DABE 12 - Biblía Axweesantá Hhohho' ar Mungú 2004

Mungú dír wák ar inós kuwa sluufmiisi ngiwa tsawaár

¹ «Gaarí taa gooín an kaahi nee hara'aya, tidá' ta boo/esa' ar ilakaahara baraá yaamuudá' AAKOÓ MUNGÚ, Munguú baabi'iihúng ni kuungií haniisi kiwa ala' deelo sleémeero.

² Kuungá' wa/ameedá' muu munguaá hatlá' ngiwa sluufmiisi hhaamiisaak, gawaá tlom'aá tlede, nee gawaá gongoamawo, nee dír umuúqo gamuú xa'anoó loo/o naa/e.

³ Kiteeri'ín kudaá ilahhooa fee/aak, nee tlaa/eedá' taa sihhtimís as kiwa sluufmiisi parhhamisaak. Slaqsi'ii'ín kudaá Ashera hhaamiisaak ar asla, nee slaqsi'ii'ín kudá' taa dakuút, umer'ín amór saáwí hhaamiisaak.

⁴ «Kuungá' AAKOÓ MUNGÚ Munguúhúng, mu adoodár inooínár sluufmisara'.

⁵ Ala tlawé' ay didá' AAKOÓ MUNGÚ, Munguúhúng i tsawaari baraá tla/ángw tlahhi'i sleémeero, as umuuwós kuwa xirfayeesa', nee dír hotaawós kawa tlehha', amoodá' an amór kuungá' ta keera'.

⁶ Nee sleeme didae kuungá' ilahhooár da/a ti hanise', nee ilahhooarhúng ar murú ta tsu/i, nee ilahhooár gár wák baraá muruú mibaango nee qeemuhunge, nee ilahhooár al'axweesani, nee ilahhooár sla'aari, tidár duxúng sla'aari, ar barsuú hikwa nee oo bee/angwhunge.

⁷ Amoodae kuungá' an /ayiindá' dír geeraá AAKOÓ MUNGÚ, Munguúhúng wa ale, tari qwalala/á', kuungá' dinkwa nee múk marayhunge, as diihhooadá' AAKOÓ MUNGÚ, Munguúhúng, nura tsuúq.

⁸ «Adoorí hám ta tlehhita' ma tleehhara', umuú heewo adoorós ar i slai.

⁹ Asma aga dati'iiká didá' tawa hungu/usa, nee baraá yaamuudá' ta ala', kudá' AAKOÓ MUNGÚ, Munguúhúng, nuy haniisi.

¹⁰ Ala qoomár yaaér Yordani barnaxes aga waarahhé', nee tari hotá' baraá yaamaá AAKOÓ MUNGÚ, Munguúhúng, i kuungá' i haniisi, nee qoomár burna hungu/uús, kuungá' mutunduwa dawitamiís nee wakuuserhúng sleémeero, tidá' kuungá' naa harwet, as kuungá' tawa hota' ar amohhooa,

¹¹ naagáy didá' AAKOÓ MUNGÚ, Munguúhúng, i tsawaari, asma umuuwós iwa didá' wa hooti, kuungá' tidá' sleémeero aníng nu baw ka didií hubá', ilahhooarhúng ar da/a, nee ilahhooarhúng ar muruú ta tsu/i, nee ilahhooár gár wák baraá muruú mibaango, nee qeemu nee ilahhooár al'axweesani tidá' handá' taa slaé' AAKOÓ MUNGÚ i hanisaro.

¹² Amoodae kuungá' an qwalala/á' dír geeraá AAKOÓ MUNGÚ, Munguúhúng wa aleeró. Kuungá' nee na/iihúng awa daaqaay nee awa dasuuwo, nee lawaalerhúng ar hhawaate nee ar /ameenaaro nee múk tlahhoo Laáwi, kudá' nee kuungá' alhootá'. Asma inooín dír i aaliya' ngi kon'aaká baraá tla/angwhunge.

¹³ Ti harmagahhe', ilahhooár da/a ma tawo duxuumara' umuú dír taaqo sleeri'i,

¹⁴ ala aqo har didá' AAKOÓ MUNGÚ aa tsawaár baraá tlahhoó wák wa ale baraá tlahhi'iihunge, diirí an didá' ta ilahhooár dá/tí hanisá', nee an didá' muruuduú hatlá' sleémeero kuwa tlehhita', kudá' naa kuungá' báw.

¹⁵ «Ala kuungá' tundu ila/anká hikwaahúng kiwa tsu/a' nee fu'unay'ín kiwa /aga', dír umuúqo kuungá' ta hota', adoodá' AAKOÓ MUNGÚ, Munguúhúng, nura tsuúq, adoodá' tsuuqa kira ilaoté' dír AAKOÓ MUNGUHE. Muu sleémeero kudá' hhohhó', laqaá oo ta harmeetina, ta /ayin adoodá' fu'unaá tlaaqati, laqaá awa saargi kir /aa/ayi.

¹⁶ Kár ala tseerér makayká' ma wahaamara', tseere aqo an yaamií ku'usá' adór ma'aay.

