AXWEESANOÓ SAGALOOA 3 - Biblía Axweesantá Hhohho' ar Mungú 2004

Gurbu'úngw masoomba

¹ Garmaaeé', intsaahhatisar'eé' ma gunqaresaar, ala hara'ayduueé' ooheek ar muunaáwók.

² Asma intsaahhatisar'eé' u slafíngw kureeraá yaariír i hanís, nee diihhooár yaariir a sleér.

³ Hhooeema nee inkihhimu mi kwahhaar. Na dahaaseek gawaá istók í ale, nee gooimeek baraá muunaáwók i alé.

⁴ An adór sla'aari nee xirif kir sleer dír Munguhe nee dír muko.

⁵ AAKOÓ MUNGÚ na haraahhifeek ar muunaáwók sleémeero, slám fuqurangók mu haraahhifaar.

⁶ Baraá lohduuwók sleémeero inós ya/ameek. Inós lohduuwók ngi qwaats.

⁷ Miti kilók xuaar tawa heé sagaloó', AAKOÓ MUNGÚ ilaiwawa/eek, tlakweema ilaguweek.

⁸ Tí slaqwahhooa ngi húp baraá slaqwtoge, iri di/i tleehhít baraá faduuwoge.

⁹ AAKOÓ MUNGÚ ilaiwawa/eek ar daqaari'iimarók, ilaiwawa/eek ar bu'úngw geera sleémeero oo baraá qaymoorók daáhh,

¹⁰ áx daqaní kuuntáywók u /umama'aándaáke balaango, hutli'i kari niiqiín difaáiro.

¹¹ Garmaaeé', kwitsaqastá AAKOÓ MUNGÚ ma waaqa'aar, nee naanaqtós ma slahh'amuú wá ara'araar.

¹² Asma AAKOÓ MUNGÚ heé i slai gun naanaaq, adoodár xwaylitamó na/aywós kudá' i slai ngur naanaqan.

¹³ Heé amohhoó' a kudá' sagalooa gaa slay, nee kudá' tsaahha gaa slay.

¹⁴ Asma sagalooa ka afhhamít ta peésaaro, slám slaasláwaarós ka yaariir ta ar sahaábuú hhohhoe.

¹⁵ Sagalooa a gár ur ta tlaa/eedá' ta baya marijani, baraá mura' sleémeero oo muu i ilatleeruusi ar adór inós i káhh.

¹⁶ Slafíngw tleér gu koón ar dákw doó /iyáy, nee ar dákw doó basayhe gár i koon a daqaari'iima nee ilaiwa/ame.

¹⁷ Lohuuwós sleémeero bira aán in sla'atamiisiyá', nee umuúqo loohiro ka saxmaár.

¹⁸ Sagalooa a adór xa'anoó slafiingw dír múk gaa /atleesi. Heé amohhoó' a kudá' nee inós taa dabe oohiye'.

¹⁹ AAKOÓ MUNGÚ yaamu gina iihhaáf ar sagalooa. Doori giri gawdeés ar fuquraangós.

²⁰ Inós iloo gina ka'amiís ar xu'utirós. Tam huunkáy sleeme i har'uú paahhamiis.

²¹ Garmaaeé', kaangwí miwa quútl baraá muunaáwoge, sagalooár ganaa' nee fuqurango ooheek.

²² Inooín i slafíngw hhiintluuwók tleehhitiyá', nee tari adór kwaslaaslír gawaá istók.

²³ Daqaní baraá lohuuwoge an hi'iimít ar yandahhooa, tam yaaeerók gár ga ta/eekw i kahh.

²⁴ Gár u de'e tsaat i káhh baraá gu'uteero. Qoomár bara qatuú eér, gu'utér tsuú' an ar gú',

²⁵ gár tlaakw bura hhaawísh ma da'ayuumitaar, tam hhituuse ni hardata.

²⁶ Asma heé ta harahhif tawa AAKOÓ MUNGÚ, Inós ya'aawók gin de'én as gár tlaakw mingiwa kalaa/iyé'.

²⁷ Gár hhoo' bar koón ma /itimaar dír heé iwa hariinda, kuúng bar aleesleér tleehhamooro.

²⁸ Inslawmoowók mu bawaar, «Waátl siiwirihe, matlo ni kí/.» Haandá' kuúng gadaádá' aqo koón siiwadár kilae.

²⁹ Heé hoót ar wayda inslaawoó do'ók wa ale, mu muruú tlákw i kaahaar.

³⁰ Nee hee ma tawo giliimara' bura gár tlaákwi tleehhika.

³¹ Malgusmo mu waatlakweesaar, tam loohír wák baraá lohuuwose ma afkwaá naatsaar.

³² AAKOÓ MUNGÚ múk tlákw gu aahh, Ala lu/aráywós i dinkwa nee múk tsaen.

³³ Lo'ór AAKOÓ MUNGÚ i daanduú maraá tlakuuse, ala doó heé ganaá' gun tsuuq.

³⁴ Looeemaawo múk waaqaqaá' inós gu waaqaqaa'. Ala múk tsaén gu gurtleemuú wá araa'ar.

³⁵ Múk sagalooár koóm ilaiwa/ame ga aal. Ala múk daktana mureekesaay gu sláy.