DAA'AANGW 2 - Biblía Axweesantá Hhohho' ar Mungú 2004

¹ Aníng a adór /ayito'ór baraá xatstá Sharoni, a adór /ayito'ór baraá xatstí dirii'.

Garmoó duuxuxuúm

² Sla'aaruso'or'eé' baraá /ameenaaro a adór /ayito'ór baraá tla/ángw laqaya'.

Dasír ta duxuuti

³ Sla'aarusmooeé' baraá tla/ángw daaqaywo a adór xa'anoó tofaá'a oo baraá tla/ángw darma, aníng a qwalalaá/ niwa huungu/uus dír mahhtirós, nee mamuuwós bira tsaáq i ló'wa tsuuiyá'.

⁴ Ina huúw ay dír doó muruú /aymár úr kuwa qaás nee inós bendeéra gana gáwtí tleés as sla'aarirós ngiwa laqán daanduueene.

⁵ Aníng /aymisáng ar sabiíbuú kaaharén, nee qwal/atisáng ar mamaá tofaá'a, asma sla'aari iga tiqís.

⁶ Dakós oo doó basáy ngu sagw'eénár geeoohi, nee dakós oo doó /iyáy aníng i motsotsoqoosi.

⁷ Aá dasuú Yerusalemu, nu harhheehhe'eés, adoodár saaraga laqaá tsagna ira xaslmít baraá sla/a, sla'aari sleeme ma gwarangwarimara' laqaá ma dukuumara' ay dír qoomaarós i xeer.

Daa'ángw tsár Dasír ta duxuuti

⁸ Afór sla'aarusmooeé' aga axaás ga/aaweek, gawaá tlom'iiwo i ti'ii'ín, i amor'eé' káy, tam gongoama' sleeme gi fadiitiiká.

⁹ Sla'aarusmooeé' a adór saaragi, a adór tsagnír batliito'o. Ga/aaweek, inós aa sihhiít dír bihhaá koo/irén, i pa/ángwár xumiis i amor'eéní xumiis ar pa/eeraá koo/i.

¹⁰ Sla'aarusmooeé' aníng i babay, «Sla'aaruso'or'eé', tlawáng, kiingadá' aníng i sla'atimis, ti'iitáng, qwaláng amor'eé'.

Garmoó duuxuxuúm

¹¹ Asma qoomár tsaaqwa aa waaráhh, nee tluwoó buhaare aa faák.

¹² /Ayo aa /ayús umuú diiro baraá yaamuwo, qoomár daa'aangw aa xeér, afór hhooka ka axamiis, umuú diiro baraá yaamuwo.

¹³ /Aantsí mamuuwós gaa laqwál, nee sabiíbu i /ayumiis, slantá qoo tsuaiim in tlatleér. Qwaláng sla'aaruso'or'eé', tidá' aníng i sla'atimiis, qwaláng a quutlaán.

¹⁴ Aá hhookir'eé', tidá' aa nahhat baraá mar'ír tlaa/a, baraá lu/aroó mar'i, qwaláng aníng gitsee/aawók i ár, nee afoorók ngi axaás, asma afoorók i natsaatsá' nee gitse/aawók i sla'atimisiyá'.

¹⁵ Intsaweesíng uhimare', Intsaweesíng ninakw uhimaré', tidá' sabiíbuurén gu hhititiim, asma sabiíbuurén i /ayumiis.»

Dasír ta duxuuti

¹⁶ Sla'aarusmooeé' a kwe'eé', aníng a tós, inós bee/aangós gun de'én baraá /ayór wa alé,

¹⁷ ay dír tsee/ama i axwaanuy nee mahheeto nay guwiyá', sla'aarusmooeé', ki/áng, kuúng a adór saaragi, kuúng a adór tsagnír batliito'o ar gawaá tloomár Betéri.