¹⁷ Muruuwí mu /ayaara' dír taqo hota'a, adór ilahhooarhúng ar gár wák baraá muruú mibaango ar balangwhúng, nee difaáirhúng, laqaá di/tahúng, laqaá barsuú hikwaahúng, laqaá oo bee/angwhúng, laqaá ilahhooarhúng ar al'axweesani, laqaá ilahhooarhúng ar sla'aari ar ta hanisa'

¹⁸ Ala kuungá' muruuwí sleémeero dír kuwa /aga' a dír geeraá AAKOÓ MUNGÚ, Munguúhúng, didá' inós i tsawaari. Kuungá' ta al/ayiindá' nee daaqayhúng nee dasuuhúng, sagadiyuuserhúng, nee lawaalerhúng ar hhawaate nee ar /ameenaaro, nee múk tlahhoó Laáwi kudá' baraá gixsaduuhúng wa hoót.

¹⁹ Ala tí inslawaak qooma sleémeero ar tawa hota' baraá yaamuuhúng kukae, hariímár múk Laáwi ma gunqareesara'.

²⁰ «Qoomár AAKOÓ MUNGÚ, Munguúhúng, bar digimuú yaamuuhúng nguwa doogi, adoodá' ngura al'axweés, kuungá' tari oé', ‹Fu'unaay i /ayaán,› asma kiwa sla'a', i qoón har qoomoó ta sla'a' kuwa /aga' ay dír ti axa'.

²¹ Barnaxes didá' AAKOÓ MUNGÚ, Munguúhúng i tsawaari, dirhunge ka saaw, nee kuungá' hikwaahúng, laqaá bee/angwhúng kudá' AAKOÓ MUNGÚ nura tsuúq, iga tsu/é', adoodá' ngira hara'ayiím, i ya/aán fu'unaydá' kiwa /aga' umuúqo dír ti diria'a baraá yaamuhunge.

²² Adór fu'unaá tlaaqati, laqaá awa saargi, kir /aa/aga', kuká' sleeme i adoodár /agá', tam hee ku hhoohhoó' laqaá bar kusameetín.

²³ Ala ti ló'wa harmagahhe', ló' tseere ma baloó /ayaara', asma tseere a slafiingw, gimsé' slafiingw mu baloó /ayaara' dinkwa nee fu'unaay.

²⁴ Tseereerí ma /ayaara', ala yaamií ku'usaak adór ma'áy wa ale.

²⁵ Tseere ma /ayaara', asma bar aga /agi'iiká, adór hhoo' aga tlehhé' dír geeraá AAKOÓ Munguhe, nee diihhooa a sleerá', kuungá' nee na/iihunge.

²⁶ Ala qeemuudá' hhohhó', kudá' ta hanmisa' nee ilahhooadár al'axweesanto, ki hubá' didá' AAKOÓ MUNGÚ aa tsawaár.

²⁷ Kuungá' ilahhooár da/a an hanisá', fu'unaay nee tseereero gawaá kitangwduú ilahhooár AAKOÓ MUNGÚ, Munguúhúng kawa hanmaamisa'. Tseerér ilahhooár muruú ta tsu/i an tsipipi'isá' gawaá kitangwduú ilahhooár AAKOÓ MUNGÚ, Munguúhúng, ala i ya/aán kuungá' fu'unaydá' kiwa /aga'.

²⁸ Ti ló'wa harmagahhe' axweesantí naa bawi iialooeesé', as kuungá' diihhooa kawa sleera' dinkwa nee na/iihúng awa aluúwaá hardahá' ay alhhe'eesay wasle, asma kuungá' adoorihe adoodá' hhoo' aga tlehhé' dír geeraá AAKOÓ MUNGÚ, Munguúhunge.

Gurbua daanduú sluufmisuú munguaá hatlá'

²⁹ «Qoomár AAKOÓ MUNGÚ, Munguúhúng xoorduudá' birnga hhaamiís geeraahúng wa ale, kudá' kuungá' ta gusa', tari baraá yaamuuín wa hotá'.

³⁰ Tí harmagahhaak, ma tawo dahaara' baraá tsaaxweeli, alaá kiwa gusé', mi eeharaara'. Miti dawitimisara' as kawa xu'utír wa sla'a' daanduú mungui'ine tawa kata', ‹Xoorduuká' adór munguii'ín ngir sluufmisiya' as atén adoodá' ngiwa tleehhaan sleeme.›

³¹ Kuungá' AAKOÓ MUNGÚ, Munguúhúng mu adoorír firirimaara', asma umuú gár AAKOÓ MUNGÚ aa aahhi inooín ngina dír munguii'íní tlehhiitiyé'. Tam inooín daaqay'ín nee dasuuine ngina da/a/ané' baraá asla as tawa ilahhooár da/a/aangw dír munguii'ine.

³² «Umuú gár naa kuungá' bawi ti harmagahhe' kawa tlehha' ar ilakaahara, ala ma gaa doogara', laqaá ma /aaresara' baraá hara'ayaarihe.»