AXWEESANOÓ SAGALOOA 21 - Biblía Axweesantá Hhohho' ar Mungú 2004

¹ Inslawoó waawutmo baraá dabaá AAKOÓ MUNGUHE a adór kutlá ma'aay, gun warqeemiis amór ngur slai,

² Umuú heewo ngi xui inós in ganaa'. Ala AAKOÓ MUNGÚ muner'ín gan tsee/aarín.

³ Hotaá ganaa'á' nee sakwasleemár ganaa' kawa tleehhi, Muruuwí AAKOÓ MUNGÚ gu sla'atimis ta ilahhooár muruú ta tsu/i.

⁴ Xumsír daara/aangw nee inslawoó daara/aango, a tlehhma'aá múk tlákw ngin geehhoeemisiyá'.

⁵ Heé ilakaahaár gár i inslaslay a adór ir daqaari'iiti, Ala heé bi/irusmo in meet baraá aleema.

⁶ Daqaari'iima bara sleér ar lama, a adór quuír ta ufaáhh slám a xotloompír gwa'ara.

⁷ Múk tlákw kun fitsfiits nee xarasleemaín, asma tlehhma'aá hho' ngiwa tlehhitiya' ngi slaiaaká.

⁸ Heé tlaákw loohirós aa qwát. Ala heé hhoó' ku amohhoó'.

⁹ Tsiní bara gawaá daárír wá hót. Ta tawa alhota'a nee /ameenír giluso'o baraá doó intlaáxw wa ale.

¹⁰ Muunuú heé tlaákw gár i ilatleeruusi a muruú tlákw, gár inslaawmoowós nguwa gurtlay i káhh.

¹¹ Qoomár heé niqusmo burkwa muúx kudá' iimiboó/ in sagalooees. Qoomár heé sagaloó' burkwa intsaahhatís tsaahha gan sláy.

¹² Munguúdá' gana'amuú koóm, muruú tleehharumiít baraá doó heé tlaakwe gu xuu'. Nee múk tlákw gun hhaamiis.

¹³ Heé iaawós gaa ditsií dahaas as /aa/aá narkutmo mingiwa axaás. Inósuú kilá' sleeme i baala wa /aa/, ala heé gu iiárií qaás i kaahh.

¹⁴ Heé aa buuhh bura qawti garkár i hanís in xasliit, Heé xaraásl bura slúk qawti ale in tsaúy.

¹⁵ Qoomár sakwasleemár ganaa' barka tleéhh heé hota ganaá' in qwalaa/. Ala heé tlaákw gun de'e tsaat.

¹⁶ Heé tsaahhár koomaaká, in hungu/uus baraá tla/ángw tu'u.

¹⁷ Heé iwiwit gu slaá' i narkuut, nee heé har xufta nee /ayma i daqaari'iitiiká.

¹⁸ Heé tlaákw ku daanduú heé ganaá' wá haniis, Heé haratlintao wásl i daanduú heé hhoó' wá dah.

¹⁹ Tsiní hee bira hotaá áy baraá darma, ta hotaá dinkwa nee /ameenír giluuso'o nee hayluso'ooro.

²⁰ Qaasarár afhhamít i baraá doó heé sagaloó', Ala heé daktani tós sleémeero gan afkwí kwaahh.

²¹ Heé hotaá ganaa'á' nee hhooeemaawo gi leelehhiít, slafiingw gun sláy nee gan'amu nee ilaiwa/ameero.

²² Heé sagaloó' gixsár /uuruú koom gan hayoh. Tam koo/idá' na harahhifiyé' gan yaamií slaax.

²³ Heé afkós nee tsifraangose gi il/aám, a tin kilós /iimiis baraá slahh'amko.

²⁴ Heé daara/aám nee oo a dee/aanuut kun bay, «niqusmo.» Inós a heé hoót ar daara/aangw nee dee/anuwós.

²⁵ Tli/usmo ilatleerirós gu gás. Asma dabaawós gi gadiyeédár slaiiká.

²⁶ Heé tlaákw looa gan dahaas ar ilatleeri baraá muruú múkí ale. Ala heé hota ganaá' gaa birnga haniís ga alki/iiká.

²⁷ Ilahhooár muruú ta tsu/i ar heé tlakusmo ka waak, Heé inslaway tlákw ilahhooarós kan ak slaiiká.

²⁸ Lamabu'usmoó lamusmo i qwaar, Ala heé iaá axamis gi koóm axweesantós i qwatká.

²⁹ Heé tlaákw in piihh gaaro, Ala heé hhoó' slafiingós gun aldakuut.

³⁰ Sagalooa i káhh tam tsaahha i káhh sleeme, laqaá tam gurbua i káhh sleeme ar ta tleehhi a dimbé nee tidá' AAKOÓ MUNGÚ i slai.

³¹ Faras kun amohhe'ees as slaqwara, ala baali ar AAKOÓ MUNGÚ.