AXWEESANOÓ SAGALOOA 25 - Biblía Axweesantá Hhohho' ar Mungú 2004

KITAÁBUÚ TSIYÁHH Axweesanoó hatlá' oo sagalooa oo Solomon

¹ Gaarí sleeme a axweesanoó sagalooa oo Solomon, kudá' taa gooín nee múk waawutmo Hesekia, waawutmoó Yuda.

² Xirfuú Mungú a gaa lu/a, ala xirfuú waawutmo a gaa xuuxuua.

³ Adoodá' doori kir gáwtií saáw nee yaamu kir barií saáw, tam inslawoó waawutmo ku tsee/ararinká.

⁴ Hhape hingeeseek baraá muqslidár peésaaro, daqaní kareramo muqsli ngi tleehhamo hhe'ees.

⁵ Múk tlákw hingeeseek dír geeraá waawutmoowo, daqaní waawuti'iimarós i kumaamít ar gan'amu.

⁶ Miti kilók diidi'iimisaar dír waawutmoó wí alé, sleeme ma sla'aar tawa tawo sihhitanór eer baraá tla/ángw geeraharuuse.

⁷ Asma a gár hhoo' tuwa bay, «Gám qwaláng geeri waaraahhang,» ta tuwa hingeesi, turi alaá múkií huuw.

⁸ Muruú ilaawoge taa aán, mu gaanslár huwaar baraá kwasleema, Aluuwo gár ta tlehh iri qwát, qoomár inslaawmoowók bura mureekeés.

⁹ Qaa/ayhúng faakaak kuúng nee inslaawmoowók kiloohúng, ala naaqór heewók ma ooaar.

¹⁰ Heé hatlá' naaqoosíng mingiwa axaás, gaasíng umuuwók guri slasla/arés.

¹¹ Axweesantá taa oó' qoomár hariima, a adór slamángw sahaábu oo taa qaalín ar muqslír peésa.

¹² Axweesanoó gurbu'uungw oo heé sagaloó' dír heé gu axamiisa, a adór sixmoó sahaábu oo taa parootuús.

¹³ Adoodár ma'aá tsa' i dirii'iya' qoomár tsee/amángw siiree/iro, an adór ya/abusmoó inkihhím i dirii'i, dír mukdá' inós gwa ya/aawi, asma gur'er'ín gan tse'ees.

¹⁴ Adoodár huunkoó tluwoó koomaaká nee fur'a i dirii'iya', an adór heé gaa ga ala oo' aluuwo gari hanisiiká.

¹⁵ Heé qitluú baál waawutmo gu afaa/aasl, nee axweesanoó tsaén fara ga geeqáy.

¹⁶ Danú bura sleér /ayeek oo harqoomaywók, ala gura' mu dalaa/aar uri mune áy tari wa/amiín.

¹⁷ Doó inslaawmoowók mu kakawaar umuú daqto, as kahhó' miwa motsa bu'uút uri aahh.

¹⁸ Lamabu'usmoó lamtá tlaáq dír inslaawaywós, a adór guhhláy, laqaá paánga, laqaá mahángw qirqiintli.

¹⁹ Heé ta harahhifká gaaro, kuwa haratlinti' qoomár slahh'amko, a adór sihhnoó tiíq laqaá adór yaaér ta tunqalaá/.

²⁰ Heé daa'ángw daá' dír heé gurhaamuút, a adór heé tlabaá duxuúm qoomár daqtamohe, nee a adór qarengee/ír taa tsoó/ dír inkaahhay.

²¹ Wakusmoowók bir qwariit, /aymiseek, bira waxiít, wahaseek i wahi.

²² Adoorí bar aga tléhh, daqaní asla aga amoorósí ki/ís, daqaní AAKOÓ MUNGÚ kuúng u hhooeemáy tleehh.

²³ Fur'ár baskú daahh i tluwoó huwaahúp, Adoorí an adór kaantusmo gila ngir haahuwi.

²⁴ Tsiní bar aga baraá qul/ír daárír wa hót, ta tawa hota'a nee /ameenír haylór lehhiit.

²⁵ Adoodár heé aa waxiit ma'aá tsa' ngir slai, an adór ya/abtór hho' ar ayaá saáw daahh.

²⁶ Heé hota ganaá' bira ya/án tlakweema tlehhtuuwo, a adór kutltá ta kala/an nee a adór ma'aá ta /eeragaás.

²⁷ I qoondaaká danú kuwa tlahhas /aymaaro, sleeme i qoondaaká tiwa kilók diidi'iimis.

²⁸ Adoodá' doó aa koo/i huu' i dirii'i, an adór heé buhhtaawós ila/aro gi aleeslawaaká.