DAA'AANGW 7 - Biblía Axweesantá Hhohho' ar Mungú 2004

Garmoó duuxuxuúm

¹ Aá waawuto'ór /amaatliitó'o, xáy, kiíng hhohhoarto a adór milá ya'aawók bira ya/atí dahás. Naawuduuwók naa kumpapuiyé' adór tlaa/aá tlaxo gawden kwaáo kina tleéhh nee tleeusmoó gadiyeé ga baál.

² Gunu/uuwók ku hhoohhoó' adór isangaaír difaáír koom daqisleém. Guruuwók a adór ufuú angaáno oo taa /ayór waaridiír ar harweér.

³ Iseemaawók a adór gwerehhuú tsár, a adór saaragár daangi.

⁴ Istók a adór doó taa xareemaá daaweér ar tleéhh, ilaawók a adór tlahhesaá ma'aay awa gixsár Heshboni kudá' bihhaá afkú gixsár Bet-rabi i tseewá'. Duungaawók ki hhoohhoo' adór /aampár Lebanoni, tidá' nee gixsár Damasko ti ga/aawá'.

⁵ Slamángw sagók a adór tloomár Karmeli se'eengw ku bó/ adór tsawa, hhohhoartá se'eengók tam waawutmo gun uuruxuún.

⁶ Ga/aaweek adór kiíng tir hhoohhoó', tam ilaá muu in hayoohiín. Sla'aarusó'o, /amaatliito'o ar sla'atamis.

⁷ slaqsaywók ku hhoohhoó' adór slaansli. Iseemaawók a adór na/aá slaansli.

⁸ Aníng ana oó' slaansli a i tsa/ám nee mamuuwós ngiri bu'uúm. Dir'eene iseemaawók a adór na/aá xa'anoó sabiíbu. Hiinsluwók dir'eene a adór mamaá tofaá'a.

⁹ Afkók a adór difaáír tsuu'. Gimáy daxta difaái i wa/ ay dír mulqumooeé'. I gawaá slufoowós nee sihhinaawós ar wa/.

Dasír ta Duxuuti

¹⁰ Aníng ar sla'aarusmooeé', nee inós in ló'wa slaa'.

¹¹ Qwaláng sla'aarusmooeé', góh baraá qaymo. Góh a qatuú awaán baraá qamu.

¹² Matlaatleero a tseewa tlawaán baraá qamaá sabiíbu, i artá awaán axáy naa harmá/i? Nee axáy sabiíbu aa /ayuúsi? Nee sleeme axáy komamaánga /ayo duxuungo gaa iimu/úndi? Amoodaádá' an dír aníng sla'aarir'eé' ngiwa laqaam.

¹³ Mooyángw xa'anoó ta bay tunguúja i tlatláy, dír afkú doorene umuú xa'anoowo i deer oo mamaá hhohho' gi koóm. Aníng xaa'aá qaren nee awa /abene iga amohhe'eés as kuúng sla'aarusmooeé'.