DABE 15 - Biblía Axweesantá Hhohho' ar Mungú 2004

Kurkú faanqw oo Sabaáto

¹ «Umuú kurkú faanqwe alhhe'eesaywós bira xáy, muu sleémeero kudá' kuungá' ta iinusa' un gurtleerá'.

² Adoorí na /iisaak: Umuú heewo barnaxes hhiyaawós gu iinuus, iinaadá' ngi gurtlay, laqaá tam mingiwa iiár iinaro, asma AAKOÓ MUNGÚ inósuú kilá' iinadá' gaa slaá' gurtleemuuwo.

³ Ala múk xoordaá hatlá' iinusaak, ala inaá hhaeehúng sleémeero mawaak.

⁴ «AAKOÓ MUNGÚ, Munguúhúng kuungá' nu ló'wa tsuuq baraá yaamuudá' ni kuungá' i haniisi as kiwa ala'. Slám baraá tla/angwhunge heé narkuút i kaahh tumu wák,

⁵ barnaxes kuungá' aga dír AAKOÓ MUNGÚ, Munguúhúngí iialooesé' nee hara'ayaarí laarí ni dirhúng i kah bara ló'wa harmagahhé' kawa ota'.

⁶ Qoomár bar AAKOÓ MUNGÚ, Munguúhúng kuungá' naa tsuúq ar adoodá' aáng ngira geerií oó', kuungá' muruú yaariír un kirkitisá', ala kuungá' gár dír muko ta kirka' i káhh. Kuungá' sleeme xoordaá hatlá' in sa waawuti'iindá' ala xoorduuká' kuungá' nu sawaawuti'ina'aaká'.

⁷ «Barnaxes heé narkutmo i deer baraá tla/ángw hhaeehunge, baraá gixsár wake, baraá yaamuudá' AAKOÓ MUNGÚ Munguúhúng ni kuungií haniisi, ma qahuuse tleehhitaara' laqaá ma /akuuse tleehhitaara' dír hhaeehunge.

⁸ Ala kuungá' inooín na ló'wa /iisaak nee ki kirkitisá' ar muunuú /awaák harqoomoó i slaiya'.

⁹ Ti ló'wa harmagahhe', inslawoó tlákw munduwa áy, tari oa', ‹Kurkú faanqw, kurkú iinuuse kawa gurtlawaan naa nakaá/.› Nee kuungá' hhaeehúng awa aleelemá' kiri siá' kirkitimisuwo, nee inooín niri dír AAKOÓ MUNGÚ i /aa/iyá' as kuungá', nee gaarí iri tlakweema tleehhít dirhunge.

¹⁰ Heé narkutmo tu/aak ar muunuú /awaák, bura tú/ ma qunuunu/aar, asma adoorí bara tlehhé', AAKOÓ MUNGÚ, Munguúhúng kuungá' nu tsuuq baraá gadiyeduuhúng sleémeero awa taqo tlehhita'a.

¹¹ Asma múk narkuute i baloó kahhiiká baraá yaamuwo, gawaá adoorihe, aníng kuungá' nun babaw, kuungá' masók hhaeehúng kudaá narkuute baraá yaamuuhunge in /iimisá' ar muunuú /awaák.

Lawaalmo adór kus hariím

¹² «Barnaxes hhiyaawók laqaá hho'oorók ar Ebrania bar kinga dirógí weeriís, uri sagadiyús kureeri lahhoó', ala bál kurkú faanqwe an gwét,

¹³ qoomár kuúng bura gwét, miwa dákw kaahaár ar tláy.

¹⁴ Tidá' AAKOÓ MUNGÚ kuúng ura tsuuqi qaweek adoodá' muunaáwók ira qwalaá/, baraá muruuwók oo de'engo nee balaangoge, nee baraá difaáiroge.

¹⁵ Tí inslawaak, asma aáng kuungá' a lawaale baraá yaamaá Misriro, nee AAKOÓ MUNGÚ, Munguúhúng kuungá' nuna baraadá' wa tuú/, an gár laarí aníng kuungá' nusa adoorí báw.

¹⁶ «Ala barnaxes kuúng ugwa báy, ‹Aníng dír do'oge a tlawaaká,› asma inós kuúng u slaa' as hotaá hho' ngiwa sláy,

¹⁷ naagáy daqaní ku húp ay dír afkú do', iiarós ka laqwtár mút gawaá peehhír afkú do', inós tari lawaalmoowók oo daqisleém. Sleeme tam lawaalo'o adoorír kilá' ti laq.

¹⁸ Kuúng ma siaar lawaalmoowók kuwa gwet, asma inós kuúng ugwa sagadiyuús kureeri lahhooe, gaarí a tlaqtá bu'utuú sagadiyusmoó ta buaain. Kuúng adoorí tleehheek, AAKOÓ MUNGÚ, Munguúwók u tsuuq baraá umuúqo gár ta tlehhita.

Muruú baris oo hikwa nee oo bee/aango

¹⁹ «AAKOÓ MUNGÚ, Munguúhúng awér hikwaahúng nira barisiyé' nee gwaandaawér bee/angwhúng ira barís ti hanise', aweerí mar gadiyuusara', nee gwaandaaweesíng ma se'eengw tlaaqara'.

²⁰ Umuuqo kurko kuúng nee múk do'oge fu'unaá makayká' in dír geeraá AAKOÓ MUNGÚ, Munguúhúng wa /agá' didá' AAKOÓ MUNGÚ aa tsawaár.

²¹ Ala barnaxes sleesíng ka garkár wa /aár, laqaá toqoori, laqaá taampa, ma ilahhooár wa gaasaar dír AAKOÓ MUNGÚ, Munguúwók.

²² Slér adór tisíng dír do'ók tiwa /ak. Múk taa al/utlín nee oo ta al/utlinkahe sleémeero sleesíng ngi /ayiye' adór tlaaqati, laqaá adór saargi ngir /aa/iya'.

²³ Ala tseereerós ma wahaar, na yaamií ku'uuseek adór ma'aáy wa ale.»