DAA'AANGW 4 - Biblía Axweesantá Hhohho' ar Mungú 2004

Garmoó duuxuxuúm

¹ Ga/aaweek, sla'aaruso'or'eé', kiíng ti ló'wa hhoohhoó', sla'aaruso'or'eé'. Ti ló'wa hhoohhoó', ilaawók baraá sheélaro a adór kuqaá hhooki, Se'eengók a adór daqtá aara ar /e/etiim gawaá tloomár Gileadiro.

² Sihhnaawók a adór daqtá bee/ángw /ameena, ar ta se'eengw tlaaqi, kudá' /e/etimá' alaá hamtlooro kiwa hhe'eés. Umuú bee/iro i daangír koón. Tam ar aa deelmo gwa' i káhh.

³ Slufoowók a adór hhutlmoó daa/aát. Afkók u ló'wa slaá'. /Uuntle'eeriiwók baraá sheélaroge a adór kaeemaá tsár awa mamito'ór komamaánga.

⁴ Istók a adór doó gáwtí tleér oo Daudi, kudá' taa tleéhh as xooslár slaqwara babats. Handá', gaambudaá kumuú wák kaa tarereé'. Sleémeero awa múk slaqwarár xuú'.

⁵ Iseemaawók a adór gwerehhuú tsár, adór saaragár daangi, kudá' qawá' baraá tla/ángw /ayór hhohho' wa ale.

⁶ Aníng a iwtanángw áw baraá tloomár manemane, nee dír tloomár mooyángw tsuú' koom, ay dír iimi i piinsli'it nee ay dír iimi i /awakuur.

⁷ Ga/aaweek, adór tir hhoohhoó', sla'aaruso'or'eé', kiíng gár tiwa /aár i káhh.

⁸ Qwaláng, Lebanónír wa tlawáng, sla'aaruso'or'eé' ar ni duxuut. Nee Lebanoni masók a mawaán, /eetáng gawaá tloomár Amana, gawaá tloomár Seniri nee Hermoni. Ti'iitáng baraá mar'ír dirango. Ti'iitáng gawaá tloomár dueemiwo.

⁹ Kiíng muunaáeé' ugwa qwal/ás, hho'or'eé', sla'aaruso'or'eé' ar ni duxuut. Qaytsitarók ar wák muunaáeé' gwaa qwal/atís, nee ar himtuuwók oo gawaá isa.

¹⁰ Hho'or'eé', sla'aaruso'or'eé' ar ni duxuut, sla'aarirók i ló'wa tsú', ka afhhamít ta difaáiro. Maraáshirók i mooyángw tsuú' koón ta mooyaangw sleémeerowo.

¹¹ Afkók i danuú paahhamiis, aá sla'aaruso'or'eé' ar ni duxuut. Tsifraangók danú nee ilwaawo gi kón. Mooyángw tsuú' oo tlabaawók a adór mooyángw Lebanoni.

¹² Hho'or'eé', sla'aaruso'or'eé' ar ni duxuut, kiíng a adór asalmoó taa tseék. A adór asalmoó taa tseék, nee kutltá taa dugunií qaás.

¹³ Harma/tók adór asalmoó komamaánga dinkwa nee mamaá ló'wa hhohho' sleémeero kudá' ta bay hína nee nárdo.

¹⁴ Nárdo nee tidá' ta bay safaraáni nee mehaái nee dalasiíni, manemáne nee mooyángw tsuú' oo ta bay uúdi nee xaa'aá hatlá' awa mooyángw koomá'.

¹⁵ Kiíng a adór asalmoó kutltá koóm, nee adór hhalángw ma'aá slafá', ya'aá wa/amimá' awa Lebanonír dahhá'.

Dasír ta duxuuti

¹⁶ Fur'ár bihhaá /iikú daahh, fukuku'uutáng. Qwaláng, fur'ár bihhaá basa, fukukuú' ar gawaá asalmooeé'. Mooyángw tsuú' yaamuuká' ngi aleetsati. Sla'aarusmooeé' ni hardihi baraá asalmoowós i aleeró, mamuuwós kudá' hho' ngi /aymár ay.