DABE 14 - Biblía Axweesantá Hhohho' ar Mungú 2004

Slooír tsuunqumis ar taa sií'

¹ «Kuungá' a na/aá AAKOÓ MUNGÚ, Munguúhúng. Miti iree/imaara', laqaá se'engwhúng mu deequtaara' hee barnaxes aa gwaá'.

² Asma kuungá' a múk hhohhó' oo AAKOÓ MUNGÚ, Munguúhúng. Kuungá' AAKOÓ MUNGÚ naa tsawaár as tawa mukós dír tla/ángw múk gawaá daanduú yaamu sleémeero.

Makaá hhohho' nee awa ta harmeetin

³ «Gár Mungú gu buhhtamis ma baloó /ayaara'.

⁴ Makaá ta /aga' a hikwa nee bee/aangw, nee aara,

⁵ nee saargi, nee saraámadé nee ba'asa, nee bubuti nee ba'asuú /awák nee wayshamó nee tsagni.

⁶ Nee umuú makiito'ór taa qo fuqeeni qasitii'i, nee ar /aarusa, an makaá ta fu'unaay /aga'.

⁷ Ala makiito'ór fuqeeniiwós tsareeká, laqaá bir /aaruská, makayká' mi /ayaara': Angamia, nee kwa/aangw, nee kwa/e/ani. Inooín tam i /aarusiaaká ala fuqeeni'ín naa qasiti'iiká, na har meetimaak.

⁸ Sleeme tam baynamo mu /ayaara', tam handá' fuqeeniiwós a tsare, inós i /aarusiiká. Inooín har meetimaak, Fu'unay'ín mi /ayaara' laqaá tu'uuín mi kwatitara'.

⁹ «Siyó sleémeero oo baraá ma'aay /ayaak, kudá' qafaá koóm nee kik'aaro.

¹⁰ Ala umuú gaa tidá' slaaf, ar baraá ma'aá hoot ar kik'a koomaaká nee qafoowo mi /ayaara'. Inooín ki waak dirhunge.

¹¹ «Tsir/o sleémeero ar hhohho' /ayaak.

¹² Ala tsir/oorí ma /ayaara': Gwareesi nee deelagaasi,

¹³ nee gid/awu, nee kuuraay, nee /awa/awi nee daa'aweemoowós sleémeero.

¹⁴ Daa'aweemo sleémeero awa xwaa'aro.

¹⁵ Sakweeli, nee hárkuuraay, nee kuruumbú, nee geenaawér umuúqo daa'awto.

¹⁶ Hárkonki, nee odómbaliilí, nee hárkonkír ur,

¹⁷ nee halé/, nee dingo, nee hooma/áy,

¹⁸ nee qunqaál, nee daa'awtá diingo sleémeero, nee daa'awtá hhuri, nee hhamparara'amó.

¹⁹ «Nee ba'ár nee daa'aweemoowós sleémeero mi /ayaara', dirhunge ki ló'wa waak.

²⁰ Ala muruú hhohhó' oo hhaampa'aá koóm /ayaak.

²¹ «Fu'unaá gár aa gwa' mi /ayaara', ala hoomoó baraá ayaahúng hoót inós ngi /ayi, laqaá weerisaak dirós i aleeró, asma kuungá' a múk hhohhó' dír AAKOÓ MUNGUHE, kuduú Munguúhúng. «Deelmoó leei laqaá oo bee/i mu humimara' baraá ilwaá aayoorós.

Dabér ilahhooár gár wák baraá muruú mibaango

²² «Ilahhooa sleémeero ar baraá qamuuhúng daáhh umuú kurko gár wák baraá muruú mibaango hanmisaak.

²³ Aluuwo daqaní ta tleerá' ay didá' AAKOÓ MUNGÚ, Munguúhúng aa tsawaár as kawa umuuwós ar ateeti, nee bar geeraawós i diriá', ilahhooár balaangw ka /agá', nee ar difaái, nee ar di/iywo, nee ar barsuú hikwahunge, nee oo bee/angwhunge, adoorí tleehhaak as tawa intsahhaada' AAKOÓ MUNGÚ, Munguúhúng, kuwa ilaiwawa/a' daqisleém.

²⁴ Ala barnaxes aai ki tleer, asma AAKOÓ MUNGÚ, Munguúhúng, dirós aa tsawaár as umuuwós, ka saaw ló'wa ale nee didár do'ók, nee kuungá' ilahhooár gár wák baraá muruú mibaango ar balangwhúng gagaararo a aleesleera'aaká, tidá' AAKOÓ MUNGÚ nura tsuúq, daqaní adoorí tleehhaak:

²⁵ Balangwhúng weerisaak, nee peésa ka hubá' ay didá' AAKOÓ MUNGÚ, Munguúhúng aa tsawaár,

²⁶ peésaadá' ka gár ar tlaxwá' ar kuungá' ta sla'a', fu'unaá slee, laqaá fu'unaá bee/i, laqaá difaái, laqaá difaaídá' aa ló'wa hamat, ta /ayiindá' nee ta qwalala/á' dír geeraá AAKOÓ MUNGÚ, Munguúhúng wa ale dinkwa nee mukók.

²⁷ «Múk tlahhoó Laáwi oo baraá tla/angwhúng i dirií' mu gunqareesara', asma inooín gár ta kon i káhh, laqaá gár i aaliya' i káhh dír tla/angwhunge.

²⁸ Nee umuú kurkú tame ilahhooár gár wák baraá muruú mibaango ar balangwhúng ka hanisá' sleémeero, nee ka batsá' baraá gixsaduhúng sleémeero.

²⁹ Muruuwí daqaní an oo múk tlahhoó Laáwi, asma inooín gár ta kon i káhh, laqaá aalír ta kon baraá tla/angwhunge i káhh, sleeme ar dahaaye nee panaay, nee /ameenár kwaeeli, tidá' hoot baraá gixsarhúng wa aleeró. Kuká' sleémeero ni hardihiye' as niwa /aymár aya' niri aaxiyá'. Adoorí tleehhaak, daqaní AAKOÓ MUNGÚ, Munguúhúng nu tsuuq baraá gadiyérhúng sleémeero ar taqo tlehhita'a dabaahunge.»