DABE 1 - Biblía Axweesantá Hhohho' ar Mungú 2004

Axweesanoó geera

¹ Axweesantá taa gooín baraá kitaábuuwí a axweesantadá' Mose aa káh dír múk Israeli sleémeero, qoomár inooín tawa baraá darmuú bihhaá da/aáw oo yaaér Yordani. Inooín tawa baraá xatstá Yordani dír isaapoó Sufu, tla/ángw gixsár Parani nee gixsár Tofeli, nee Labani, nee Haseroti nee Disahabu.

² Diirí saweemaawo a har afiqoomár hi'iinór deelo mibaá nee wak, amór tloomár Horebu wa tleemu ay Kadesh-barnea, bara loohír tloomár Seirírárár ót.

³ Slahhángw mibaá nee wak tawa wak, oo kurkú mibeeri tsiyáhh alaá tawa yaamaá Misrír wa ti'iít, Mose umuúqo gaaro ar AAKOÓ MUNGÚ aa dirós i hara'ayín, gana dír múkwí oó'.

⁴ Adoorí gana tleéhh alaá AAKOÓ MUNGÚ waawutmo Sihoni oo xoorór Amori nguwa baál, kudá' gixsár Heshboni gaa hoot, nee waawutmo Ogu oo Bashani, kudá' gixsár Ashtaroti gaa hoot nee Edrei.

⁵ Mose muu guna hara'ayár Mungú i alki/iít qoomár tawa gayuú hatlá' oo yaaér Yordanír i dirii'i. Muu guri báy,

⁶ «Qoomár tawa dír tloomár Sinaír i diriaan, AAKOÓ MUNGÚ, Munguúrén, atén tina báy, ‹Qoomár bu'uut aga hoté' bihhaá tloomarihe.

⁷ Hám daxta xafaay fee/aak, aaiwo geeray kumiitaak. Tlawsé', baraá yaamaá tlom'aá koomá' awa xoorór Amori, nee yaamuudaá inslaawaay, kudaá baraá yaamaá Araba, baraá tlom'iidá' nee baraá xatsoodaá amór Negebu, nee yaamuudaá afaá tlawi, ta tleerá' ay yaamaá Kana'ani, nee yaamaá Lebanoni ay yaaeedá' ur ar Eufrate.

⁸ Ga/aawaak, yaamuuká' sleémeero nga geeraahúng i qaás. Gimsé', yaamuuká' aalaak, anuú AAKOÓ MUNGÚ lo'o aga /aáy yaamuuká' ngiwa haniis dír baabi'iihúng, Abrahamu, nee Isaka, nee Yakobo, nee xwaylar'ine.› »

Mose har'ohuuse ngiwa tsawaár

⁹ Mose muu guna báy, «Qoomár tawa gawaá tloomár Sinairí kahhaan, aníng kuungá' nuna báw, ‹Gadiyér aníng kuungá' nuwa geeraharahaar, umuú gaaro ka gawit dír aníng kilooeene.

¹⁰ AAKOÓ MUNGÚ, Munguúhúng, kuungá' naa tlahhás, hám laarí tundu ló'wa yaariír adór tsatse/uú gawaá doori.

¹¹ AAKOÓ MUNGÚ, Munguú baabi'iihúng kuungá' nu ló'wa tlahhasi ay sagáwa kumér yaariir, adoorí hám tay diria' ba/a, nee nu tsuuqi adoodá' aáng ngira al'axweés.

¹² Xáy, ala adór aníng kilooeé' gilaahúng har'ohiingo ngir aleeslaw a adoomá?

¹³ Gimsé', baraá umuú tlahhaywo muu tsaawaraak oo sagalooár koóm, nee oo daharuú koóm, nee oo xu'utír koóm as nguwa tsawaar nguri geeraharuuserhúng wa qaás.›

¹⁴ Kuungá' aníng iri adoorír mu/aywatsé', ‹Gár taa ó' i qoón.›

¹⁵ Gawaá adoorihe aníng geeraharuuse tidá' sageeloen nee fuqureeraá koom, nee mukdá' xu'utír koóm nguri qaás, kudá' kuungá' naa tsawdé' baraá tla/ángw tlahhi'iihunge, nguri qaás geeraharuuserhúng wa ale. Bahh'ale ngiri qaás as tawa geeraharuusér daqooró kume, nee múk tsiire, nee múk mibeeraá kooán, nee ar múk mibaangw. Muu bahh'ale una qaás as tawa geeraharuusér umuú tlahhaay.

