DAA'AANGW 3 - Biblía Axweesantá Hhohho' ar Mungú 2004

¹ Xweeraawo niwa gawaá qatanir'eé' i dirii' ana tlatitiím, heedaádá' muunaáeé' i slai un leelehhahhiít. Una leelehhiít ala ugwa slawiiká, una ateetiím, ala aa ooinká.

² «Ana sihhiít niri harweeriríngw áw baraá gixsa. Ay baraá lohuduuwo tam ay tsirxadaá ninakwe. Heedaádá' muunaáeé' i slai un leelehhiít.» Una leelehhiít, ala ugwa slawiiká.

³ Xuumuusér gixsa ina aán, qoomár inooín tawa harweeriirin baraá gixsaro. Naagáy ngiri yaahaás, «Xáy heedaádá' muunaáeé' i slai ngwa aandí'i?»

⁴ Qoomár niwa dir'ín wa tláw heedaádá' muunaáeé' i slai nguri ár. Nguri dawa óh, ugwa baloó geemawiiká as miwa tláy. Nguri huúw amór doó aayor'eé', ay baraá tla/afír aayoodá' aníng iga laqwal.

⁵ Aá dasuú Yerusalemu, aníng kuungá' nu harhheehhe'eés, adoodár saaraga laqaá tsagna ira xaslmít baraá sla/a. Sla'aari sleeme ma gwarangwariimara' laqaá ma dukuumara', ay dír qoomaarós ni xeer.

Daa'ángw Tám Dasír ta duxuuti

⁶ Garqá' a milá baraá xaanxoó daahh, adór tsángw quui oo aa sihhiit. Tidá' mooyángw manemáne, hee mooyángw tsuú' iwa tlatlay, tidá' ta weeramiisi nee halanuuse.

⁷ Ga/aaweek, kitángw Solomon kur loohisi. Inós kwa gagaár ar kitaangós oo waawuti'iima, kwa harweér nee xuumuusér mibeeri lahhoó', múk /uuruú koóm oo Israeli.

⁸ Umuú heewo paángarós gaa óh, umuú heewo slaqwara ga xuu', umuuú heewo paángarós i baraá afeetloowós. Taa amohhe'eés nee wakusmo tiwa tlaampa'asiya' xweeraawo.

⁹ Waawutmo Solomon /aamparós gaa tleéhh, ar peehhoó hhohhó' oo Lebanonír daáhh.

¹⁰ Uheemiwós kina tleéhh ar muqslír peésa. Daanduuwós a sahaábu. Didá' ti iwiiti kaa tuuntuúk ar tlabaá sirda/aten kudá' /ameenár Yerusalemu aa hirít as sla'aari.

¹¹ Áx gimsé', qwalaasé', kuungá' awa /ameenár Siyoni! Waawutmo Solomon qaytár awaare'! Slamángw aayoorós aa tléhh ngwa dahaás bál deelór duuxoorose, deelór muunaáwós qwal/uwo iwa haáts.