AXWEESANOÓ SAGALOOA 28 - Biblía Axweesantá Hhohho' ar Mungú 2004

¹ Múk tlákw tan tawo goow tam heé gi gusisiím i kahhi, Ala múk hota ganaá' ta diiqiiká adór direeri.

² Xoorór gilaaliim waawitaawós ku yaariír. Ala as heé wák oo xu'utír koóm, nee oo muruú tsaatsahhaám, yaamu nin amohhoouyá'.

³ Heé narkutmo bir narkutmoó baramaanuus, A adór tluwoó xoororomi oo ta gár wá hamareesiiká.

⁴ Mukdá' dabér siasií', múk tlákw gun xirfayeemiis, Ala kudá' dabér uhimá' nee múk tlákw tin ayá'.

⁵ Múk tlákw sakwasleemár ganaa' ga tsaahhiiká, Ala mukdá' sleémeero AAKOÓ MUNGÚ gu leelehhiít sleémeero ga tsaahh.

⁶ Tsiní narkutmoó tsaeemár hoót ta daqaarmoó tlaakwe.

⁷ Garmoó dabe ga oh i sagalooár kón Ala garmoó aa haraagwaa' dír hheehhuuse a baabuúwós gun mureekeemiis.

⁸ Heé daqaari'iimarós dogiít ar iwa múk /aytin, Gan burumbuur as heedaádá' narkuutér gurtlatláw.

⁹ Heé dabe gaa artá wa may tam firoorós sleeme ka waak.

¹⁰ Heé múk hhó' huwahuúw baraá tlehhma'aá tlakw Inósuú kilá' in /eet baraá baa'aarós tidár kilá'. Ala múk lo'o wásl hhooeema ngi aaliyá'.

¹¹ Daqaarmo ngiwa xui i sagalooár kón Ala kun mureekees nee narkutmoó muruú tsatsahhaám.

¹² Múk hota ganaá' bira waawuti'ín yaamu ni diihhe'eesiyá' Ala múk tlákw bira waawuti'ín muu in nahhamiit.

¹³ Heé tlakweemaá lu/u/uúm amohhooa ga baloó slayká. Ala kudá' tlakweemaawós gaa gwadiidin giri máy tlehhtuuwo ku gurtláy.

¹⁴ Heé amohhoó' a kudá' AAKOÓ MUNGÚ gu ilaiwawaá/ daqisleém, Ala heé muunaáwós gwa gawdees in qeqtín.

¹⁵ Geeraharusmoó tlaákw bar narkuute gaa geerahaár a adór dirángw /oroótl nee dubú giliím.

¹⁶ Geeraharusmo bar tsaahha nguwa /aaruúr a baramaanusmoó xaraásl dír muko Ala geeraharusmoó slaasláwár al/ayma ga sla'aaká ku slafiingw tleér.

¹⁷ Heé ta al'ilooúy nee tseerdaá muu masók in nahhamamiit ay gwa'ara masók kun /iisiiká nee hee.

¹⁸ Heé hoót ar tsaeema ku ba/amis Ala heé muruú tlákw gu eeharahár in huu' ar wa'aá wák.

¹⁹ Heé qaymoorós gaa doosl muruú /aymár yaariír gu sláy Ala heé muruú daktu'uumár tawo gu eeharahár narkuú bu'uút gu sláy.

²⁰ Heé inkihhimuú koóm tsuuqaá yaariir gi sláy, ala heé daqaari'iitár slaá' ar gaanslaay muxtaaro ku pa/asiiká.

²¹ Muu kuwa barqantus i qoondaaká Tam hee ila' ngiwa gaasi as gwa'amír fa/a i qoondaaká.

²² /Akusmo daqaari'iima gan mak gaanslár leeleehh, Inós ga xuiiká adór aleema ngur i hardihiyá'.

²³ Heé hhiyaawós gu iigahhmiít aluuwo hhooeema gi sláy Ta kudá' gu xirfayemisa baraá tlakweemií ale ar axweesanoó tsuú'.

²⁴ Heé muruú dooín gu fisisiím iri ooi «aga dakuusiiká», Inós a mulqumoó heé hhitusmo.

²⁵ Qahusmo gila gin dukún Ala heé AAKOÓ MUNGÚ gu harahhiíf, in daqaari'iit.

²⁶ Heé sagós gu /aáy baraá gaaro a daktani Ala heé hoót ar sagalooa ku ba/amis.

²⁷ Hee i narkuutiiká as iwa narkuutér /iimisi Ala heé narkutmo gu i qaytaaká lo'ór yaariir gu eér.

²⁸ Qoomár múk tlákw bira waawuti'ín muu in nahhamiit Ala múk tlákw bira faák múk hota ganaá' in tlaahh.