awa xwaylár Esau. Ala inooín kuungá' nu ló'wa da'ayutiyá', ti harmagahhe'.

⁵ Ma slaqwaara' nee inooín, asma baraá yaamuuine tam dír harqoomoó tsa/oó yaae ngi baloó hanisaaká. Asma yaamuukaá tlom'aá Seiri iga Esau nee xwaylarós i haniís as tawa kooín.

⁶ Barnaxes ma'aá wahaangw laqaá muruú /ayma u sla'á' aqo un dir'ín wa tlaxwá'.›

⁷ «Gimsé', inslawaak adór AAKOÓ MUNGÚ, Munguúhúng kuungá' nura tsuúq baraá umuú gaaro ar taa tlehhi'i. Kuungá' nuna de'én qoomár tawa baraá xaanxaywí úr wa tongaanusa'. Inós ina hoót dinkwa nee kuungá' har afiqoomár kureeriiká' mibeeraá tsiyahhe, nee kuungá' gár nuwa /aaruur i káhh.

⁸ «Tari adoorír kumiitaán aaiirene, hhaeerén kudaá xwaylár Esau kiri waarahhaán, kudá' hootá' baraá yaamaá Seirír wa ale, loohidár baraá xatsa kari siaán ooharo, nee gixsadudá' ta bay Elati nee Esion-geberi. Aluuwo tari warqawaán loohidár xaanxoó Moabu kari ar oohaán.

⁹ AAKOÓ MUNGÚ iri báy, ‹Múk Moabu mu hayloórí leehhaar, laqaá miti muxaara' nee inooín, asma yaamuuín ngi dirhúng i hanisaaká. Asma yaamaá Ari iga xwaylár Loti haniís as tawa aalir'ín.›

¹⁰ «Aáng yaamuukaá Ari múk yaariír gina hoót oo /uureemaá koóm, oo ta bay múk Emi, slám a múk tlét adór mukduú Anaki.

¹¹ Mukuú adór múk Anaki, inooín sleeme kina xuú' tawa múk Refai, ala múk Moabu, mukwí umuú ngur ateetina' a múk Emi.

¹² Múk Hori sleeme aáng yaamuukaá Seiri gaa hoót, ala mukdá' kuna guús nee xwaylár Esau, kuri hhaamiís. Naagáy inooín awa kilá' nari kitángw mukdá' wa hootiyé'. Tam múk Israeli adoorír kilá' baraá yaamuudaá AAKOÓ MUNGÚ aa inooín i haniisi ngina tleehhiyé' as yaamuudá' tawa daqaari'iimar'ín.

¹³ «AAKOÓ MUNGÚ tiri báy, ‹Quutlé', hám daxta yaaér Seredi waarahhaak.› Kár yaaeedár Seredi kari waarahhaán.

¹⁴ Qoomaarihe kureeri mibeeri tám nee dakaát naa qaroó waarahhiyé', iimidá' tawa Kadesh-barnea wa tlawaán, ay qoomár yaaér Seredi kawa waarahhaan. Qoomaarihe qartidá' afiqoomár slaqwara eemuuwo hariim aa qaroó fák qatlooro, adoodá' aáng AAKOÓ MUNGÚ lo'o ngira /aáy.

¹⁵ AAKOÓ MUNGÚ inósuú kilá' gina haraganaá', giri hhaamiís baraá slumooín tam sleémeero giri hhaamiís.

¹⁶ «Naagáy mukdaádá' sleémeero aáng kureeri'ín slaqwara eemuuwo naa bu'uutiye' qatlooro niwa faakiyé' gawaá daanduú yaamuwo,

¹⁷ AAKOÓ MUNGÚ iri báy,

¹⁸ ‹Laarír kilá' digmuú yaamaá Moabu u waarahhá' ar loohír yaamaá Ari,

¹⁹ tari hardatá' yaamaá múk Amoni, múk Amoni mu hayloórí leehhara', laqaá ma slaqwaara' nee inooín, asma aníng dír ni kuungá' i haniis i káhh baraá yaamuuine, as tawa aalirhúng. Aasla'áy, mukwí an xwaylár Loti, nee yaamuuká' iga haniís as tawa daqaari'iimar'ín.› »

²⁰ Yaamuuín kuká' nina xu'utitiyé' tawa yaamaá múk Refai. Múk Refai aáng diirí ngina hootiyé', múk Amoni mukwí ngun babaya' Samsumi.

²¹ Inooín an múk ló'wa yaariír oo /uuruú koóm nee múk tledaadét adór múk Anaki. Ala AAKOÓ MUNGÚ mukwí guna hhaamiís qoomár múk Amori iwa hardáh yaamuudá' kiri hayóh, niri baraadá' wa hootiyé' kitangw'ín wa ale.

