AXWEESANOÓ SAGALOOA 24 - Biblía Axweesantá Hhohho' ar Mungú 2004

¹ Adoodá' múk tlákw ir hooti ma waatlakwesaar, tam dinku'umár nee inooín ma sla'aar.

² Asma inslaway'ín sleémeero gár i leelehhiiti a tlehhma tlakwe, nee afer'ín gár i axwes a hhita kilós.

³ Do' kun tleehh ar sagalooa, nee kun gawdees ar tsaahha.

⁴ Múk xu'utír koóm dooín kun niiq muruú hhoe nee oo sla'atamisa.

⁵ Heé sagaloó' i aleesleemuú kón ta heé /uuruú kooma, nee heé xu'utír koóm a tin /uurií dogiit.

⁶ Asma múk taa sagalooárár geerahaár baraá slaqwaraaro i baaliná', nee gurbu'úngw yaariír muu gu tuu/.

⁷ Sagalooa ka saaw dír heé daktanto, baraá kwasleemaro afkós gu gweeriiká.

⁸ Heé muruú tlákw gu qoomaameés tlehhtuuwo, umuuwós kun bay, «Tatambusámo.»

⁹ Heé daktani gár i leelehhiiti a tlakweema, nee heé múk niqiím ku waak nee muu.

¹⁰ Bara munee sí' qoomár slahh'amko, daqadá' kuúng tu daqa tlaákw ló'wa alé.

¹¹ Múk ta tawo tsu/utár wa slai tu/eek, ma baabaqaasaar heé ta gaasár ay kuwa wangeexwat.

¹² Barnaxes a kat, «Kangwsíng mur xuú'.» Ahaá kudá' inslawaay gwa tleehh kuúng u ga/aykáhe? Ahaá kudá' hhiintluuwók gu de'eém kangwsíng gu xuiikáhe? Ahaá inós umuúqo heewo gu buiikáhe ar harqoomoó tlehhimi'iiwós?

¹³ Garmaaeé' danú /ayeek asma /aymaaro i qón, tam duwaá xaaramtá danú i tsuuiyá' bira tsáq.

¹⁴ Adoorí an adór sagalooa i diri' baraawoge, bar sagalooa aga sleér harahhifo a sleér aluuwo, tam harahhifoorók i tawo qwatká.

¹⁵ Múk hhó' mu giirór awaar adór múk tlákw i /imaamisi, do'ós mu hhitiimaar sleeme.

¹⁶ Asma heé hota ganaá' tim huui sagáwa faanqw aqo in male sihhiit, Ala múk tlákw gár tlaakw aqo gin fák.

¹⁷ Wakusmoowók bira huú' ma qwalaa/aar, tam ma gurií qaseemaar bar yaae ngaa tunqalaá/.

¹⁸ Asma AAKOÓ MUNGÚ kudá' adoosíng ga ga/áw gaasíng gu sla'atiská wakusmoowók kudá' guri máy i buhhtaawo.

¹⁹ Ma daawimitaar as múk tlákw, laqaá tlehhma'aá tlakuuse mi waatlakweesaar.

²⁰ Asma heé tlaákw gár hhoo' ar i aluúwaá slay i káhh, nee slafíngw heé tlaákw i slapiit adór tsaa'astá wa ale.

²¹ Garmaaeé', AAKOÓ MUNGÚ nee waawutmoowo ilaiwawa/eek, mukdá' amoowásl mu aleealuusaar.

²² Asma qwanay'ín gin i tapa'aat looa wak, nee hhitár inooín ni huwiya' heé ga xuú'.

Axweesanoó hatlá' oo sagalooa

²³ Axweesanaywí sleeme oo múk sagelooén, baraá kwasleemaro barqaanti i qoondaaká.

²⁴ Heedaádá' heé aa dakuus gu babáw, «Kuúng gár taa dakús i káhh,» tlahh'i sleémeero ngun lu'usiyá', xoordu nguri aahhiyá'.

²⁵ Ala mukdá' sleémeero múk tlákw gu iigahhamiit tan qwalalaa/, nee tsuuqaá hhooa' ngi slayá'.

²⁶ Heé mu/aywatstá ganaa' gaa oo' a afa gun ma'amiis.

²⁷ Gadiyeérók ar tsee/a ala hhe'eeseek tleehhamooro, qaymoorók ala hhe'eeseek dooslaro, daqaní tleehhamór do' ka aluú wá sakí/.

²⁸ Inslaawaywók mu tawo daandeemo axweesaar, tam afkoge lama ma kaahaar.

²⁹ Ma ooaar, «Tí naxooro a buú' dirósí ale, tlehhmuuwí naa aníng i tleéhh u buú'.»

³⁰ Bihhaá qaymór tli/usmo ana ar waaraáhh, bihhaá qaymór sabiíbu ar heé sagawásl ana ar óh.

³¹ Naxés «héh» laqaya' nga qaroó alti'iitiyé', te'eesamó gaa qaroó nigihhitís, nee yawtá qaymo aa tsatít sleeme.

³² Aníng nari xumiís ala ale kaangwí nguri aldaákw, alhhe'eesaywo intsaahhatisa ngari sláw.

³³ Guú' ala ale, saáq gár niinawe, dabaawók ala gawaá da/ewií ooheek, iwiwiít.

³⁴ Narakw u haradah adór fisusmó wa ale, nee aleema uri harahardihiyá' adór heé naa xooslaá slaqwarár dah.