AXWEESANOÓ SAGALOOA 23 - Biblía Axweesantá Hhohho' ar Mungú 2004

¹ Bar aga iwít dír muruú /ayma dinkwa nee waawutmo, ti harmagahh gár dír geeraawogí dirii' a milá.

² Kuúng bar heeko hheehhusmo muruú /aymaro, ti harmagahh miti kilók hari'awaar.

³ Muruú /aymaarós kudá' hhó' mu ilatleerusaar Asma a muruú /aymár al/ayma.

⁴ Bar sagalooa a koón miti gadiyeédár gaasaar as tawa daqaari'iitár sla'.

⁵ Asma tawa qaytsita daqaari'iima aa fák, Ila nee tí gár ta aan kwaáo ina tleér ar hhampe'eeri papáh gan ó', adór gwareesír gawaá doori.

⁶ Muruú /aymár qahusmo mu /ayaar, Muruú /aymaarós tam ku hhoe mu ilatleerusaar.

⁷ Asma baraá muunaáwose muruú /aymaadá' kuúng ta /ak gun fadiit, Inós i amoorók i kaahi, «/Ayimáng, wáh sleeme.» Ala baraá muunaáwose kuúng u ga/ayká.

⁸ Muruú /aymaadá' taa /ák sleémeero u wa/amiín. Na'ásarók tidá' taa aaiín sleémeero tari tawo.

⁹ Axweesantók ma ooaar baraá iaá heé daktani, asma aluuwo axweesanaywók oo sagalooa gu waaqaa'.

¹⁰ Digmuduú yaamu taa iimír aáng wa qaás mu warqeesaar, tam qamaá panaay mi haradaraahaar.

¹¹ Asma ba/amusmooín i /uuruú kón, Inooín gin aleekalaa/ diroge.

¹² Masók inslawaywók i dír intsaahhatisa, iiarók qaaseek dír axweesantá xu'uti.

¹³ Na/aywók naanaqaro mu mawaar, Asma xwaytsi gu gaská.

¹⁴ Asma bura múx xwaytsiiro, Hhintluuwós u tú/ dír gi'iiwo.

¹⁵ Garmaaeé', kuúng bar sagalooár koón, daqaní aníng a qwalalaá/.

¹⁶ Muunaáeé' iri qwalaa/, barnaxes afkoge gár ta axwes a axweesanoó hhó'.

¹⁷ Adoodá' múk tlákw ir hooti muunaáwoge ma waatlakwesaar. Ala kumiít AAKOÓ MUNGÚ kuwa ilaiwawa/ deelo sleémeero.

¹⁸ Asma alu ki ur, Nee harahhifoorók sleeme i qwatká.

¹⁹ Garmaaeé', iia qaaseek as sagalooa kawa sleer, Adoodá' tar hot ló'wa aldakweek.

²⁰ Ma deerutaar baraá tla/ángw xufutuseero. Laqaá tla/ángw hheehhuusér fu'unaay.

²¹ Asma xufutusmo nee hheehhusmoowo i narkumitiyá', nee feeo hee gu tlawuú tlaákw ar tsiitís.

²² Baabuúwók kudá' ugwa laqwaal iiárií qaaseek, tam aayiírók bira diín ma waaqaa'aar.

²³ Looeema leeleehheek, mi baloó waaqaa'aar, sagalooa leeleehheek nee intsaahhatisaro nee tsaahharo.

²⁴ Baabuú na/aywós hota ganaá' ku qwala/ úr, nee kudá' garmoó sagaloó' gwa xwayluy i qwalalaa/ as na/aydá'.

²⁵ Baabuúwók nee ayooroge qwal/atisek. Aayoodá' ugwa xwayluur i qwala/.

²⁶ Garmaaeé', muunaáwók haniisang, adoorí aníng nir hoot u qwal/atis.

²⁷ Asma /ameenír sli'imuso'o a adór bohóngw aa tser'eet, nee tsaatuso'o a adór baa'ár iiraakw ar muu ohiingw.

²⁸ Muu gun gigdiín adór fisuusér wa alé. /Ameenár adoorí hhawaataá yaariir gaa saga qwaarés.

²⁹ Múk tawo uuamamiím a gaalá? Múk gurhamuút a gaalá? Múk gilaaliím a gaalá? Múk qununu/umamiít a gaalá? Múk inkahha'aá gaa wasl gi koóm a gaalá? Múk ilaaín naa da/tuutuye' a gaalá?

³⁰ A mukdá' bihhaá xuaimaaká baraá difaáiro, an mukdá' difaáír ta sangw slaáx ga didá' wa haratsaqamiím.

³¹ Difaái ma waatlakweesaar qoomár bira da/atutuúr, tam i bo/a/eera baraá slooqáy wa ale, tam slooroorós i tawo slapslapeliinda.

³² Alhhe'eesaywo difaárí un kikíhh adór dayshamó wa alé, un kikíhh adór dayshamoó qarkú koóm wa ale.

³³ Muruú xuaawaslén ilaawoge u aán, nee afkoge kumbeera kiri dá'.

³⁴ Kuúng tari adór heé aa qaat baraá tla/ángw tlawi, tari slaqás nee heé gawaá ságw xa'anoó wa guú'.

³⁵ Tari kilók o', «Tina mak baandiís yeé hharto, sleeme aga slahhaaiiká, tina slát yeé slám gár ni xuu' i káhh, Daqamá ni daarkiit, ar hatlá' a leelehhtuú áw.»