DAA'AANGW 5 - Biblía Axweesantá Hhohho' ar Mungú 2004

Garmoó duuxuxuúm

¹ Aníng an dáh baraá asalmooeé', hho'or'eé', sla'aaruso'or'eé' ar ni duxuut. Manemáner'eé' nee muruú mooyángw kooma un burumburiím, xaaramtaeé' ar danú a /aáy a difaáir'eé' nee ilwaaeé' wahaám. Mulqer'eé', /ayiimé' nee wahaamé', wahaamé' ló'wa ale, sla'aaruuser'eé'.

Dasír ta duxuuti Daa'ángw Tsiyáhh

² Ana guú', ala muunaáeé' aa guiiká. Naxés afór sla'aarusmooeé' i afkú do' wa ateetiín. Afkú do' gweereek, hho'or'eé', sla'aaruso'or'eé', hhookir'eé' ar dakuús wasl, sagw'eé' aa naá/ har'uuwo, se'engw'eé' aa naá/ har'uú xweeraawo.

Garmoó duuxuxuúm Dasír ta duuxuti

³ Aníng tlabaaeé' iga duúx, adór ngir malé dahaas? Ya'aeé' iga hamaátl adór ngir male slasla/arees.

⁴ Sla'aarusmooeé' dakose afkú do' nguwa kwatiít muunaáeé' iri ló'wa qwalaá/.

⁵ Ana sihhiít, sla'aarusmooeé' nguri afkú do' i gweér. Dabaaeé' nina hatsiyé' mooyángw manemanero, nee gawaá ditsaeene mooyángw manemane i taxán. Qoomár niwa afkú doó bura duxuum.

⁶ Sla'aarusmooeé' nguri dó' i gweér, ala laatí sla'aarusmooeé' aa qaroó diya/aát. Muunaáeé' ina qwalaá/ qoomár iwa axweesi. Una leeleéhh ala ugwa slawiiká, una ateét ala aa ooinká.

⁷ Xuumuusér gixsár xuum ina aán qoomár tawa gixsár harwediiti. Iri muxiyé' nee iri gweehhiné'. Xuumuusedár afkú gixsa iri sheela hayót.

⁸ Aníng kuungá' /ameenár Yerusalemu nu firiím, sla'aarusmooeé' burngwa aandé' ádbawaak adór sla'aari ira slahh'és.

/Ameena

⁹ Ahaá, sla'aarusmoowók kwisíng gár i ak kon a milá ar sla'aaruusér hatlá' i koondaaká? Kiísíng hhoohhoo' ta /ameena sleémeerowo, ahaá, sla'aarusmoowók kwisíng gár i ak kon a milá ar sla'aaruusér hatlá' i koondaaká? Tam atén tiri adoosír harhheehhe'és.

Dasír ta duxuuti

¹⁰ Sla'aarusmooeé' ku ló'wa hhoohhoó' nee in /uuruú kón. Inós ku iia tleér tla/ángw hhawaataá kumér mibaango.

¹¹ Sagós ku ló'wa hhoohhoó' adór sahaábu se'eengós a adór makookí, ku bó/ adór boo/ár xwaa'ari.

¹² Ilaawós a adór kuqaá hhooki ar dír afaá yaae. A adór hhookár taa hamaátl ar ilwa, tidá' bihhaá duxuú ma'áy dirii'.

¹³ /Uuntle'eeriiwós a adór /ayór ta bay rihaáni A adór asalmoó mooyángw tsuú' oo manemánero aa haats. Slufoowós a adór /ayito'ór maamáy, aa naá/ manemánér yaariire.

¹⁴ Dabaawós ga munga'aá sahaábií dahaás, sahaábuú hhohhó' oo Tarshishír daáhh gwaa dahaás, slaqwtós a adór xaarmoó daangw, kudá' taa qaalín ar kal'aá yakutír samawi.

¹⁵ Ya'aawós a adór uheemaá alabásta, kudá' taa foól baraá iihhafiirír sahaábu, slaqsaywós a adór Lebanoni, ki gawden adór xaa'aá sahhta.

¹⁶ Afkós aa haáts axweesantá tsuua. Ar ló', ku hhoohhoó', Naagáy adoorí an adór sla'aarusmooeé' i dirii'i, aá /ameenár Yerusalemu.