AXWEESANOÓ SAGALOOA 6 - Biblía Axweesantá Hhohho' ar Mungú 2004

Muruú tsiyáhh oo baabá i gurbu'un

¹ Garmaaeé', barnaxes dugno ugwa qás as heewók, barnaxes aga ya/aán dahaaymo kuwa dawaaot,

² daqaní taa kilók ót ar axweesanaywók, taa kilók nagwáhh ar al'axweesantók.

³ Xueek adór kuúng tura dabií óh nee heewók kudá'. Ala barnaxés kuúng ti tu/tá wa slá', garmaaeé', adoorí tleehheek, tláw amór heesíng kaweek, kángw kilá' wa harhheehhe'eeseek, dugnoodá' ngu fiitsi.

⁴ Ilakaahareés gu'ute muwa ót, tam ilaawók mindiwa gufiisiyé'.

⁵ Ti kilók tu/ baraá tsaaxweelisinge, adór saaragi ir kotsqomaamit dír slakaatusmoowo, nee adór tsir/i ir kotsqomaamit dír naqfihe.

⁶ Aá heé tli/usámo, áx maandaá maliílay xuuxueek, tlehhmi'iiwós aldakweek, sagalooa slaweek.

⁷ Asma maandaá maliílay i geeraharusmoó kon'aaká, laqaá ga/aawusmo laqaá waawutmo.

⁸ Ala muruú /aymar'ín kun baats as qoomár age, qoomár fiiqituuwo muruú /aymar'ín ngun burumburiyá'.

⁹ Aá heé tli/usámo, ta guaiin ay xaylá? Baraá gu'uteerók tisinge xaylá ta tleer?

¹⁰ Ay xaylá ta aaiin, «Lakiít daa ni mafiís? Án mawaaré' ni ala guú'. Dabaaeé' in ala baraá da/eewí ki/ís niri guú'.»

¹¹ Aluuwo narakw uri adór malgusmoó wa haraadah, nee aleemawók uri haradahiyá' adór slaqwarusmoó wa ale.

¹² Heé tlaákw, inós a heé ta haraeeraaká gaaro, in tawo hi'iimiit, gaa a axweesanoó tlákw gun axwees.

¹³ Muu gun kutlín ar ila', i axwees ar ya'a', muu gun kutlín ar ditsaawós.

¹⁴ Gár baraá muunaáwós a tlakweema, slám gin aldakuut umuú daqto. Nee tlaahhi gan qamín.

¹⁵ Gawaá adoorihe looár wake slahh'amu gu sláy, gu ar slahhasiiká. Looár wake i qeqtín tam tu/tós i káhh.

¹⁶ Muruú lahhoó' i deer oo AAKOÓ MUNGÚ i waki, eeít, faanqw ga áy dinkwaaro muruú aa ló'wa aáhh.

¹⁷ Xumsór daara/aangw, nee afkú lama gaa intsaahh, nee dabaá tseerdaá dakuús wásl ngi ku'umiisá'.

¹⁸ Muunuú muruú tlákw aldakuút, ya'aá insláhh amór tlakweema tlehhtuuwo.

¹⁹ Lamabu'usmoó lama, oo lama iwa tawó tluwit, nee heé múk harauhmís.

Iia /utla as fuqi

²⁰ Garmaaeé', hara'ayár baabuúwók ooheek, tam intsaahhatisár aayiírók ma siaar.

²¹ Hara'ayaarí baraá muunaáwók ti qas, baraá istók ti tsek sleeme.

²² Bar hi'iimít baraá loohiro u geerahát, bara qát u xuún. Qoomár bar dalá' in axwés nee kuúng.

²³ Asma hara'ayaarí a tsaa'asi, nee dabeerí a gwa/aateema, an gurbu'úngw hee gu gan'aás, an loohír slafiingw.

²⁴ Kuúng uri xuún as /ameenír tlaakw muwa sleér. Uri tú/ dír dahaayo'ór harhheehhe'eemisa.

²⁵ /Ameeni ma ilaatleerusaar as kawa hhoohhoó', sleeme ma ya/amaar uwa ot ar hhamhhamaá ilaawós.

²⁶ Asma heé nee /ameeni naa fuquusiye' mukaatmo gun haniis, ala heé nee harér hee taa fuquus a hhiintluuwós gun qwaarees.

²⁷ Xáy i ya/aánda hee asla ngiwa qaasi gawaá da/eewawós, inqwaruwós guri /agká?

²⁸ Laqaá a aleesleéra asla kawa kala/ yaaeero, turi da/iiká?

²⁹ An slaqás sleeme nee heé a fuqtá ay amór harér heéwí ale. Umuúqo heé harér hee gaa kwatiit sakwasleemaro ku pa/asiiká.

³⁰ Xáy, fisusmo ku niqinkáhe nee muu, gár isa fisiisín bar qwari?

³¹ Nee bur kwaa sa óh aqo in bu'ún sagáwa faanqw, slám umuúqo gár i kona gan haniis.

³² Hhawaatuú nee harér hee fuquusá', tam fuqurángw niiná gu konká, gár i tlehhiiti a hhiintluuwós gun qwaareemiis.

³³ Kun tlaqmamiis nee kun mureekemamiis, mureekesoó i sláy i baloó faakiiká.

³⁴ Heé hare loó', as da/itá hareerós bira buúhh i alií ki/iiká, li/aysíng burngwa bu'utá áy dawa gu ar ki/iiká.

³⁵ Doohho ga baloó ya/anká, har'ooha sleeme ga ya/anká, tam muruú yaariír u hanisa.