DABE 11 - Biblía Axweesantá Hhohho' ar Mungú 2004

Aleesleemuú AAKOÓ MUNGÚ

¹ «Gawaá adoorihe AAKOÓ MUNGÚ, Munguúhúng sla'aak, nee alqaduuwós oohaak umuú deelooro, nee hara'ayarose harmagahhaak, nee kaahirose nee dabeerose.

² Kaangwí ló'wa aldakutaak, asma na/iihúng kaangwí ngu xuiaaká, laqaá muxtár Mungú nga ari'iiká, nee aleesleemuwose nee /uuruuwose,

³ nee layuudá' nee waa/oo/amoodae tidá' aa baraá yaamaá Misrír wa tleéhh dír waawutmo Farao oo Misri nee yaamuuwós sleémeero.

⁴ Adoodá' inslawaak aa tleéhh dír slaqwaruusér Misri, farsuuín nee garduuín kudaá slaqwara, nee adoodá' slaqwaruuser'ín tidá' kuungá' naa eehat ngira hhaamiís baraá tlawtá Shamu, adór AAKOÓ MUNGÚ ngira hhaamiís, tam ay laarí.

⁵ Nee sleeme inslawaak adoodá' AAKOÓ MUNGÚ nay tleéhh qoomaadá' tawa baraá xaanxáy kahha', qoomaadá' tawa hardati'iiká,

⁶ nee muruudá' sleémeero aa tleéhh dír Datani nee Abiramu, daaqoó Eliabu, garmoó Reubeni, adoodá' yaamu nira afa nguri awaatliyé' dír geeraá múk Israeli sleémeero wa ale, nee mukdá' sleémeero nguri gu/iyé', nee heemaduuine, nee hikwaaín, nee sagadiyuuser'ín sleémeero.

⁷ Asma ilahunge tlehhmi'iikaá uren sleémeero awa waa/oo/amo awa adór kuká' AAKOÓ MUNGÚ aa tleéhh iga aandé'.

Tsuuqaá yaamaá al'axweesani

⁸ «Hara'ayduuká' sleémeero laarí nuy hara'ayiim iialooeesaak, as daqaní /uuru kuwa sleera' oo tawa data' baraá yaamuudá' ta keera' as kiwa ala'.

⁹ Daqaní slafíngw tleér u sleerá' baraá yaamaá hatsá' dihhooár ilwa nee dane, yaamuudá' aáng AAKOÓ MUNGÚ aa lo'ór wa /aáy ngiwa haniisi dír baabi'iihúng nee xwaylar'ín.

¹⁰ Asma yaamuudá' ti hotaá eera' a adór yaamaá Misriroká, kudá' ta dahha', kudá' handá' balaangw una dahaasiindé', nee ma'aay kiri wa/amisé' ar ya'aahúng adór asalmoó naanú.

¹¹ Ala yaamaá tay hotaá eera' a yaamaá tlom'i nee xatso, ma'aay baraá yaamuudae adór kir slay a tluwoó dooraá daáhh.

¹² Yaamuudá' an yaamaá AAKOÓ MUNGÚ, Munguúhúng i amohhe'eemiisi. Umuú daqto gin ga/áy, iimír iimu/úngw kuru ay tam alhhe'eesoó kuru.

¹³ «Naagáy kuungá' hara'ayduueé' kuká' laarí ni hanmiis bira iialooesé', nee AAKOÓ MUNGÚ, Munguúhúng bura slaé', nee bura sagadiyusé' ar munerhúng sleémeero, nee qeereemoohúng sleémeero.

¹⁴ Kuungá' bar adoorí aga tlehhé', daqaní inós tluwaay ngu haniis baraá yaamuuhúng qoomaadá' hariima, tluwoó saxi, nee tluwoó buhaare, kuungá' balangwhúng kuri bu'uundá', nee difaái nee di/tahunge.

¹⁵ Inós gitso ngi duux baraá qamuhunge as hikwaahúng, kuungá' tari /ayiindá', tari axá'.

¹⁶ Ti ló'wa harmagahhe' munerhúng makawa al/aáy, nee tari warqeerá' munguaá hatlá' kiri sagadiyusá' nee kiri sluufmisuú eerá'.

