DABE 16 - Biblía Axweesantá Hhohho' ar Mungú 2004

Deelór úr ar Pasaáka

¹ «Deelór ur ar Pasaáka tleehhaak qoomár slahhángwdá' ta babay Abibu, as AAKOÓ MUNGÚ, Munguúhúng, asma slahhángw Abibu AAKOÓ MUNGÚ, Munguúhúng kuungá' qoomár xweeraawo nuna baraá yaamaá Misrír wa duúx.

² Kuungá' ilahhooár Pasaáka ar muruú ta tsu/i haniisaak baraá tla/ángw bee/angwhúng nee hikwaahúng wa ale, as AAKOÓ MUNGÚ Munguúhúng kuwa ilaiwawa/a' didaádá' AAKOÓ MUNGÚ aa tsawaár ar umuuwós kuwa ateetin.

³ Ilahhooarí ma al/ayaara' nee mikaátér taa sluuftís. Deelo faanqwe mikaátér taa sluuftisiiká na /ayaak, inós kan babay mikaatér slahh'eemis, asma kuungá' ana gaanslár ti'ité' baraá yaamaá Misriro, gawaá adoorihe, deelo sleémeero kuungá' deeloodá' tawa baraá yaamaá Misrír wá ti'ité' an inslasleerá'.

⁴ Har afiqoomár deelo faanqw hee baraá yaamuuhunge gadaádá' mikaáte kar sluuftimisi mingiwa baáts baraá do'ós, nee fu'unaá makiito'oodá' taa gaás tsiindaá bál Pasaáka kuwa iimu/u/uunda', mindiwa meetiyé' baraá do' ay matlaatle.

⁵ «Ilahhooár Pasaáka ar muruú ta tsu/i ma tawó hanmiisara' baraá gixsadu sleémeero kudá' AAKOÓ MUNGÚ, Munguúhúng naa qoo haniisi.

⁶ Ala ilahhooa hanmiisaak didá' kilós ar AAKOÓ MUNGÚ, Munguúhúng aa tsawaár as umuuwós kuwa didá' wa ateetin, diirí an didá' ilahhooár Pasaáka ar muruú ta tsu/i kawa hanmisa' tsiindoowo, qoomár looa bir darát, qoomaadár kilá' niwa baraá yaamaá Misrír wa ti'iité'.

⁷ Fu'unaydá' ki humiindá' nee ki /agá' didá' AAKOÓ MUNGÚ Munguúhúng aa tsawaár kuungá' wa ale, matlaatleero ta ki/á' baraá heemaduhúng.

⁸ Ar har afiqoomár deelo lahhooe mikaátér taa sluuftisiiká an /agá', nee bál faanqw a baalár ur ar muu iwa burumburiti as AAKOÓ MUNGÚ kuwa sluufmiisi, nee baalaadae ma gadiyuusara'.

Deelór ur ar bu'uungw

⁹ «Kuungá' wiikidaá faanqw faaraak. Faaro dír kawa iimu/uunda' a qoomár fiiqit bura iimu/uundé'.

¹⁰ Aluuwo deelór ur ar wiikidu ka boo/esá' as AAKOÓ MUNGÚ, Munguúhúng kuwa ilaiwawa/a' ar ilahhooár sla'aari kawa hanisa' ar harqoomoó adoodá' AAKOÓ MUNGÚ, Munguúhúng nura tsuúq.

¹¹ Kuungá' tari dír geeraá AAKOÓ MUNGÚ, Munguúhúng wa qwalala/á', kuungá' dinkwa nee na/iihúng awa daaqaay nee awa dasuuwo, nee lawaalehúng ar hhawaate nee ar /ameenaaro, nee hoomár ayaahúng hoota, nee dahaayero, nee na/aá panaay nee /ameenár kwaeeli ar ar alhootá' nee kuungá'. Adoorí tleehhaak didá' AAKOÓ MUNGÚ, Munguúhúng aa tsawaár as umuuwós kuwa didá' wa ateetin.

¹² Tí inslawaak, adór kuungá' aáng tar lawaale baraá yaamaá Misriro, gimsé' kaahirí ló'wa harmagahhaak kawa ota'.

Deelór ur ar isleeri

¹³ «Alaá balangwhúng sleémeero slahhto bura hhe'esé', nee mamaá sabiíbu tsoo/aro bira hhe'esé', deelór ur ar Isleeri boo/eesaak deelo faanqwe.

¹⁴ Kuungá' deeloosíng ur ka saqwalala/á' dinkwa nee na/iihúng awa daaqaay nee awa dasu, nee lawaalerhúng ar hhawaate nee ar /ameenaaro, nee múk Laáwi, nee dahaaye, nee na/aá panaay nee /ameenár kwaeeli nee hoomár baraá ayaahúng hoota.

¹⁵ Deelo faanqwe AAKOÓ MUNGÚ, Munguúhúng un deelór úr i tlehhá', didá' inós aa tsawaár as umuuwós kuwa didá' wa teetin, asma kuungá' AAKOÓ MUNGÚ, Munguúhúng nu tsuuq baraá balangwhúng sleémeero, nee baraá gadiyeduuhúng sleémeero, kuungá' tari ló'wa qwala/á'.

¹⁶ «Hhawaate sleémeero awa xoororhúng ni hardihiyá' dír geeraá AAKOÓ MUNGÚ, Munguúhúng, ki/ima tám, umuú kurko didá' AAKOÓ MUNGÚ, Munguúhúng aa tsawaari as umuuwós kuwa didá' wa ateetin: Qoomár deelór ur ar Pasaáka, nee deelór ur ar bu'uungw, nee deelór ur ar Isleeri. Mindiwa dír geeraá AAKOÓ MUNGÚ i hardihiyé' ar dabaá kaaharen.

¹⁷ Umuú heewo gaa ngi haniisi ar adoodá' AAKOÓ MUNGÚ, Munguúhúng nura tsuúq.

Qwatsiiri daanduú gana'amayero

¹⁸ «Kuungá' har'ohuuse nee geeraharuuseero tsawaaraak baraá tlahhi'iihúng wa ale, baraá gixsaduhúng kudá' AAKOÓ MUNGÚ, Munguúhúng naa haniisi, inooín qaa/oó muu ngu tlaaqiye' ar adór ganaá'.

¹⁹ Gár heé wa hariim ma qwaareesara', nee muu mu barqaantusara', tam slukuma ma /ayaara', asma slukuma heé gár ganaa' ga tsatsahhaám gun iimigiwísh, nee hariimár heé ganaá' gan qwaarés.

²⁰ Muruú ganaá' kilós na ló'wa harmagahhaak kuwa tleehhi as kahhó' tawa hota' baraá yaamaá AAKOÓ MUNGÚ, Munguúhúng ni haniisi.

²¹ «Qoomár kitángw ilahhooa bura tlehhé' as AAKOÓ MUNGÚ Munguúhúng, uhmoó ta sluufmiisi oo slaqsoó munguú Ashera mu tleehhara' bihhaá kitangwduú ilahhooa.

²² Nee tlaa/a ma sihhtisaara' as munguaá hatlá' kiwa sluufmisa', kudá AAKOÓ Munguúhúng i waki.»