AXWEESANOÓ SAGALOOA 20 - Biblía Axweesantá Hhohho' ar Mungú 2004

¹ Difaái hee gun niqár eér, xufta hee gu tsimaahhír ar eér, nee heé muruuwí gu slaá' i sagalooár konká.

² Buhhtaá waawutmo a adór /orootlór diraangw, Heedaádaá gwa buhhtis tlakweema gaa tleéhh.

³ Heé gila ga geewakay i ilaiwa/amér wa harín, Ala umuúqo heé daktanto in gilín.

⁴ Tli/usmo buhareewo doosla ga ya/anká, qoomár fiiqituuwo gan mak leelehhtuú áy ala ga slayká.

⁵ Inslawoó hee kwa luú/ adór tsal'ír ma'aay, Ala heé muruú tsatsahhaám adór ngur tsaahhi gan sláy.

⁶ Múk yaariír inkihhimuuín ngun kilooín alki/iitiyá', Ala heé inkihhím ar tsáp dír kuwa slay?

⁷ Heé hota ganaá' nee oo tsaeemár hotaatiím, Na/iiwós ki tsuuq aluuwose.

⁸ Waawutmo bira iwiít gawaá kitaangós oo sakwasleema, tlakweema sleémeero gi hariitlees ar ilaawós.

⁹ Heé /aymuuwí ooaro gu qiítl kwí káh, «Muunaáeé' ugwa hhoohhooeés. Tlakweemaaeé' sleémeero iga hheehhe'eés.»

¹⁰ Kílór ta múkár al/agin nee xooslomoó qoomeemees oo ta múkár al/agin, AAKOÓ MUNGÚ xosluuká' tsaraawo gi waak.

¹¹ Tam na/aay sleeme gár kur tsaahhi a tlehhmi'iiwós, Muruú i tlehhiiti bar ku hhó' nee oo ganaá'.

¹² Iiár axamiis nee iltá xumiis, sleémeero tsaraawo a AAKOÓ MUNGÚ gina tleéhh.

¹³ Gu'ute ma sla'aar asma u baraá narkwií dahás, Ilakaahareés, daqaní muruú /aymár yaariír u sleér.

¹⁴ Heé gár tlaxuúm in ooi, «Tí ka slasla/aar, male kii/ tí ka slasla/aar,» Aluuwo bira tláy iri ooi, «Aná heemá! Ala nga tláxwiíke ar tlaxór baraay.»

¹⁵ Sahaábu i deer nee tlaa/aá tlaxo gawden i dayá', Ala axweesanoó xu'uti kun ak afhhamít ta muruuwihe.

¹⁶ Heé dugno gwaa qaas daanduú dahaymoó wa ale tlawuuwós hayoheek, Heé dugno gwa qaas as heé xuaawásl arhánirós ooheek.

¹⁷ Muruú /aymár taa sláy ar loohír lama i tsuu' dír heewo, Aluuwo gun altlii/ baraá afko adór muruú /aymár hhasángw koóm.

¹⁸ Muu birti gurbu'ún, mura' qoomesa ga ya/án iwa tleehharuti. Slaqwara kawa eera gurbua ala slaweek.

¹⁹ Heé lamtá slaá' naaqo ga duux amór muu. Gawaá adoorihe heé lamtá slaá' geewakaweek.

²⁰ Heé baabuúwós nee aayooro gi lu'umís, slafiingós in slapiit adór tsaa'asi bira gwá' baraá giwtír ma/amiro.

²¹ Daqaari'iimár hee aa sláy ar gaanslaay, Alhhe'eesaywo i tsuuqaá koondaaká.

²² Ló' ma ooaar, «Tlakweemaaqá' na aníng i tleéhh i buú'.» AAKOÓ MUNGÚ na harahhifeek, inós kuúng u alee/iis.

²³ Qoomoó al/ayma AAKOÓ MUNGÚ gu waak, tam qoomoó ta múk ar al/agin i ganaaiiká.

²⁴ Digir wakeetíngw hotaá hee AAKOÓ MUNGÚ gun geeraharahaar, Adór hee slafiingós ngur xui.

²⁵ A dakuús hee iwa gaanslár ooi, «Gaarí a haniís dír Mungú.» Aluuwo iri aluúwaá gurbo/áy gadaádá' haniisaro.

²⁶ Waawutmoó sagaloó' tlakuuse gan hariitlees, nee gin muux ar difiitamo.

²⁷ Muunuú hee a tsaa'astá AAKOÓ MUNGÚ, Umuú gaaro ar baraá heéwí dirii' gan tsee/aarín.

²⁸ Waawutmo kun de'én nee iialooa nee inkihhimu, Kitaangós oo waawuti'iima gun hootiis ar hotaá ganaa'á'.

²⁹ Xirfuú masoomba a /uuruuín, Ala hhohh'artá bariise a al/awatani.

³⁰ Hee bur kwa muúx dee/aanu i babáy, Hhara inslawoó hee gu hheehhe'és.