DAA'AANGW 6 - Biblía Axweesantá Hhohho' ar Mungú 2004

/Ameena

¹ Xáy, /ameenír ló'wa hhoohhoo', sla'aarusmoowók amór aa káy? Xáy, sla'aarusmoowók amór aa xuú' a amoomá as tawa dinku'usaan leelehharo?

Dasír ta duxuuti

² Sla'aarusmooeé' aa baraá asalmoowós káy. Didaádá' /ayór ta bay rihaáni ki dahaás. Inós i bee/aangós de'én nee i /ayór waariídír burumburín.

³ Aníng ar sla'aarusmooeé', nee sla'aarusmooeé' a kwe'eé', Inós i bee/aangós de'én dír /ayór waariídír wa ale.

Daa'ángw kooán Garmoó duuxuxuúm

⁴ Sla'aaruso'or'eé', kiíng ti ló'wa hhoohhoó' adór gixsár Tirsa. Ti hhoohhoó' adór Yerusalemu. An dae tláq adór slaqwaruusér bendeéra gaa gáwtí tles.

⁵ Axáy bihhi i qaytsiteek gár niinawe, ga/aweek, adór nir amoqwaqwadiím, se'eengók a adór daqooroó aara kudá' /ee/etiím baráy alé gawaá tloomár Gileadiro.

⁶ Sihhnaawók a adór daqtá bee/ángw /ameena, kudá' /ee/etiím alaá kiwa hamaátl, umuú bee/iro i daangír koón. Tam ar aa deelmo gwa' i káhh.

⁷ /Uuntle'eeriiwók a adór kaeemaá tsár awa mamito'ór komamaánga dír alaá sheélaroge.

⁸ /Ameenár waawitá ka koon a mibeeri lahhoó', /ameenár quturmo waslen a mibeeri dakaát, nee dasu faarooro ku aleeslayká.

⁹ Hhookir'eé', hhoohhoir'eé', kiíng an wákaleelí nee an sla'aaruso'o dír aayoorose. Inós a wak dír aayoorose. Dasuú hatlá' birnga ár gan báy, «Kiíng ti amohhoó'.» /Ameenár waawitá nee tidá' tawo hoota, inós kan xirfayeemiis.

¹⁰ Heewí a heemá qaytarós adór tsee/amuú naa tsiiriihh? Ka hhoohhoo' adór slahhángw gwa/aát, in miirí/ adór tsee/amá i dae tláq adór slaqwaruusér bendeéra gaa gáwtí tles.

¹¹ Aga dáh dír asalmoó xaa'aá ta babay miloósi as niwa harma/ór baraá qaymór artá aw. As ngiwa ar axáy xaa'aá sabiíbu naa /ayusií'i, nee axáy xaa'aá komamaánga naa /ayusií'i.

¹² Niwa qaytsita, naxés mulquto'or'eé' iga qaroó húp dír gaárír heé úr.

/Ameena

¹³ Ki/áng, ki/áng, kiíng Shulamitó'o, Ki/áng, ki/áng, atén kiíng i qwalaalahhasaán. Ahaá waáy mis qwalalahhaasár wa sla'á' adór múk ni/imár slawaá tsár ga/áw.