¹⁶ «Qoomaadae har'ohuuserhúng ana kaangwí báw, ‹Qaa/oó mukhúng iiárií qamimaak, kwasleemár mukhúng tlaaqaak ar adór ganaa', nee ar hoomaadá' baraá ayaahúng hoota.

¹⁷ Sakwasleema ma barqaantír ar tlehhiitara', muu iiárií qamimaak ar barqaanti wasle, hee tam gaalá. Nee hee munduwa dae tsaát, asma kuungá' kwasleema an tlehhitá' kitángw Mungú wa ale. Ala barnaxes kwasleemár gawit aga sleeré', dir'eénií huwaare' as ngiwa iiárií qaas.›

¹⁸ Qoomaadár kilae nuna ádbáw mura' sleémeero kudá' hariím dirhunge tleehhamooro.»

Dee/anutár múk Israeli daanduú yaamaá alqadooro

¹⁹ «Naagáy adoodá' AAKOÓ MUNGÚ, Munguúrén ngira oó', aaiirén ina iimu/uumaán iimír tloomár Horebúr wa tleemu, tari waarahhaán ar baraá xaanxaydá' úr kudá' dae tlaaq, kuungá' u xuá', tari waarahhaán ar loohidár yaamaá tlom'i awa múk Amori. Tawa hardahaán didá' ta bay, Kadesh-barnea,

²⁰ aníng kuungá' nuri báw, ‹Hám daxta aga hardaté' baraá yaamaá tlom'i awa múk Amori, kudá' AAKOÓ MUNGÚ, Munguúrén naa atén i haniís.

²¹ Ga/aawaak, AAKOÓ MUNGÚ, Munguúhúng, yaamuuká' ngaa qaás dír geeraahúng i aleeró. Gimsé' yaamu oohaak, aalaak adoodá' AAKOÓ MUNGÚ, Munguú baabi'iihúng ngira oó'. Mada'ayumiitaara' laqaá ma amoqwaqwadiimara'.›

²² «Ala kuungá' sleémeero aníng iri beeré', ‹Muu u ya/awaán oo geeraarén wa tláw, oo yaamu ngi tsawtawuús, daqaní kaangw ngu ooiye', adór tar dahaan nee áx gixsaduuín a adoomá!›

²³ «Aníng adoorí ngiri tsaáhh, naxés i qoón, múk mibaá nee tsár nguri tsawaár, umuúqo tlahhaywo heé wák.

²⁴ Mukdá' tari tláy baraá yaamuudaá tlom'i, tari hardáh baraá xatstá Eshkoli, ngiri tsawtsawuusiyé'.

²⁵ Niwa ki/iyé' mamaá baraá yaamuudá' ngiri huwiyé', nee kángw yaamuudá' nguri dirénií ooiyé' tawa kaahi, ‹Yaamuudá' AAKOÓ MUNGÚ, Munguúrén ni aténií haniisár wa slai, ki ló'wa hhoohhoo'.›

²⁶ «Ala kuungá' adoodá' AAKOÓ MUNGÚ, Munguúhúng naa báy aga eehadi'iiká, as dahmaá baraá yaamuudá' kiwa sié'.

²⁷ Kuungá' ana baraá heemaduhúng wa qununu/é', tawa kata', AAKOÓ MUNGÚ, atén taa aáhh, an gár tisa baraá yaamaá Misrír wa duúx. Gana slaá' tiwa haniisi gawaá dabaá múk Amori as tiwa hhaamisi.

²⁸ Ahaá waáy, gár tas baraá yaamuudá' kawaan? Asma gur'eerén ma'aay ngaa dalaa/iyé', as kangwdá' mukdá' naa atén báy, tawa kaahi, múk amoodá' ku ló'wa dirén, slám ku tlét ta atene, nee gixsaduuín ki ló'wa diren nee koo/i ka ló'wa tlerantleer ay gawaá doori. Slám ta kaahi, mukwí dirén a kuduú xwaylár Anaki una araán.

