AXWEESANOÓ SAGALOOA 30 - Biblía Axweesantá Hhohho' ar Mungú 2004

KITAÁBUÚ KOOÁN Axweesanoó Aguri

¹ Axweesantí ar Aguri garmoó Yake. Axweesantí gana káh dír Itieli nee Ukali

² Looeemaawo aníng a daktani, a adór heewooká Tsaahhár adór tiqár hee i káhh dir'eene.

³ Sagalooa aga intsaatsahhiiká Tam Munguú hhoohhoó' ugwa xuiiká.

⁴ Heé a gawaá doorí tsa/an niri yaamií aweér a heemá? Heé fur'a gaa gawaá tsa/oó dakós i oh a heemá? Nee oo ma'aay gaa pasltá inqwarirós ar oh a heemá? Heé bihhér yaamu gaa tleehh a heemá? Umuuwós a heemá? Umuú garmaawós a heemá? Looeemaawo u xú'.

⁵ Umuúqo /aymuú Mungú aa ooi kwaa alqaytsiít. Inós a gaamboót dír mukdá' inós gu i gogoowa.

⁶ /Aymu mu doogaar dír /aymuudá' inós aa ooi As muwa iigahhaát, kuúng tari lamusmo tleehhít.

Axweesanoó hatlá' oo sagalooa

⁷ Muruú tsár ngu dirógí firiím, Mungú, Nee muruuwí mu aníng wa /itaar dír nira gwaaiiká.

⁸ Lama nee tlooraá tawo dir'eene hingeeseek Narakw nee daqaari'iimaro mingi hanisaar Muruú /aymár har guruueé' na haniisang.

⁹ As kahhó' mawa taqna/uút nari oo', «AAKOÓ MUNGÚ a heemá?» Mawa ak narkuút nari fiisór áw Tam umuú Munguúeé' nguri tawo káh.

¹⁰ Lawaalmo mu hara'awishar dír aakoowós As kahhó' muwa lu'ús, kuúng tlakweemaadá' kiri ót.

¹¹ Qartaka i deer ar baabi'ii'ín lu'umis, Slám amuuín ngi hhooeemáy slaiaaká.

¹² Mukko i deer oo ti hhoohhooeemiís ar afer'ín Ala iringér'ín kaa hamaatliiká.

¹³ Barakarka aga aandiiká, daara/aango in tawo gáwtí gú', Ala gár ta tsatsahhan i káhh.

¹⁴ Barakarka afer'ín a adór tsabu Sihheni'ín a adór tsati'i Narkuute ngi /ayiyá' as kawa faaki baraá yaamuwo Nee mukdá' gaa wásl kuwa /ayi baraá ayko.

¹⁵ Banyegamo dasuuwós oo tsár gu kón Dasuuwí umuú daqto in /aa/amín iwa kaahiya', «Ti qeer, ti qeer.» Muruú tám i deer oo baloó hhe'eemaamisaaká Tsiyáhh ga áy muruú baloó ooaaká, «A ido!»

¹⁶ Gár wák a gi'i, ar hatlá' a guruú /ameenír kampeeri, Nee yaamaá ma'aywo baloó hhe'eesa'aaká, nee asltá baloó ooaaká, «A ido!»

¹⁷ Heé baabuúwós gu niqiím Nee heé aayiirós iialooesaro ga waaqaseseém Heé adoorí xwaa'arór baraá xatsa gu ila' tu/uún Nee kuri /aay nee gwares.

¹⁸ Muruú tám dir'eene a waa/oo/amo, tsiyáhh ga áy muruú ni tsatsahhamaaká.

¹⁹ Adór gwareesi ir hi'iimit gawaá gáwtá wa ale Adór dayshamo ir hi'iimiti gawaá daanduú tlaa/aro Adór miringamo ir gawaá daanduú ma'ár hi'iimiti Nee gár garma gu uuruxuum nee dasi tawa alhi'iimiti.

²⁰ Hotaá /ameenír fuquso'o a adoorí, in /ayiín, afkós guri fíts naagáy iri o', «Gár naa tlakweés i káhh.»

²¹ Muruú tám yaamu gi dingiis, Kár ee as muruú tsiyahhe i pa/iaaká dingitaro.

²² Lawaalmo bur kwa waawutmoó wa qaás, Daktani bar guruuwós gwa dalá/ muruú /aymaro,

²³ /Ameenír muu i slaiiká bar hhawaata gwa sleér, nee lawaalo'o bar aayór do' loo' gaa ál.

²⁴ Makaá tsiyáhh baraá yaamuwo ki ló'wa ninakw, Ala i ló'wa fuqureraá koná'.

²⁵ Maandaá maliílay a muruú /uure'eeraá kooma'aaká, Ala muruú /aymar'ín ngun amohhe'eesiyá' as qoomár age.

²⁶ Kwa/ee/ana a makaá /uure'eeraá kooma'aaká Ala hotaaín ngaa tleehhiyé' baraá mar'ór tlaa/e.

²⁷ Ingigi a muruú waawutmoó kooma'aaká Ala in hi'iimitiyá' ar slaweemo.

²⁸ /Urfi baraá dakók i ooharo a aleesleér Ala inós dír i hot a baraá maraá waawitá.

²⁹ Muruú tám i deer oo hi'iitano hhohhó', Eeít muruú tsiyáhh i deer oo hi'iitano hhohhó':

³⁰ Diraangw, makiito'ór /uuruú koom baraá makaywo. Inós i baloó bihhaá xuiiká dír umuú gaaro.

³¹ Konkomoó hi'iimiít ar daara/aangw, nee gurta, Nee waawutmoó dír geeraá mukós.

³² Barnaxés aga daktu'út tiri kilók diidi'ís nee barnaxes a tlakweemaá aldakút tleehhamooro, ti ila/ kilók ale.

³³ Ilwa birka uslumamiís in di/tá tleehhiyá' Nee duunga birka tuuaiít tseere ngin duuxiyá' Tam buhhta birka dukaakín a gila ngi huwiyá'.