AXWEESANOÓ SAGALOOA 26 - Biblía Axweesantá Hhohho' ar Mungú 2004

¹ Adoodár tlaa/aá tluwaay ir weeqaweeqitiya' tsee/amango, nee adoodár tluwaay ir harinká qoomár fiqituuwo, tam daktani sleeme i ilaiwa/amér wa harindaaká.

² Adoodár pareeqamo nee sooriro ir tlatlaya' ar hhampe'eeri'ín, tam lo'ór gaa wasl sleeme hee gu /agká.

³ Daanduú faraási gár iwa harin a qawaay, daqwaay gaarós a taqeesamo tseega, nee daanduú daktani gár iwa qon a hhara.

⁴ Daktani ma mu/aywatsaar ar adór daktu'uumarós i diri', as kahhó' ma daktu'uutaar adór inós wa ale.

⁵ Daktani adoodá' iwa hariin tir mu/aywats, as kahhó' mitiwa kilós harafát sagalooárí ale.

⁶ Heé daktani gaa ya/aaw, a adór heé ya'aawós gaa tlaaq, nee gár guruú hhititiim gaa wah.

⁷ Adór ya'aá taqoori i dirii'iya', a adór axweesanoó sagalooa gawaá afkú daktanto.

⁸ Daktani bara ilaiwá/, kuúng a adór heé tlaa/ano gwa tseek gawaá kuukumaayi.

⁹ Heé daktani bar axweesanoó sagalooa gur axwees, a adór heé aa ooniit in laqaylamoó tu/ún gawaá dakose.

¹⁰ Xufitusmo laqaá heé daktani oo waaraáhh bura gadiyeédií sleér, kuúng a adór heé umuúqo heewo gu tlaquút ar ga/ale.

¹¹ Adoodár seeay wa/ariiwós ngir inkaaki/i, tam daktana sleeme aqo in kí/ baraá daktu'uumar'ín.

¹² Heé sagalooarós ga ar daara/aám ugwa aándi looár wake. Daktani an haragóp ta inose.

¹³ Heé tli/usmo i kaahi, «Diraangw i baraá loohi, baraá lohaá urene diraangw i deer.»

¹⁴ Adoodár afkú do' ir baanqun gawaá muqslaadá' kura tseegi, tam tli/usmo baraá qatanirose i warqaaqáy adoodár ale.

¹⁵ Tli/usmo dakós gun qaas baraá fa/a, ala /aarmo nguwa huwi baraá afa gun ar slaaqw.

¹⁶ Tli/usmo tin harafadiit tawa heé fuqurángw koóm ta múk faanqw oo alekalaa/aro ti aleeslawa.

¹⁷ Heé waaraáhh iri haratla/uú ay baraá gilaá iwa kahhi a adór heé seeoó waaraáhh gwa ia' oh.

¹⁸ Adoodár slarhhamá gufér asla ngir gilaleehhi nee maheeriiwo, iri tsu/uut,

¹⁹ an adór heé múk al/agagiím i dirii'i aluuwo iri ooi, «Ahaá aníng an tatlkuúsaáke.»

²⁰ Migír bir kaahh, asla in gwá'. Heé harauhmís bir kaahh gila sleeme i faakiyá'.

²¹ Adoodá' asla ir dogaagiin as migír nee xaawo An adór gilusmo gila ngir dukaakin.

²² Axweesanoó heé foolusmo a adór naanuú tsuú' nin /e/etín ay baraá gura'.

²³ /Ayma'aá tsuuá' awa heé inslaway tlákw a adór qambesamoó taa parootuús.

²⁴ Heé aahhír koóm aahhirós gan luu/ ar axweesanoó hhó' Ala inós kuqo inslaway tlákw baraawose.

²⁵ Heé adoorí bir amoorógí axwees ar axweesanoó hhó' mu ya/amaar, asma muunaáwós i haats aahhiro.

²⁶ Tam aahhi ka lu/i ar al/ayma Ala tlakweemaadá' iqo geehhouyá' dír geeraá muko.

²⁷ Heé bohóngw foliít as heé hatlá', inósuú kilá' gun oh, Nee heé tlaa/ár gwangwara'aám inós gu harakí/.

²⁸ Heé lamtá axweemamiís mukdá' aa lamtár slahh'eemiís gun aahh, Nee heé ilatipiím ar axweesantós muu gu qwaarees.