AXWEESANOÓ SAGALOOA 7 - Biblía Axweesantá Hhohho' ar Mungú 2004

¹ Garmaaeé', axweesanay'eé' ooheek, nee hara'ayar'eé' i dirógí met.

² Hara'ayar'eé' ooheek daqaní kuúng a sláf. Intsaahhatisar'eé' harmagahheek adór maamár iltók wa ale.

³ Gawaá ditsaawók ti tsek, baraá muunaáwoge gooimeek.

⁴ Sagalooa diroge masók a adór hho'oorók, tsaahha diroge masók a adór mulqumoó gawít.

⁵ Daqaní kuúng u tu/iyá' dír /ameenír sli'imuso'ooro, uri ar guwiyá' dír dahaayo'ór axweesani tsuua.

/Ameenír tsaatuso'o

⁶ Baalarka wake ana qaytsiít ar gawaá pa/ángw dooeé'; ana tsee/áy qaytsiít ar baraá pa/eeriwós.

⁷ Masoombár yaariir ar xuaawaslen ana ár, masoomoó wák oo funqurángw koomaaká, nguri baraá tla/ángw masoombár i tsaáhh.

⁸ Naxés loohír ira óh afkú doó /ameenidá' gunar waaráhh, loohír amór doó /ameenidá' kaw gari ar paásl.

⁹ Qoomaadae looa a /uwaá xú', iri tsiindo tleehhít; Tari xweeraá dakiingw, baraá giwti.

¹⁰ Naxés tari doogiyé' nee /ameeni, tlawuú tsaatu'uuma ngwa dahás, ka afa kaahaar.

¹¹ Inós a /ameenír afa daa/aat, slám ka saga gawit, ka ya/ati /awaak, gwe'eedo gi yaamií qamaamiindaaká.

¹² Tibee i baraá lohaá uren, tibee i baraá boo/aay; baraá afaá loohiro a dakuská, iqo wa/angwdá' wa mareexu'uún.

¹³ Garmaadá' guri ót, guri ma'ás, aa murutká guri beér,

¹⁴ «Aníng ilahhooar'eé' tidár muruú ta tsu/i aga haniís, nee al'axweesante'eé' aga buú'.

¹⁵ Aníng gár nisa ti'iít a una al'áw, una ló'wa leelehhiít as uwa ló'wa slaa', hám ugwa sláw.

¹⁶ Qatanir'eé' aga hhafa hhe'eés. Inqwaruú mardaádír kitaáni oo Misrír daáhh ugwa gawaadá' i hhaáf.

¹⁷ Mooyángw ta babay manemane, ugwa qaás, nee oo uúdi nee oo dalasiíniro sleeme.

¹⁸ Qwaláng! Aníng nee kuúng a guaán ay matlaatle. Qwaláng muneerén a qwal/atamisán ar sla'aari.

¹⁹ Asma hhawaatuueé' do'o i kaahh, aa aa'aá káy ayaá saáw.

²⁰ Peésaarós gara tláy, ni adaá watliiká baraá aaiwo.»

²¹ Guna afa /aslaa/asliín ar axweesanaywós oo yaariír nee oo fur'ár tsaen, guri bál ar harhheehhe'eemisuuwós kudá' tsuú'.

²² Garmaadá' iri alaá /ameenidá' wa dogogo'oót, adór slér ta gaasár ay, laqaá adór daktantá taa kilós hup baraá tseegamo.

²³ Gaa tsaahhiiká adór kaangwí hhiintluuwós ngur qwaareés, ay qoomár slahh'amu nguwa sláy, adór heé taa bihhi muút ar mahaangw, inós a adór tsir/ír gaansliim amór naqafí.

²⁴ Gimsé' na/iieé', aníng iiárií qaasaré', axweesanoó afku'eene ni kah axaasaak.

²⁵ Baraawoge /ameenír adoorí ma waatlakweesaar, sleeme tsufaywós mur waaraahhaar.

²⁶ Asma múk yaariír guna daraaráhh, nee múk inós aa tsú/ dinkwaaro a tlaftá tawo.

²⁷ Do'ós a loohír baraá giaá kaw, loohír hardah baraá kutwír gwa'ara.