AXWEESANOÓ SAGALOOA 8 - Biblía Axweesantá Hhohho' ar Mungú 2004

Ateetamór sagalooa

¹ Sagalooa i ateetiín, tsaahha afoorós ngaa tlés,

² gawaá goongoamaá afaá loohír wa ale, dír waatsarár loohi gan i dirí'.

³ Dír afkú dahamaá baraá gixsa, didá' tar daraahi gan wa ateetiín.

⁴ «Aá xoóro, aníng kuungá' nun ateetiím, ateetamor'eé' a amór muu sleémeero.

⁵ Aá múk iimibó/, dahar intsaatsahhaak, kuungaásingaá daktana, iia qaasaak.

⁶ Iia qaasaak, asma aníng muruú hhó' ngu oó', baraá afkwe'eene gár ti'imiit a axweesanoó ganaá'.

⁷ Afkwe'eé' gár i aain a looeema, muruú tlákw u waák kaahaango.

⁸ Axweesanoó afkwe'eene ni aaiim i ganaa'. /Aymuú tlaákw laqaá oo sagagawda i kaahh.

⁹ Axweesanay'eé' sleémeero ku tsatsahhán nee heé saga gwa/aát, ku tsaahh nee heé xu'utír koóm.

¹⁰ Intsaahhatisar'eé' ooheek ta peésaaro, nee xu'uti na tsawaareek ta sahaábuú hhohhoe.

¹¹ Asma sagalooa ka afhhamít ta tlaa/eedá' tlaxo gawdene, tam muruú ta ló'wa ilatleerus, didá' ga nakaa/iiká.

¹² Aniírír sagalooa, dahar u koóm, xu'uti nee daharuuwo in koóm.

¹³ AAKOÓ MUNGÚ bur ilaiwawá/ a tlakweema i áhh; Daara/aangw ugwa aáhh, nee hi/niro, nee lohdaá tlakwe, axweesanoó sagagawda ugwa aáhh sleeme.

¹⁴ Aníng gurbu'uungw u koóm, nee sagalooaro, tsaahha a koóm sleeme nee /uuruuwo.

¹⁵ Waawitá in waawuti'ii'ín as aníng, múk urén kwasleemár ganaa' kan tleehh as alee/isay'eé'.

¹⁶ Geeraharuuse in baaliliín ar alee/isay'eé', nee har'ohuuse sleémeero baraá yaamuwo,

¹⁷ Mukdá' sleémeero aníng i slaá', u slaá' sleeme, nee múk i leelehhiít ar ilakaahara i ariyá'.

¹⁸ Daqaari'iima nee ilaiwa/ameero in dir'eé', eeít, daqaari'iimár kumamiit nee slaasláw.

¹⁹ Mamaá ta dir'eé' wá sleer, sahaábuú ló'wa hhohhó' ngu ba/iyá', slaasláwár ta dir'eé' sleer peésár hhohho' ga bá/.

²⁰ Aníng an hoót ar gan'amu nee tlehhma'aá ganaa'á' in eeharahár.

²¹ As kahhó' mukdá' aníng i slaá' nguwa daqaari'itis, nee qaasir'ín ngay dalaá/.

²² «AAKOÓ MUNGÚ aníng ina geerií tleéhh, iimír qaránqar gár dáw iwa kahh.

²³ Tina tleéhh iimír aáng wa ale baalaadae yaamu naa deeruti'iiká.

²⁴ Tina laqwaál bál tlawi kawa tleehhiiká, bál kutltá ma'aá duxuum i káhh,

²⁵ bál tlom'i kaa tleehhiiká, tam gongooama kaa wa/angw'ín i qaasiiká. Aníng a daadeer.

²⁶ Bál yaamu kaa tleehhiiká nee xatsoowo, tam iihhafiirír teeri kaa tleehhiiká,

²⁷ bál doori ngiwa tleéhh, aníng a deer, bál tlawi ngiwa adór gaangeeír wa alqoomeés.

²⁸ Qoomár huunkáy nguwa gáwtí qaás, kutloó baraá tlawi /uuru nguwa sláy,

²⁹ qoomár tlawi ngiwa digmuuwós i qaás, as ma'aá tlawi hara'ayaarós mingiwa si'iyé', qoomár iihhafirír yaamu ngiwa qaás,

³⁰ aníng a dinkwa nee Mungú, adór gadiyusmoó ilakaahaár. Umuú baalaaro inós aníng iri saqwalaalaá/. Aníng sleeme an dír geeraawós wa qwal/a/aát.

³¹ Yaamu ina sabaraá/, nee muruuwós sleémeero. Nee muu una saqwalalaá/.

³² «Daaqay'eé', hám daxta iia qaasaak, heé amohhoó' a kudá' loohir'eé' gaa oh.

³³ Intsaahhatisar'eé' axaasaak, as sagalooa kawa sleera', slám ma waaqa'aara'.

³⁴ Heé amohhoó' a kudá' aníng i iiárií qamiím, kudá' umuú baalaaro afkú dooeé' wa daamaaraám. kudá' afkú dooeé' wa iwiwiít.

³⁵ Asma heé aníng iga slay, a slafiingw guna sláy, heé adoorí ku gurií baa/ nee AAKOÓ MUNGÚ.

³⁶ Ala heé aníng iga dakuus, a tin kilós slahh'eemiis. nee heé aníng iga aahh, a gwa'ara gana waatlakweés.»