DABE 10 - Biblía Axweesantá Hhohho' ar Mungú 2004

Mose hara'aya gaa malé ilaaóh

¹ «Naagáy AAKOÓ MUNGÚ aníng iri báy, ‹Tlaa/aá tsár awa parereehhayen awa adór kudaá geera hhasleek, nee sandakmoó tlaa/eedá' parereehhayen kway bats tleehheek. Daqaní ni hardát amor'eé', gawaakaá tlooma.

² Aníng /aymi'iidá' gawaá tlaa/eedá' parereehhayen awa geerá, kudá' kuúng taa giqeér i gooiím, daqaní tlaa/eedá' parereehhayen ki báts baraá sandakmo.›

³ «Naagáy sandakmo nguri tleéhh ar xa'anoó masqaryaandi, nee tlaa/aá parereehhayen awa tsár awa adór kudaá geera. Gawaá adoorihe tlaa/eedá' parereehhayen ngiri gawaá dabaaeé' óh, ngiri ar tsa/ám ay gawaá tlooma.

⁴ AAKOÓ MUNGÚ axweesanoó adór kuduú geera guri gawaá tlaa/eedá' parereehhayenií gooín, hara'aydudá' mibaangw, kudá' aa káh bál iwa gawaá tloomár wa axweés, baraá tla/ángw asla. Aluuwo AAKOÓ MUNGÚ tlaa/eedá' parereehhayen ngiri haniís.

⁵ Niri alií warqáw niri aweér gawaá tloomaro, nee adoodá' AAKOÓ MUNGÚ ngira oó', tlaa/eedá' parereehhayen ngiri qaás baraá guruú sandakmoodá' naa tleéhh, adoodá' AAKOÓ MUNGÚ ngira hara'ayín.»

⁶ Múk Israeli aaii'ín gina tseék iimír hhaleeraá múk Ya'akani wa tleemu ay Mosera. Diirí kawa áy Aroni iri gwaá' kuri foól. Garmaawós Eleasari kuri kitaangós wa qaás, tawa kahaamusmoó Mungú.

⁷ Tawa diirí wa tláy, tari kumiít ay Gudgoda, nee tari Gudgodár wa tláy ay Yotbata, yaamaá ló'wa duxér koomá' ar ma'aá yaariir.

⁸ Qoomaarihe AAKOÓ MUNGÚ múk tlahhoó Laáwi guri tsawaár as tawa múk sandakmooduú alqadór AAKOÓ MUNGÚ gu loohiís, nee tawa gadiyuusi dír geeraá AAKOÓ MUNGÚ wa ale, nee muu kuwa tsuuqadá' i hanmiisi ar umuuwós tam ay laarí.

⁹ Gawaá adoorihe, múk tlahhoó Laáwi yaamaá ta aali i kahhiyá' dinkwa nee hhaeeín, inooín gár ta slay a ilaiwa/amér tawa kaahamuusér Mungú, adoodá' AAKOÓ MUNGÚ, Munguúhúng ngira al'axweés.

¹⁰ «Aníng ana gawaá tloomár wa hoót deelo mibeeri tsiyáhh xweera nee tlaatla/aango adoodá' aáng geeraawo naa tleéhh. AAKOÓ MUNGÚ wa'aá hatlae ina male iiárií qaás, nee iri ya/án as munduwa hhaamiís.

¹¹ Naagáy iri báy, ‹Tláw, muu geerahareek baraá aaiiwo, as tawa dahi baraá yaamuudá' naa lo'ór wa /aáy ngiwa dír baabi'ii'ín i haniis.›

Gár Mungú i slai

¹² «Hám daxta kuungá' múk Israeli, AAKOÓ MUNGÚ, Munguúhúng gár i slai a milá dirhunge? Aqo har AAKOÓ MUNGÚ Munguúhúng un ilaiwawa/á', nee lohduuwós sleémeero kudá' i slai kiwa eehada', nee kuwa sla'a', nee AAKOÓ MUNGÚ, Munguúhúng kuwa sagadiyusa' ar munerhúng sleémeero, nee qeereemohúng sleémeero,

¹³ nee hara'ayduuwós kiwa ota' nee dabér AAKOÓ MUNGÚ, Munguúhúng tidá' laarí nuwa hara'ayiim, as kuungá' diihhooa kawa sleera'.

¹⁴ Ga/aawaak, doori tam dooraá doori a daqaari'iimár AAKOÓ MUNGÚ, Munguúhúng, yaamu nee muruudá' sleémeero baraadá' i diriia a kós.

¹⁵ AAKOÓ MUNGÚ slám baabi'iirén aáng gina ló'wa slaá', nee kuungaá xwaylar'ín nuri tsawaár, kitángw múk hatlá' sleémeerowo, an adoodá' tam ay laarí.

¹⁶ Gawaá adoorihe munerhúng hheehhe'eesaak nee ma ki/aara' saga gawduuwo.

¹⁷ Asma AAKOÓ MUNGÚ, Munguúhúng inós an Munguú munguaá hatlá' gi baál, nee inós an Aakoó bariise. Inós an Munguú úr nee oo /uuruú koóm nee oo dae tlaáq, inós i barqaantír konká laqaá i slukumár /ayiiká.

¹⁸ Inós gan'amu guna tlehhiít dír na/aá panaay nee kwaeeli, inós sleeme heé dahaaymo gun slaa', nee guri muruú /ayma nee tsitáy hanmiis.

¹⁹ Gimsé', daxta dahaaye sla'aak, asma aáng kuungá' sleeme a dahaaye baraá yaamaá Misriro.

²⁰ AAKOÓ MUNGÚ, Munguúhúng ilaiwaa/aak, inós sagadiyusaak, ti alkoomakonde' nee inós, nee lo'o ka /agá' ar umuuwós.

²¹ Inós an xirfuuhúng, an Munguúhúng kudá' naa muruuwí urén i tleehh, nee oo waa/oo/amo kudá' taa aandé' ilahunge.

²² Baabi'iihúng qoomár niwa baraá yaamaá Misrír i tlayé', inooín an muu mibeeri faanqw kilós, ala hám daxta AAKOÓ MUNGÚ, Munguúhúng naa tlahhás adór tsatse/uú gawaá doori.»