AXWEESANOÓ SAGALOOA 31 - Biblía Axweesantá Hhohho' ar Mungú 2004

Waawutmo ku gurbu'ún nee aayoorós

¹ Axweesanoó waawutmo Lemueli oo sagalooa oo taa intsaahhatís nee aayiírós.

² Mu báw, garmaaeé'? Gár u baw, garmoó waqantir'eé'? Mu báw, garmaaeé' oo naa firiím dír Munguhe.

³ /Uuruuwók mu fúqtár awaar Tam hikwaawók mi haniisaar dír mukdá' waawitá gwa faak.

⁴ Aá Lemueli, i hariindaaká waawutmo iwa xufiiti, Tam geeraharuuse iwa buurár ilatleerus.

⁵ Asma kahhó' dabe mingiwa gunqareesiyé', As kahhó' kwasleemár heé slahhahhaá' makawa hhitín.

⁶ Buura haniiseek dír heé aa hhituruut Nee difaái haniiseek dír heé gurhaamuút.

⁷ Ngi wahiye' as narkuuín nguwa gunqareesiya' As kahhó' slahh'amuuín munguwa inslaslayé'.

⁸ Ala kuúng axweés daanduú afawasltá wa ale Nee mukdá' taa tawo máy na aleekala/eek.

⁹ Ar afkoge kwasleema adór ganaa' tir tlehh Harimadaá narkute nee awa múk gaa wásl alekala/eek.

Harér hhoo'

¹⁰ Heé harér hhoo' ga sláw a heemá? Inós ka afhhamít ta tlaa/aá tlaxo gawdene.

¹¹ Hareerí hhawaatuuwós gan haratlintatii' Asma slaasláwár yaariir gan sláy as inós.

¹² Hhawaatuuwós gun hhooeemáy tlehhít gu gár tlaákw i tlehhká baraá slafiingós sleémeerowo.

¹³ inós se'éngw bee/aangw nee neewór kitaáni gin leelehhtuú eér, tlaba dabaawose giri tlehhít ar muunuú /awaák.

¹⁴ Inós a adór meélír halaanu'uumár aa'aw Muruú /aymaarós ngun húp amór saáw wa ale.

¹⁵ In tleér qoomár sagw looaro Muruú /aymár múk do'ós guri tseewa qás Dasuú do'ós wa gadiyuús guri gadiyeeduuín i qoomés

¹⁶ Adór qaymo ngir sleer gan aldakút gari tláxw Qaymór sabiíbu gari dósl ar slaasláwár hameerós.

¹⁷ Siinootaywós gun tsék, gadiyeede tiri ifís. Istá kundaywós i tunuunu/ká.

¹⁸ Inós ga xú' adór gadiyeérós ir slaasláwár koón. Asltós i gwa'aká xweeraawo.

¹⁹ Neewo gan hhutlít ar dabaawós awa kilá' Tlabaawós giri tléhh ar dabaawós.

²⁰ Narkuute gan /iimís muruuwose Nee múk sla'amuút sleeme.

²¹ Múk do'ós slahheeraá tsaaqwa ki da'ayumitiiká Asma sleémeero kaa tsiitiís ar tlabaá da/aten, awa ilo'.

²² Tlabaá gu'uteerós gin tléhh Tlabaá tsitaywós ki sirda/aten, awa taa tleéhh ar kitaánír hhohho'.

²³ Hhawaatuuwós u dakuská baraá tla/ángw muko Bira amór bariisér aykú káy.

²⁴ Tlaba' gin tléhh ar kitaáni, giri weerís dír halanuuse Him'ér ta afeetleérí tsegiiti gan tléhh gari weerís dír halanuuse.

²⁵ Ilakaahara nee ilaiwa/ame an gár ki kaahi Hotaá amór alu gi haslitká.

²⁶ Axweesanoó sagalooa gun ar axwés afkose Nee hara'ayár hho' ga koón.

²⁷ Muruú do'ose sleémeero ta tlehhiiti gun tsee/aariín Muruú /ayma gu tawo /agká.

²⁸ Na/iiwós binda tlayé' qatuuwo ngin baya', «Aayí, Mungú i tsuuqi.» Hhawaatuuwós sleeme gan sluufiis gari diidi'iis.

²⁹ Iri ooi, «/Ameenár hho' iqo daadeer Ala kiíng sleémeero in alúr koón.»

³⁰ Kaloó hhoohhó' i al/agín, nee hhohhoaari a tawo Ala /ameenír kilá' a tidá' AAKOÓ MUNGÚ gu ilaiwawaa/.

³¹ Hameerós bu'utuuwo i hariín Nee gadiyeérós ka iia tleereesi umuú diiro.