²⁹ «Ala aníng ngiri báw, ‹Kuungá' mada'ayumiitaara' laqaá ma amoqwaqwadimara' as mukdá'.›

³⁰ AAKOÓ MUNGÚ, Munguúhúng kudá' kuungá' nu geerahaar inós kuungá' nu aleeslaaqw adoodá' aáng aa dír geeraahúng wa tleéhh baraá yaamaá Misriro, nee

³¹ baraá xaanxaywo aga aande', adór AAKOÓ MUNGÚ Munguúhúng nura gagaár ar saxareema baraá aaiihúng sleémeero ay diirí hám tay diria', adór hee na/aywós ngur gagaraarin.

³² Ala tam tí sleémeero ngaa dirhúngí ooi, kuungá' AAKOÓ MUNGÚ, Munguúhúng ugwa haratlinti'i'iiká,

³³ kudá' kuungá' naa geerahaar baraá loohiro, nee nuri diírí sláy ar kuungá' heémarhúng kay tlehha'. Xweeraawo nuna geerahaár ar asla nee tlaatla/aango ar huunki as kuungá' nuwa loohírí laqan.

Mungú múk Israeli nguwa muúx

³⁴ «AAKOÓ MUNGÚ qununu/ayhúng guna axaás, iri buúhh, lo'o gari /aáy, iri oó',

³⁵ ‹Hee tumu wák baraá qartahunge oo hardáh baraá yaamuudá' naa al'axweés dír baabi'iihúng i kaahh.

³⁶ Aqo har Kalebu garmoó Yefune in hardah, aníng yaamuudá' inós aa adaráh ya'aawose in dirós i haniís nee xwaylarós, asma inós ku ló'wa inkihhím dir'eene.›

³⁷ AAKOÓ MUNGÚ sleeme aníng iri i buúhh as kuungá', iri oó', ‹Tam kuúng Móse a datká baraá yaamuudá'.

³⁸ Ala alee/isusmoowók Yoshua garmoó Nuni in dah baraá yaamuudá'. Gimáy, inós i axweeseek miwa mune sií', asma inós múk Israeli gun baraá yaamuudá' i hardahaas as ngiwa aaliya'.›

³⁹ «Naagáy AAKOÓ MUNGÚ atén sleémeero tiri báy, ‹Na/iihúng kuká' tawa da'ayumiita' tawa kata' ki hayoh nee wakuuserhúng nee múk hatlá', na/iiká' ninakw, kuká' gár tlaakw nee ar hhooe paraatlaro ngaa aleeslay'iiká, kuká' an múk hardáh, aníng yaamuudá' i inooín i haniís ngiri aaliyá'.

⁴⁰ Ala kuungá' alu i warqawaak, ki/é' baraá xaanxaay amór tlawtá Shamu na xuaak.›

⁴¹ «Naagáy kuungá' aníng iri mu/aywatsé', ‹Atén tlakweema iga tleehhaán dír AAKOÓ MUNGÚ, ala hám daxta a tlawaán, a slaqwarár awaán adoodá' AAKOÓ MUNGÚ Munguúrén tira hara'ayín.› Gawaá adoorihe, umuú heewo dirhunge tiri amohhe'eés slaqwaraaro, asma ana lak haraxué' tawa gár inslaahh yaamaá tlom'aá koomá' kiwa i haratleera'.

⁴² «AAKOÓ MUNGÚ inósuú kilá' aníng iri báy, ‹Mukwí ádbaweek miwa slaqwarár áy, asma aníng nee inooín a dinkwaarooká, matawa daqáy aluuwo kiri baal nee wakuuser'ín.›

⁴³ Naagáy aníng nuri kaangwí báw, ala kuungá' aga axasi'iiká. Kitaangose kuungá' tidá' AAKOÓ MUNGÚ i kaahi ana sié' eeharto, tari sagerhúng ar awiindé', tari tleeré' baraá yaamaá tlom'i.

⁴⁴ Múk Amori kudá' wa/ameedá' hoót tinday aweér gawaá tlom'ií wa ale, tunday i haratláy adoodá' ba'ari i /imaamis, kuungá' tunday baraá Seirír wa muúx ay Horma.

⁴⁵ Aluuwo niri ki/é', AAKOÓ MUNGÚ kuri i /aa/amindé', ala inós kuungá' naa iiárií qaasiiká, laqaá naa gaárí xuiiká.

⁴⁶ Naagáy har afiqoomár yaariire tari meté' baraá Kadeshírí ale.»