AXWEESANOÓ SAGALOOA 29 - Biblía Axweesantá Hhohho' ar Mungú 2004

¹ Heé ta gurbuaaín daqtá yaariire bira da/eewa gawdeés, in wa'aá wák ar qeqtín, sleeme i kotsqotiiká.

² Heé hota ganaá' bira waawuti'ín muu in qwalaa/, Ala múk tlákw bar geeraharuuse muu in /iif.

³ Heé sagalooa ga slaá' baabuúwós gun qwal/atis, Ala heé nee /ameenír sli'imuso'o hootá' a hikwaawós gin feeín.

⁴ Waawutmo sakwasleemár ganaa' birngi tlehhiit, muu in kwaa/, ala waawutmoó slukmár /aáy muu gu hhaamiis.

⁵ Heé ti sla'atamís dír inslaawmoowós i ale A hima gun baraá istós i qamín.

⁶ Heé tlaákw kun nagwaahh nee tlakweemaawós awa kilá' Ala heé hota ganaá' in daa' nee in qwalalaa/.

⁷ Heé hota ganaá' harimadaá narkuute gin haniis Ala heé tlaakw tsaahha ga konká ar muruuwí ngur xui.

⁸ Niquuse gixsa sleémeero gan tlaahhírí qás Ala heé sagaloó' gila gin har'oh.

⁹ Heé sagaloó' bar ti axweesani tlaxuná' nee heé daktani, heedaáduú daktani in daa/atúy buhhtaawo iri hhán qaseengo sleeme i xasliitiiká.

¹⁰ Múk tseerdaá múk ku'umamiís heé daba' hhohhó' ngu slaiiká, ala múk hhó' slafíngw heedaádá' gun de'én.

¹¹ Heé daktani buhhtaawós aqo gin laqaaqán Ala heé sagaloó' kós gin ilaa/ muneerós gari guu/.

¹² Geeraharusmo bar i lameemaá axamiis Alee/isuuseerós sleémeero tlakweema gin i xupú'.

¹³ Narkutmo nee baramaanusmo ti slayá' ar gár wák, AAKOÓ MUNGÚ inooín tsaraawo gina ilií tleéhh.

¹⁴ Waawutmo bar kwasleemadaá narkuute gin tlaaq ar adór ganaá' Waawuti'iimarós in kumaamít ay kureeraá kureér.

¹⁵ Naanaqaangw nee gurbu'uungw i sagalooár huwahuwiyá', ala na/oó taa ihitúy, aayiirós ga mureekees.

¹⁶ Qoomár múk tlákw bira waawuti'ín tlakweema in tlahhiyá', ala múk hota ganaá' qwanoó muu gun ar.

¹⁷ Na/aywók intsaahhatisek kuúng uri huungu/uus Muunaáwók iri qwalaa/.

¹⁸ Aaruusér naanaqaam bir káhh, muu i daanqasár konká. Ala heé amohhoó' a kudá' dabe gaa oh.

¹⁹ Lawaalmo ku gurbuainká ar afkú kaahaár Asma tam axweesani gi tsaahhi, ga iialooesiiká.

²⁰ Heé isláhh baraá axweesantose ugwa aándi? Tsiní daktani bar aga harahhíf ta inose.

²¹ Heé lawaalmoowós gwa taqna/uy iimír na/uumár wá ale Alér tlede ku aal nee lawaalmoodá'.

²² Heé xaraásl a gila gin dukún Nee heé buhhta isláhh gár yaariir ga tlakwees.

²³ Daara/aangw hee gu mureekees Ala heé ti kilós niinaweemiís ku ilaiwawaa/.

²⁴ Heé nee fisusmo al'eemá' a slafiingós guna sií', Lo'ór heé ta gaa fiís bir ngaa axaás inós i gaa ooiiká.

²⁵ Muu bur da'ayumít a dát baraá tsaxwa Ala heé AAKOÓ MUNGÚ gu harahhiíf ku amohhoó'.

²⁶ Múk yaariír tin sla'atamamis dír geeraharuuse Ala hee kun gan'amií harafaar nee AAKOÓ MUNGÚ.

²⁷ Heé tlákw ku waak nee heé hota ganaá' Ala heé tlehhmi'iiwós qoomá' ku waak nee heé tlaákw.