¹⁷ Asma adoosíng bara tlehhé', AAKOÓ MUNGÚ buhhtaawo nuri i daa/atúy, aluuwo doori giri tseek tluwaay guri ilaa/, nee yaamu balaangw ngway hamareesiaaká. Kuungá' tari hhaandá' baraá yaamaá hhoohhoo', kudá' AAKOÓ MUNGÚ naa haniís.

¹⁸ «Axweesantí baraá munerhúng ti qase', nee baraá qeereemoohúng. /Aymi'iiká' tseegaak gawaá dabaahúng i ale, adór laya, nee ki dahasá' gawaá gitsee/erhúng, as tawa gár kuungá' nu inslawtamis.

¹⁹ Na/iihúng /aymi'iikae intsaahhatamisaak qoomár bar marií wa iwiwitá', bar hi'iimitá', nee qoomár bar qatuú eerá', nee qoomár qatuuwo bar tlatleerá'.

²⁰ Gooimaak gawaá nahhtá marayhúng, nee gooimaak gawaá afér marayhúng,

²¹ as kuungá' nee na/iihunge hotaá tleerá' kiwa sleera' baraá yaamaá AAKOÓ MUNGÚ, Munguúhúng aa lo'ór wa /aáy ngiwa haniisi dír baabi'iihúng, deelo sleémeero ar doori iwa hootiia.

²² «Kuungá' ti harmagahhe', hara'ayar'eé' sleémeero ar naa kuungií hara'ayiím kawa ota' ar ilakaahara. AAKOÓ MUNGÚ, Munguúhúng sla'aak, nee adoodá' inós i kaahi sleémeero kawa ota', nee tawa alhota' nee inós.

²³ Daqaní AAKOÓ MUNGÚ, xoordu sleémeero gi geeraahúng wa guus, kuungá' aalír xoorduudá' /uureemaá koomá' ta kuungae kari hayota'.

²⁴ Umuú dír ta adata' ya'ahunge a yaamuuhúng, iimu/úngw digimuú yaamuuhúng a iimír xaanxáy wa tleemu bihhaá basko, tay bihhaá tloomár Lebanoni bihhaá /iiko, iimír yaaér Eufrate wa tleemu bihhaá da/aawe, ay Tlawtá Tla/aangw bihhaá /uwawo.

²⁵ Heé kuungá' nu tlampa'aás i kaahh tumu wák. Umuú dír ta keera'a baraá yaamuwo AAKOÓ MUNGÚ, Munguúhúng muu gu dae tsaat, adoodá' inós ngira oó'.

²⁶ «Ti ló'wa harmagahhe', aníng laarír kilae tsuuqa nee lo'o ngi qaás dír geeraahúng.

²⁷ Tsuuqa a kuká': Barnaxes hara'ayár AAKOÓ MUNGÚ, Munguúhúng tí laarí nu babaw aga iialooesé', tsuuqa i sleerá'.

²⁸ Kuungá' tundu lu'us bar hara'ayár AAKOÓ MUNGÚ, Munguúhúng aga iialooesi'iiká, nee loohidá' inós naa ooi, tari munguaá hatlá' sluufmisuú eerá', kudá' kuungá' ta xua'aaká,

²⁹ AAKOÓ MUNGÚ barnaxes naa hardahaás baraá yaamuudá' ta aalír eera', tsuuqa kiri ilahanisá' gawaá tloomár Gerisimu nee lu'umis kuri ilahanisá' gawaá tloomár Ebali wa ale.

³⁰ Tlom'iiká' i gayuú yaaér Yordani, bihhaá /uwa awa loohidá' aa da/aá xu', baraá yaamaá múk Kana'ani kuduú yaamaá Arabár hoót, kudá' nee yaamaá Gilgali ti ga/aawá'.

³¹ Kuungá' yaaér Yordani an waarahhá' tari datá' yaamuudá' AAKOÓ MUNGÚ, Munguúhúng naa haniís. Naagáy kuungá' yaamuudá' kiri alá' tari baraadá' wa hotá'.

³² Ti ló'wa harmagahhe' kaahi nee hara'ayaro sleémeero boo/esa' ar ilakaahara, nee tidá' aa oó' handá' aníng laarí nga dirhúng i qaás.»