AXWEESANOÓ SAGALOOA 4 - Biblía Axweesantá Hhohho' ar Mungú 2004

Gár sagalooa kas hhoó'

¹ Daaqay'eé', hara'ayár baabuúhúng iiárií qaasaák, ia' sihhaak as tsaahha kawa sleera'.

² Asma aníng intsaahhatisár hho' ngi oó', hara'ayar'eé' ma siaara'.

³ Asma aníng aáng a na/aay dír baabuúeene, garmoó tsá' dír aayír'eene oo i sla'a'aan.

⁴ Baabuúeé' aníng iri intsaahhatís, iri báy, «/Aymi'iieé' kuká' ooheek baraá muunaáwók, hara'ayar'eé' ooheek, daqaní a hót.

⁵ Ma sagaqwaaraar, nee axweesante'eé' ma siaar, sagalooa slaweek, nee tsaahha slaweek.

⁶ Sagalooa ma baloó mawaar, daqaní inós kuúng u amohhe'és, slaeek, daqaní inós kuúng u xuún.

⁷ Sagalooa a gár afhhamít, gím leeleehheek, ar umuú gár taqo koonda, tsaahha slaweek.

⁸ Xirfayeseek, inós kuúng u xirfayés. Bar aga ma'ás, kuúng u ilaiwa/amér i sleér.

⁹ Inós qeemuú tawo ngun hanís tawa adór warqamoó saga. Un tawo qeér ar slamángw hhohhoaari.»

¹⁰ Garmaaeé', iia qaaseek, axweesante'eé' ya/aameek, as slafíngw kureeraá yaariir kuwa sleer.

¹¹ Ugwa intsaahhatís loohír sagalooaro, nee ugwa geerahaár ar baraá loohír qoom.

¹² Bara adoorír hót gár kuúng u dukuuts i káhh, tam bar ti'i'iín gár u gee/aasl i káhh.

¹³ Intsaahhatisarí ooheek, ma baloó alií kwahhaar, ooha hhe'eeseek, asma inós u slafíngw ar eér.

¹⁴ Ma dahaar baraá lohdaá múk tlákw, sleeme tlehhma'aá múk aa qwaar mi eeharaharaar.

¹⁵ Loohisíng kwirhhiteek, ma dír bihhaawós i tseewuwaar, warqáw disinge, quútl diisinge.

¹⁶ Asma múk tlákw gu'ute gu oohahiindaaká bar tlakweema nga tleehhi'iiká, gu'uter'ín in /akút bar hee ngwa dahhi'iiká.

¹⁷ Asma muruú /aymar'ín an tlakweema, nee gár i wahahaana' an hara/untsa.

¹⁸ Ala loohír heé ganaá' a adór tsiraahhór tsee/amá, tse/amangwí in kumaamiit ay /ametleemu.

¹⁹ Ala loohír múk tlákw a adór ma/amír aa qipit, Gár inooín gi gee/asliim ngi xuiaaká.

²⁰ Garmaaeé', /ayma'aá aníng ni kah iiárií qaaseek, muruú aníng ni kah iiárií qaaseek.

²¹ Muruuwí miwa qwaár baraá inslawaywoge, amohhe'eeseek baraá muunaáwók.

²² Asma /aymi'iiká' a slafiingw dír heé gaa axaasi, i maasoó hhoó' tleehhitiyá' baraá slaqwtá heewo.

²³ Muunaáwók harmagaahheek ta mura' sleémeero oo ta xuunda, asma an dír kutltá slafiingw i dahh.

²⁴ Afaatli/a maweek baraá afkoge miwa deerút, tam lama sleeme saweeseek diroge.

²⁵ Ilaawók geera ngi ga/aye', nee hhamhhamaá ilaawók geera ngi ló'wa ga/aye'.

²⁶ Loohír tar ot aldakweek, as kahhó' adór tar hi'iimit iwa qoon.

²⁷ Ma warqawaar bartá doó /iyáy laqaá bartá doó basáy, quútl dír tlakweemaawo.