DAA'AANGW 8 - Biblía Axweesantá Hhohho' ar Mungú 2004

¹ Tsiní geera kuúng bar hhiyaaeé', kudá' taa du'umiís nee aayor'eé'. Tam barnaxes nee kuúng taa tsee/ií doogaán un ma'aás. Tam oo wák oo xurumiít i kaahh oo ti waaqaá'.

² Geeraawo án kuúng un huúw ay amór doó aayor'eé', ay baraá tla/afír aayoodá' aníng iga laqwal. Didaádae uri difaáír i haniís, ma'aydá' naa tsoó/ awa mamaá komamángaro uri qáw.

³ Dakók oo doó basáy sagw'eénár geeoohang, nee dakók oo doó /iyáy iri motsotsoqoos.

⁴ Aá dasuú Yerusalemu, aníng kuungá' nu harhheehhe'eés sla'aari ma gwarangwariimara', laqaá ma dukuumara', ay dír qoomaarós i xeer.

Daa'ángw Lahhoó' /Ameena

⁵ A heemá heewí baraá darmuú daáhh? Slám aa tlintií' gawaá sla'aaruso'oorós. Dír gamuú xa'anoó tofá'aro, aníng kuúng una tleés, didá' handá' aayoorók asltá xwayla ngiwa eér. Eeít, didá' handá' aayoorók uwa laqwál.

Dasír ta duxuuti

⁶ Aníng baraá muunaáwók i qaasáng adór laya. Masók a adór laya baraá dabaawoge. Asma sla'aari i /uuruú koón adór gwa'ara, Da/i i dae tláq adór /aanta, ohmaá sla'aari a adór ohmángw asla. In tsaara'aamís adór tsángw asla.

⁷ Ma'aá yaariir sla'aari ngi gaasiaaká. Tam alwuo gar wa/aká, hee bar tlaxwto ga iimu/ún aqo daqaari'iima sleémeero ga haniis, inós kuri niqimis.

Hha'aá dasír ta duxuuti

⁸ Hho'oorén tooka niina i deer, inós /aami gaa tsaxadiká. Ala hamí gár daanduuwose ta tleehhaan a xuanaaká bál barka iimu/ún sa'axweesanto.

⁹ Inós geera barnaxes a koo/i, geera aga /aampárí tleehhaán ar muqslír peésa. Nee geera barnaxes inós an afkú do'o alók aga baqaán ar peehhoó sahhti.

Dasír ta duxuuti

¹⁰ Aníng a adór koo/i nee iseemaaeé' a adór /aampu. Aníng dír ilaawose a adór heé wayda ngwa huuw.

Garmoó duuxuxuúm

¹¹ Solomon i qaymór sabiíbuú kón dír yaamaá ta babay Ba'al-hamoni, nee gana koomaauús dír xuumuuse, umuú heewo gár aa buú' a parhheemaá peésa awa kumuú wák.

¹² Qaymor'eé' ar sabiíbu a te'ér kilá'. Eeít, a te'ér kilá'. Gimáy kuúng Solomon, iwiít ar peésarók ar kumuú wák, nee umuú xumusmoó mamuuwo i iwiiti ar peésaaro ar tsiire tsár.

¹³ Kiíngadá' baraá qaymoórí dirii', mulqer'eé' afoorók gaa axás áx gimáy na'ás aníng sleeme a axaás.

Dasír ta duxuuti

¹⁴ Sla'aarusmooeé', xaáweek gaanslár ale, adór saaragi laqaá tsagnír batliito'o, tidá' gawaá tloomár mooyángw koóm i dirii'.