AXWEESANOÓ SAGALOOA 27 - Biblía Axweesantá Hhohho' ar Mungú 2004

¹ Matlo mir axweesaar Asma looár laarí adór ir dat a xu'uká.

² Heé hatlá' kuúng u xirfayeesi ala a kuúng kilogeeká. Heé dahaaymo ala a afkogeeká.

³ Tlaa/a ka mak iiloo', nee hhasaangw sleeme ku iló', ala daktu'uumár hee ka ak iiloo' ta muruuwí tsaraawo.

⁴ Buhhta i xaraasliyá', slaqwara i tsu/út, ala da/i in ak xarásl ta muruuwí sleémeerowo.

⁵ A tsiní heé gurbu'uungós ngwa gwa/tis, ta heé sla'aarirós gaa lu/i.

⁶ Mulqumoó inkihhím un iigahhaat, ala wakusmo tam u ma'amamiisi aqo al/ayma.

⁷ Heé aáx tam danú gu yaahamisiiká Ala dír heé qwariita tam gár qarqaar iqo tsú'.

⁸ Heé aa diya/aat do'ós wá ale A adór tsir/ír aa qwat dír do'ose.

⁹ Di/i nee mooyaangw muuná ngun qwal/atisiyá' An adór tsuaarír mulqi'iimár ló' ar baraá muunuú heé daahh.

¹⁰ Mulqumoowók nee mulqér baabuúwoge ma siaar, Amotlakwe bura sleér ma /akuutaar amór doó hhiyaawók. Tsiní inslaawmoó tseéw ta mar'afmoó saawe.

¹¹ Garmaaeé', xaa sagalooeés, as kahhó' aníng niwa qwalaa/ as kahhó' mukdá' aníng i kuúngár /ooslisliím nguwa mu/aywaats.

¹² Hee sagaloó' bar tsaxwa nga ár in nahhaat Ala heé iimiboó/ in amoodá' i hi'iit, iri dah baraá slahh'amu.

¹³ Heé dahaaymo gwa dugnoó i qaas tlawu hayoheek. Nee heé /ameenír sli'imuso'o gaa aleekalaa/ arhánírós oohang.

¹⁴ Heé inslaawmoowós gwaa taaqwees ar tseeo matlaatlér boó/ ale kun xuruut nee muu, tan ooi guna lu'usár áy.

¹⁵ /Ameenír gilaá inkikii/ a adór tluwtantá deelór tluwaay.

¹⁶ Inós bar har'ohiín kuúng a adór heé fur'ár ila/aám, Kuúng a adór heé di/i gaa baraá tsa/oó dakwí qaas.

¹⁷ Adoodá' muqsli kar muqslír hatlá' ar duuqi An adór hee sleeme heé hatlá' ngur intsaahhatisi.

¹⁸ Heé /aantsírós gaa amohhe'ees mamuuwós gi /aay. Nee heé geeraharusmoowós gu sagadiyuús ku ilaiwawaa/.

¹⁹ Adoodá' gitsee/a' tir slaya' bira baraá ma'áy xuuxú', An adór inslawoó hee tir kilós xui.

²⁰ Gi'i nee hhituru'uuma i baloó hhe'eesiaaká, tam ilaá hee sleeme i baloó hhe'eesiaaká.

²¹ Muqslidár peésa nee sahaábuwo gawdemaín kin iiar ar asla, Hee sleeme kun iiar ar xirfuuwós.

²² Heé daktani tam tuueek baraá kuneérí ale dinkwa nee angaáno, gám u baloó tu/ká.

²³ Makaywók kudá' ta de'een harmagahheek, hikwaawók amohhe'eeseek.

²⁴ Asma daqaari'iima i hotatindaaká ay kureér, tam slamaangw i kumamitiiká ay qari sleémeero.

²⁵ Gitso bar aga tsát kari amohhe'és Gitso tidár gawaá tlooma tsateek sleeme Tidár hatlá' amór alu ni harati'imit.

²⁶ Bee/aangw u tsiitiis, Aara sleeme in yaamúr tláxw.

²⁷ Ilwaá bu'uutá' i sleér, kuúng nee múk do'oge Tam sagadiyuusér do'ók sleeme iri /ayiín.