²² AAKOÓ MUNGÚ adoorí aa tleéhh an adór tidá' aa tleéhh dír xwaylár Esau, inooínadaá múk Edomu naa hootiye' baraá yaamaá Seirír wa ale. Asma Hori guna hhaamiís qoomár múk Edomu niwa amoodá' i hardáh, yaamuudá' ngiri hayohiyé', tari baraadá' wa hoót tam ay laarí.

²³ Múk Afi aáng ina hoót dír yaamudaá bihhaá Tlawtá Tla/aangw ay Gasa. Múk Kaftori kudá' yaamaá Kaftorír daáhh mukduú Afi kuri hhaamiís, inooín tari baraá yaamuudá' i hotaá áy.

²⁴ «Naagáy AAKOÓ MUNGÚ atén tari báy, ‹Gimsé', aai iimu/umaak. Yaaér Arnoni, waarahhaak. Aníng waawutmo Sihoni, oo xoorór Amori kudá' Heshbonír hoót nee yaamuuwose ngwa gawaá dabaahúng i qaás. Yaamu i haratlawaak nee aaliro iimu/umaak.

²⁵ Aníng laarí muu sleémeero baraá yaamuwo u de'eérí tleés nee hor/iro as kuungá'. Inooín kangwhúng burngwa axaasiyé', tari daraxaat nee tari amoqwaqwadín.›

Waawutmo Sihoni kuwa baál

²⁶ «Naagáy ya/abuuse ngiri ya/aáw amór xaanxoó Kedemotír wa ale, as tawa amór waawutmo Sihoni kay, kudá' baraá Heshbonír hoót as kángw wayda,

²⁷ as tawa ooi, ‹Gám atén a waarahhaán ar baraá tla/ángw yaamuuwók. Atén an waarahhaán ar baraá loohi, a paslanaaká bartá /iyáy laqaá basáy.

²⁸ Muruú /aymarén nee ma'aá wahaango i dirók wa tlaxwaán. Atén gár ni firirimaan a waarahhamaá yaamuuwók kiwa adahaan.

²⁹ Yaaér Yordani a waarahhaán nee tawa dahaan baraá yaamaá AAKOÓ MUNGÚ, Munguúrén ni hanmiisi. Na/aá Esau kudá yaamaá Seiri nee múk Moabu kudá' baraá Ari atén tina ya/ané' tawa waarahhaan baraá tla/ángw yaamuuín ar ale.›

³⁰ «Ala Sihoni waawutmoó Heshboni ina sií' tawa baraá tla/ángw yaamuuwós ar waarahhaan. Asma AAKOÓ MUNGÚ, Munguúhúng guna sagagawdeés, nee guna muuná gawdeés, as atén kuwa baalaan, nee yaamuuwós kiwa hayohaan, kuká' hamí laarí ta /ayaan.

³¹ «Aluuwo AAKOÓ MUNGÚ iri báy, ‹Ga/aaweek, waawutmo Sihoni nee yaamuuwós ngaa qaás gawaá dabaahúng i ale. Yaamuuwós i haratlawaak, nee ki koohúng tlehhá'.›

³² Naagáy, Sihoni niri ti'iít nee mukós sleémeero as tawa slaqwi nee atén bihhaá gixsár Yahasár wa ale.

³³ AAKOÓ MUNGÚ, Munguúrén nguri gawaá dabaarén i qaás, atén kuri baalaán, nee xwaylarós nee mukós sleémeero.

³⁴ Gixsaduuwós sleémeero kiri hayohaán. Hhawaate nee /ameena nee na/iiwo kiri tsu/aán, heé taa slafiíngwí geexawaán tumu wák i kaahh.

³⁵ Muruú taa haasaáng wa huwaán a hikwa nee daqaari'iimár taa baraá gixsár i awaán.

³⁶ Iimír gixsár Aroerír wa tleemu, tidá' gawaá gangeefír yaaér Arnonír i dirii', nee gixsadá' baraá tlapár i dirii', ay yaamaá Gileadiwo, gixsár taa harslaaqataán hayooharo tam ar wák i káhh. AAKOÓ MUNGÚ Munguúrén gixsaduuká' sleémeero ngina haniís gawaá dabaarén i ale.

³⁷ Ala aga tseewuwaniiká dír yaamaá múk Amoni, laqaá dír afaá yaaér Yaboki, laqaá dír gixsadudaá yaamaá tlom'i, nee laqaá umuúqo tidá' AAKOÓ MUNGÚ, Munguúrén, naa diréní ooiká.»