DABE 13 - Biblía Axweesantá Hhohho' ar Mungú 2004

¹ «Barnaxes aarusmo naa ti'iít tla/angwhunge, laqaá heé tlatitiím, nee oo laydaá tlehhiít, laqaá muruú waa/oo/amór dimbadimbé,

² nee layduudá' aa káh laqaá muruú waa/oo/amo bira tleehharuút, nee bar inós kuungá' naa báy, ‹Munguaá hatlá' eeharaak nee ki sagadiyuusá',› munguaá kuungá' ta xua'aaká,

³ axweesanoó aaruusér adór tí mu iiárií qaasara', laqaá heé adoorír tlatitiím mu iiárií qaasara'. Asma AAKOÓ MUNGÚ, Munguúhúng inooín gin ar gadiyuus as kuungá' nuwa iiari, as inós ngiwa xu'utír wa slai, áx kuungá' inós u ló'wa sla'á'a ar munerhúng sleémeero nee qeereemoohunge.

⁴ AAKOÓ MUNGÚ, Munguúhúng un eehadá', nee inós kilós un ilaiwawa/á' nee hara'ayaarós an otá', nee afoorós an iialooesá'. Inós un sagadiyusá', nee an dirósí naga'atá'.

⁵ Ala aaruuseedá' sleémeero nee mukduú tlata sleémeero un tsu/á', as lameemo nee al/ayma ngiwa axweesiyá' daanduú AAKOÓ MUNGÚ, Munguúhunge, kudá' kuungá' naa baraá yaamaá Misrír wa duux, nee naa baraá lawaali'iimár wa tuu/. Aaruuseedá' kuungá' nun qwaareemís baraá loohidá' AAKOÓ MUNGÚ, Munguúhúng naa kuungií hara'ayín kawa ota'. Adoorí an adoodá' tlakweema kir hingesa' baraá tla/angwhunge.

⁶ «Barnaxes hhiyaawók oo kilá', laqaá garmaawók, laqaá dasiirók, laqaá hareerók tidá' handá' ta ló'wa sla', laqaá mulqumoowók kudá' ta ló'wa sla', un mihaayín ar baraá naaqo, iwa ooin, ‹Qwaláng, munguaá hatlá' i sluufmisuú awaán.› Kudá' handá' kuungá' ta xu'uká, laqaá baabi'iihúng sleeme,

⁷ munguaá xoordaá hatlá' kudá' kuungá' naa harweeriye', laqaá munguaá xoordaá sawen dirhunge, iimír bartí wa tleemu ay bartaqá' baraá yaamuwo.

⁸ Heé adoorí mu baloó ya/amaar uwa mihaayin, laqaá kuwa iiárií qas, laqaá mu gurtlawaar, laqaá mu mawaar, laqaá mu lu/aar,

⁹ ala aqo un gasá', dakók i giirin qoomár bur gaamisá', daqaní múk hatlá' aluudá' ngi hari.

¹⁰ Tlaa/e tir tlaqute' ay dír i gwaai, asma inós i múk amoqwaaremiis dír AAKOÓ MUNGÚ, Munguúhúnge, kudá' kuungá' naa baraá lawaali'iimár yaamaá Misrír wa duux.

¹¹ Gawaá adoorihe, múk Israeli sleémeero kaangwí guri axaas, tari da'ayuut, nee tlakweemaá adór kuká' tleehharo tari baloó ki/iiká.

¹² «Barnaxes a hotá' baraá gixsaduukaá, AAKOÓ MUNGÚ, Munguúhúng naa kuungií haniís, nee kari axasé',

¹³ adór múk barawaslén baraá tla/angwhunge, yaamuuloouusér gixsarka ngira qwaareés, tawa kaahi, ‹Gusé', munguaá hatlá' i sluufmisuú awaán.› Kudá' handá' kuungá' iga geerií xui'iiká,

¹⁴ gimsé', gaarí ló'wa leelehhaak ar ilakaahara, nee yaahasaak nee barqo tsuwa ló' gár buhhtamis adór tí aa tleehharut tla/angwhunge.

¹⁵ Mukdá' adoorí gaa tleehh tsu/aak ar paánga baraá gixsadae. Inooín hhaamiisaak nee umuúqo gaaro tam hikwaaín sleeme.

¹⁶ Haasaánguú baraá gixsadá' burumburaak dír tsee/aá /awaak awa gixsa, gixsadá' ka da/á' ar asla dinkwa nee haasaángudae, tawa adór ilahhooár ádkoóm ar ta da/i dír AAKOÓ MUNGÚ, Munguúhúng. Gixsarí tari taango ay alhhe'eesay wasle, ka male /abesiiká tleehharo.

¹⁷ Umuú gaaro ar taa daá/ ma taatahhara' dabaahunge as kahhó' AAKOÓ MUNGÚ buhhtaawós kudá' xaraasla' ngiwa may, nee kuungá' nuwa gurtlay. Nee ar gurtleemuwose kuungá' nuwa tlahhasi, ar adoodá' ngira lo'ór wa /aáy dír baabi'iihúng,

¹⁸ inós adoorí gan tleehh barnaxes kuungá' afór AAKOÓ MUNGÚ, Munguúhúng aga iialooeesé', hara'ayaarós sleémeero kari oté', tí laarí ni kuungá' babaw nee adór qoom bara tlehhé' dír geeraá AAKOÓ MUNGÚ, Munguúhunge.»