AXWEESANOÓ SAGALOOA 9 - Biblía Axweesantá Hhohho' ar Mungú 2004

Sagalooa nee daktu'uuma

¹ Sagalooa do'ós gwa tléhh, uheemaá do' ngaa tléhh a faanqw.

² Hikwaá ta /ayi gaa tsú/, difaáirós gaa amohhe'és, muruú /ayma gwaa hhe'és qaasaaro.

³ Lawaaleerós gaa ya/áp, muu nguwa atet, gawaá gongooamaá baraá tla/ángw gixsa.

⁴ I kaahiya', «Umuúqo heé iimiboó/ i baraá dó'í dahi.» Tam heé saga/aár ku babay,

⁵ «Qwaláng muruú /aymar'eé' awang, nee difaáir'eé' tí naa tleéhh wahtá awang.

⁶ Iimiboo/arók tisíng maweek as tawa hot, hoót adór heé muruú tsatsahhaám.»

⁷ Heé múk waaqaaqaá' bura iigahhát, tu mureekees. Heé tlaákw bura naanáq, an baraá slahh'amií dát.

⁸ Heé u waaqaaqaá' mu naanaqaar as muwa aáhh. Heé sagaloó' naanaqeek daqaní kuúng u slaa'.

⁹ Heé sagaloó' intsaahhatiseek, daqaní sagalooarós i kumít, Heé ganaá' intsaahhatiseek, daqaní tsaahharós i doogiín.

¹⁰ AAKOÓ MUNGÚ kuwa ilaiwawa/i an iimu/úngw sagalooa. Nee inósuudá' hhoohhoó' bur xú', tsaahha a koón.

¹¹ Ar alee/isay'eene kuúng an hotaatiín, nee kureeraá slafiingók nari tlahhiyá'.

¹² Sagalooa bar koón, an koón as kuúng. Ala bar an waaqaaqá', kangwsíng a kók.

¹³ /Ameenír daktani ka afa daa/aat, a tsiiluso'o, ka mure wasl.

¹⁴ In afkú do'ós i iwít in gawaá kitaangós i iwít gawaá gongooamoó baraá gixsa.

¹⁵ Umuú heé tsuftadár waaraahha gun ateetiín, múk baraá lohuuine bihhií qaytsimitaaká.

¹⁶ Gun babeer, «Umuúqo heé iimiboo/e i baraá do'wí dahi.» Tam heé saga /aár gun babeer,

¹⁷ «Ma'aá fiiso i tsuainá'a! Tam muruú /aymár ta qawti /ak iwa tsuúi!»

¹⁸ Ala heewí ga xuiiká adór gwa'ara ir baraadá', nee adór dahaayeerós ir baraá gi'ií dirí'.