DABE 17 - Biblía Axweesantá Hhohho' ar Mungú 2004

¹ «Awuú toqoormo laqaá bee/ír toqoori mi ilahhooár wa tsu/aar dír AAKOÓ MUNGÚ, Munguúhúng, asma ilahhooár adoorí AAKOÓ MUNGÚ, Munguúhúng ga waak.

² «Barnaxes aga axasé' baraá gixsaduhúng kudá' AAKOÓ MUNGÚ naa kuungá' i haniís, heé hhawaata laqaá /ameeni tlakweema gaa tleehh dír geeraá AAKOÓ MUNGÚ, Munguúhunge, nee alqadoorós gari sií',

³ inós munguaá hatlá' giri sagadiyuús nee giri sluufmiís, nee sleeme tsee/amá, nee slahhaangw tam tsatse/uú gawaá doori guri sluufmiís, kudá' aníng naa ooiiká kuwa sluufmisá',

⁴ nee barnaxes kangwsíng kungwa kuungá' tunduri kaangwí báy nee kuri axasé', daqaní kangwsíng kungwa dirhúngií oó', daqaní kangwsíng ku tsawtsawuusá', axáy ar tsuuwa lóe. Nee barqo tsuwa ló', gár adór tír tlaakw baraá yaamaá Israeliwo kaa qo tsuwa tleéhh,

⁵ daqaní heesíng laqaá /ameenisíng duuxaak baraá gixsaaro, nee ka tlaqutá' ar tlaa/e ay dír i gwa'.

⁶ Tam adoorihe, heesíng bur gasá' aqo ay dír kway lamaabu'un nee múk tsár laqaá tám. Ala mu gaasara' barnaxes lamabu'usmo a wak kilós.

⁷ Mukduú lamabu'uuse masók an múk gu giiriís tlaqutuwo, naagáy daqaní múk hatlá' ngu aluú wa tsaxaari. Adoorí an adoodá' tlakweema kir hingeesa' baraá tla/angwhunge.

⁸ «Siwarkaaro i ya/aán qaa/oó gawít niwa ti'iiti baraá gixsarhunge, oo har'ohuuse i aleesleeraaká tsatto, kwasleemár daanduú hee kuwa gaás laqaá daanduú hariimár hee kawa hara/uuntsín, laqaá hee kuna slahh'eés, daqaní ta tleerá' didá' AAKOÓ MUNGÚ Munguúhúng i tsawaari, as umuuwós kuwa ateetin.

⁹ Daqaní ta hardatá' dír kaahamuusér Mungú ar tlahhoó Laáwi, nee dír har'ohusmoó qoomaasinge baraá gadiyeédí dirií', kuungá' kaangw ku dir'íní oá'. Inooín kwasleemaadá' ngi tsatiyá'.

¹⁰ Naagáy daqaní kuungá' tidá' inooín ni ooiya' didá' AAKOÓ MUNGÚ aa tsawaár wa ale ka tlehhá'. Kuungá' ló'wa ilakaaharesé', adoodá' sleémeero inooín ni ooiya' kawa tlehha'.

¹¹ Kuungá' gár tunduwa hariím aqo adoodá' inooín naa ooiyé' an tlehhá', nee adoodá' nura gan'aasiyé' an eehadá'. Adoodá' kuungá' tunda báy ma baloó mawaara' kawa tlehha'.

¹² Barnaxes hee kaahamusmoó Mungú kudá' taa qaás, as AAKOÓ MUNGÚ, Munguúhúng nguwa sagadiyuusi, laqaá har'ohusmo, gu iialooeemisiiká, heewí a gaasa. Adoorí an adór tlakweema kir hingeesa' baraá tla/angw múk Israeliwo.

¹³ Muu sleémeero kaangwí guri axaas, tari da'ayuut, nee hhaslo wasle ngiri mayá'.

Kángw daanduú waawutmo

¹⁴ «Qoomár bara daté' baraá yaamuudá' AAKOÓ MUNGÚ, Munguúhúng ni haniisi as kiwa ala', nee tawa baraadá' wa hotá' kuungá' tari oa', ‹Atén waawutmoorén u qaasaán, adoodár xoordaá hatlá' awa atén taa harweeriye'›,

¹⁵ kuungá' waawutmoohúng ku qasá', masók a heé AAKOÓ MUNGÚ, Munguúhúng aa tsawaár. Waawutmo baraá tla/angwhúng tiwa tsawde'. Ala hoomo mu waawutmoó wa tsawaarara'.

¹⁶ Dinkwa nee tihe inós masók a heé farsuú yaariír gu leelehhiitaaká as slaqwaruuserós, laqaá masók a heé muu gu baraá yaamaá Misrirí ki/isaaká, as farsuú yaariír kuwa sleera'. Asma AAKOÓ MUNGÚ taa gurbuú' iwa kaahi, ‹Ma baloó baraá yaamaá Misrír i ki/aara'.›

¹⁷ Masók waawutmo a heé tlaawoó yaariír gu sla'aaká duuxooro, as aluuwo muunaáwós mukuwa paslís nee /ameenár yaariir, iri dee/anuut. Laqaá tam peésár yaariir, laqaá sahaábuú yaariír munguwa burumburín.

¹⁸ Qoomár barnaxes waawutmo aa iwiít gawaá kitángw waawuti'iima, gooír hatlá' ar dabeerí ngi dír geeraá kaahamuusér Mungú ar tlahhoó Laáwi wa gooin.

¹⁹ Dabér taa gooín tari tós, umuú deelooro baraá hotaawós sleémeero ngi soomuusi as inós iwa intsaahhahhan, AAKOÓ MUNGÚ, Munguúwós nguwa ilaiwawa/i, ar loohír dabeedá' sleémeero ngiwa oohi, nee kaahirós sleémeero ngiwa boo/eesi.

²⁰ Barnaxes inós aa daara/uutiiká iri hhaeewós waaqaqauú áy, laqaá barnaxes hara'ayaarí gaa si'iiká, tam adór niina, inós in kumamiit waawuti'iimaro nee na/iiwose baraá yaamaá Israeliwo.»