AXWEESANOÓ SAGALOOA 5 - Biblía Axweesantá Hhohho' ar Mungú 2004

Iia /utla as fuqi

¹ Garmaaeé', sagalooar'eé' axaaseek, iiarók sihheek, intsaahhatisar'eé' iiárií qaaseek.

² Daqaní kuúng a hót ar dahar, axweesantók tari adór tiqár heé fuqurángw koóm.

³ Asma afkú /ameenír tsaatuso'o kwaáo' in danuú kón, nee axweesantós i natsaatsá' adór di/i.

⁴ Ala alhhe'eesaywo in qarqarút saaxí ba/a, i tlaaqaán adór paángár afe tsár.

⁵ Sagós amór ngwa xu'ús a baraá gwa'ara, ya/atirós loohír aa ót ar baraá gi'i.

⁶ Inós loohír slafiingw ga gaárí xu'uká, baraá slafiingose i tawo tonganús, gár i xu' i káhh.

⁷ Ala kuungá' daaqay'eé', aníng iiárií qaasaré', tam /ayma'aá afkueé' mi waaqaa'ara'.

⁸ Amór saaw ar ooheek dirose, tam ma dír afkú do'ós i nakaa/aar.

⁹ Bar adoorí aga tlehhká, xirfuuwók u hanís dír múk xaraásl, nee slafiingók kuri hanís dír heé xaraásl.

¹⁰ Múk waaraáhh /uuruuwók guri /aay, muruú ta hamér wa xínts kuri ar waatl nee hooma.

¹¹ Bál bar aga diín tari tsuunqumís, bál bar gwagwa'aán slaqwtók bira harfák,

¹² tari kilók o', «Án iia /utla maga har sií', nee muunaáeé' iigahhaata minga har waaqaá'.

¹³ Afór mukdá' aníng iga intsaahhatimis masa iialoeesiiká, tam kudá' aníng iga iia' /utliye' isa iiárií qaasiiká.

¹⁴ Hám daxta aga nakaá/ niwa suquut, dír geeraá múk yaariír wa ale.»

¹⁵ Ma'aá baraá hhalaangók dahhá' kilooín na /ayeek. Kudá' baraá hhalaangók wa ti'imiitá'.

¹⁶ Ahaá asma gár ma'aá baraá tsiinqarók dahhá' kis tsee/ár fak? Nee kutltá hhalaangók gár kas baraá lohaá urén i hup?

¹⁷ Ma'aá baraá hhalaangók a kók kilooín, tam dahaaymo sleeme mu wahasaar ar ma'aá hhalaangók.

¹⁸ Gám hhalaangók ku tsuuqi, nee hareerók ar bi/i saqwalaala/eek.

¹⁹ Inós ka hhoohhoo' adór tlaaqati, i sla'atamís adór saaragi; kuúng deelo sleémeero masók a dirós wa bu'umít, nee masók umuú daqto an amoorós i bará/ as kuúng uwa sla'.

²⁰ Garmaaeé', ahaá a milá mas an tawo qwalaalá/ amór /ameenír sli'imuso'o? Ahaá mas an dahaayo'ór ma'amís?

²¹ Asma tlehhma'aá hee dír AAKOÓ MUNGUHE ki geehhoo', inós umuúqo gár hee i tleehhi gan ga/áy.

²² Heé tlaákw kun oh nee tlakweemaawós awa kilá', kun oh nee him'ér dakuúsarós tidár kilá' i tlehhaahhiti.

²³ Heewí in gwaa' as gurbua wasle, nee iri qwaar as daktu'uumarós.