AXWEESANOÓ SAGALOOA 22 - Biblía Axweesantá Hhohho' ar Mungú 2004

¹ Tsiní bar hhooeema iga tsawát ta daqaari'iimár yaariire, hhooeema ki hhoo' ta sahaábu nee muqslidár peesaaro.

² Daqaarmo nee narkutmo ti slayá' ar gár wák, Tleehharusmooín an AAKOÓ MUNGÚ.

³ Heé sagaloó' bar gár tlaakw ngaa ár in goow iri nahhaat. Ala heé iimiboó/ in amoodá' i hi'iit, slahh'amuudá' guri /aay.

⁴ Heé taa niinawees dír AAKOÓ MUNGÚ i alé, tlehhmuuwí dirose an daqaari'iima nee ilaiwa/ame nee an slafiingw.

⁵ Tsaaxwel nee laqayawo i dayá' baraá lohaá múk sagegawdene, Heé slafiingw gu slaá' i amór saáwár oohi.

⁶ Na/aay intsaahhatiseek hotaá ganaa'a'a, inós adoosíng ga baloó gunqaresiiká gar wa dín.

⁷ Daqaarmo i waawuti'ín daanduú narkutmoó wa alé. Nee heé muruú kirkiít a lawaalmoó hee kirkitiimís.

⁸ Heé tlakweemaá dahaasiím hhituru'uuma gan bu'ún, nee xarasleemaawós kin giqáy.

⁹ Heé gurhhoó' ku tsuuq. Asma inós nee narkutmo muruú /aymar'ín a emto.

¹⁰ Heé niqusmo tlatlahhaseek daqaní gila i hintiqisiyá', Daqaní gila nee /ooslislingo ni faakiyá'.

¹¹ Heé inslaway hhohhó' nee oo axweesanoó hhó' gu slaá', inós a mulqumoó waawutmo.

¹² AAKOÓ MUNGÚ intsaahhatisár xu'utimis gan sagesihhimiit, Ala axweesantá al/aymusmo gan amoosíng i kwaahh.

¹³ Tli/usmo in ooi, «Diraangw i deer tsee/aawo, Aníng bara ti'iít alo in oh.»

¹⁴ Axweesanoó tsaatuso'o a adór bohóngw saáw. Heé ta sií' nee AAKOÓ MUNGÚ in baraadií /eet.

¹⁵ Xuawaslér yaariir baraá inslawoó na/aywo i deer. Ala muxtár kuwa intsaahhatimisi xuawasleerí gan tlatlahhás.

¹⁶ Heé narkutmoó baramaanuús as iwa slaasláwaarós dogiiti, laqaá gan haniis dír daqaarmo, inósú kilá' sleeme aleema ngu slayá'.

KITAÁBUÚ TÁM Axweesanoó bó/ oo mibeeri tám oo sagalooa

¹⁷ Iia qaaseek as axweesanoó sagalooa kuwa axas, nee inslawaywók diirí ki/isang as axweesanoó xu'uti kuwa sleer.

¹⁸ Kuúng axweesanaywí bura ót kuúng un qwal/atis, nee bar axweesantí tsifraangók ga slaa' kaahaango.

¹⁹ Heé aníng ni intsaahhatisár wa slaa' a kuúng, heé hatlaeeká, kuúng kilók, as kahhó' AAKOÓ MUNGÚ kuwa harahhif.

²⁰ Ahaá aníng axweesanoó sagalooa oo mibeeri tám ngwa gooimiikáhe, daanduú gurbu'utá tsaeema nee kángw xu'utír wá hariima,

²¹ as kahhó' kuúng kawa xu' gár qoom nee ar ló', as kahhó' mu/aywatstá ganaa' kawa o' dír heé yaahamiisa.

²² Narkutmo mu /aytimaar as adoodá' tawa narkutmo, Tam heé gaa wásl mu hariima hayohaar dír kwasleemaaro.

²³ Asma AAKOÓ MUNGÚ inooín gi aleekalaa/, Mukdá' muruú múk hayohiím ar /uuru, AAKOÓ MUNGÚ gi slafiingw hayoh.

²⁴ Heé buhhta yaariír mu mulqi'iimár i tleehhaar tam ma alhi'iimitaara' nee heé xaraásl.

²⁵ As kahhó' tlehhmi'iiwós mi eeharaar, nee hhiintluuwók mu baraá tsaxwí dahasaar.

²⁶ Ma deeruutaar baraá tla/ángw mukdá' dugeenaá qamiima; Mukdaádá' dugeenaá qamiím daanduú múk inaá koóm wa alé.

²⁷ Qoomár gár mukdá' kur bu' bir káhh, Tam hhaftuuwók kudá' taa alqát kun ar tláy sleeme.

²⁸ Digmuduú yaamu ta qaas iimír aáng wa alé mu warqeesaar, Adoodá' xwayliteérók ngura qás ti meer.

²⁹ Heé baraá gadiyeérose fuqurángw koóm ugwa aándi? Heé adoorí i dír geeraá waawitá i sihhiit, inós u dír tla/ángw múk amoowásl i eeraaká.