DABE 19 - Biblía Axweesantá Hhohho' ar Mungú 2004

Gixsadaá ti gogoowi

¹ «Alaá AAKOÓ MUNGÚ, Munguúhúng bar múk yaamuudá' ni kuungií haniisi ngwaa hhaamiís, nee alaá bar kuungá' yaamuuín iga alé', nee tari hotaá eeré' baraá maray'ín,

² daqaní kuungá' gixsadaá tám ki paratlá' baraá yaamuudá' AAKOÓ MUNGÚ, Munguúhúng ni kuungá' i haniisi.

³ Kuungá' loohi an tlehhá' nee yaamuudá' AAKOÓ MUNGÚ, Munguúhúng na kuungá' i haniisi as tawa aalirhúng, kiri qasisá' baraá daqooroó tám as umuú heewo oo hee gwaa pa/aayór wa gaas iwa gowi amoodií ale.

⁴ Hee barnaxes hee gwa pa/aayór wá gaás, heé wakusmowoseeká,

⁵ ar slaqse, hee nee kuqá' ta xaa'aá tlaquú áy baraá darma, qoomár iwa tlaaqi, tsawo iri gawaá kipáy wa kotsoqót, hee guri /ák, iri gwaá', heedaádá' tsawoorós hee gwaa gas i gowi amór gixsár wák baraá gixsaduudá' taa paraatli, as slafiingós nguwa tu/i.

⁶ Ala barnaxes gixsadá' ka ló'wa saaw, heedaádá' li/oó bu'uúm kudá' hee gwaa pa/aayór wa gaas gu aleeslay eeharto guri gaas, tam heedaádá' hee gwaa pa/aayór wa gaas kwasleemarós kaa gwa'arárií tsatiikahe, asma inooín aáng a wakuuseerooká.

⁷ Gawaá adoorihe, aníng kuungá' nun baw, gixsadaá tám paraatlaak.

⁸ «Slám barnaxes AAKOÓ MUNGÚ, Munguúhúng digeemaá yaamuuhúng ngaa doók, adoodá' ngira dír baabi'iihúng i alqadín, nee inós yaamu sleémeero kudá' aa al'axweés dír baabi'iihúng, ngiwa haniisi,

⁹ barnaxes kuungá' taa ló'wa harmagahhé' hara'ayaarí laarí naa kuungá' báw kawa ota', nee AAKOÓ MUNGÚ, Munguúhúng kuri slaé', nee deelo sleémeero loohirós baraá eehadé', daqaní kuungá' gixsadaá hatlá' awa tám i dogá' dír kudaá geera,

¹⁰ as heé dakuúsár koomaaká mukuwa gaás baraá ayaahúng kudá' AAKOÓ MUNGÚ, Munguúhúng ni dír kuungá' i haniisi, nee gawaá adoorihe kuungá' nuri dakuúsár tsu/utár áy.

¹¹ «Ala barnaxes hee wakusmoowós gwaa haramamahhaát guri gaás, aluuwo iri goów baraá gixsaduudaá guwaay,

¹² bariisér gixsadá' muu ngu ya/ap, as heedaádá' kuwa baraadá' wa duuxi, kuri haniis dír kudá' li/oó bu'uúm daanduú heedá' aa gaás wa alé, as kuwa gaasi.

¹³ Heé adoorí mu baloó gurtlawaara', ala masók tlakweemaá tsu/utár múk dakuusár koomaaká baraá yaamaá Israeliro in faká' as kuungá' tawa hota' ar wayda.

Digeemaá aáng

¹⁴ «Digeemaá aáng awa yaamaá inslaawayhúng kudá' taa qaás mi hingeemisaara', baraá yaamuudá' AAKOÓ MUNGÚ, Munguúhúng ni kuungá' i haniisi as kiwa ala'.

Lamabu'uuse

¹⁵ «Lamabu'úngw heé wák i bu'uutiiká kuwa heéwár sakwasleemut daanduú dakuúsár hee gaasaro, laqaá tlakweemaá hatlá' awa aa tleéhh. Lamabu'úngw múk tsár, laqaá tám, an lamabu'úngw bu'uút kuwa ar gadiyusa'.

¹⁶ Barnaxes lamabu'usmoó lamusmo hee gwaa sakwasleemuút dakuúsarkaaro,

¹⁷ inós nee heesíng kaa/uusá' ta sihhiiti dír geeraá AAKOÓ MUNGÚ, dír geeraá kaahamuusér Mungú nee har'ohuuse, kudá' qoomaasinge baraá gadiyeédí diriiá'.

¹⁸ Har'ohuuse gilaadá' giri alqaytsít, bar lamabu'usmoodá' a lamusmo, nee heedaádá' guna hara/uuntsín,

¹⁹ naagáy kwasleemaadá' ka tsatá' adoodá' lamabu'usmoodá' geeraawo heedaádá' ngu laqtá wa slai, ka inósí tleehhi. Adoorí an adoodá' tlakweema kir hingeesa' baraá tla/angwhunge.

²⁰ Múk hatlá' adoorí birnga axaás tari da'ayuut, nee tlakweemaá adór kuká' kiri male tleehhiiká tla/angwhunge.

²¹ Múk adór kwí mu gurtlawaara'. Heé hee gwa gaas, aqo inós kun gaas sleeme, heé iltá hee gaa gaas, aqo iltós kan gaas sleeme, heé sihhnoó hee gwa tuu/, aqo inós kun sihhno tuu/ sleeme, heé dákw hee gwa geeqay, aqo inós kun dawa geeqáy sleeme, heé yaaér hee gaa geeqay, aqo inós kun yaae geeqáy sleeme.»