AXWEESANOÓ SAGALOOA 2 - Biblía Axweesantá Hhohho' ar Mungú 2004

Slaasláwár sagalooa

¹ Garmaaeé', bar axweesante'eé' bar aga ót, nee bar hara'ayduueé' iga alhoorés,

² bar sagalooa aga iiárií qás, muuná bar ugwa hanís as tsaahha kawa sleer,

³ eeít, bar sagalooa aga firiín, nee bar xu'uti aga firiín ar tsáp,

⁴ bar muruuwí ugwa leelehhít adór peésár wa alé, kuri leelehhít adór daqaari'iimár taa luú/ wa alé,

⁵ daqaní adór AAKOÓ MUNGÚ kur ilaiwawa/ kari tsáhh, nee adór Mungú kur xu' aga sleér.

⁶ Asma AAKOÓ MUNGÚ sagalooa gan hanmiis, baraá afkose gár ti'imiit a xu'uti nee tsaahha.

⁷ Sagalooár ganaa' gaa amohhe'eés as múk daba' hhohhó', inós a gaamboót dír múk inkihhimuú kooma.

⁸ Loohír múk ganaá' gan de'én, nee mukós oo hhohhó' gun amohhe'eemiis.

⁹ Daqaní gan'amu nee sakwasleemár ganaa' kiri xú', nee daanqasa nee umuúqo gár hhooe.

¹⁰ Asma sagalooa i dát baraá muunaáwók, nee xu'uti hhiintluuwók guri sla'atís.

¹¹ Daqaní sagalooa kuúng u de'eén, nee tsaahha kuúng uri amohhe'és.

¹² Uri ba/amisiyá' baraá loohír tlaakwe, nee dír múk axweesanoó qwaareemiís gu axweemaamisa,

¹³ nee dír múk lohaá ganaa'á' gaa sii', as iwa hootiya' baraá giwtír wa ale,

¹⁴ kudá' tlakweema tlehhtuuwo ngi saqwalala/á', múk ta sla'atamisi nee tlehhma'aá tlakw awa qwaareemisá',

¹⁵ múk al/aymuuse baraá lohduuine, múk inkihhimuú koomaaká.

¹⁶ Sagalooa kuúng uri tú/ dír /ameenír sli'imuso'ooro, dír sli'imuso'ór axweesani tsuú',

¹⁷ /ameenír hhawaatuuwós oo bi/i ngwaa geexeer, nee alqadór Munguúwós gaa gunqaares.

¹⁸ Asma do'ós a loohír baraá gwa'arár kaw, lohduuwós amór naa xuiyé' a baraá gi'i.

¹⁹ Umuúqo heé aa amoorós kayi oo naa kii/ i kaahh, sleeme i wayaiaaká baraá loohír slafiingw.

²⁰ Ala kuúng ta hi'iimít baraá lohaá múk hhó' wá ale, nee lohdaá múk ganaá' ki eehát.

²¹ Asma múk gan'amuú koóm yaamu gi aal, múk inkihhimuú koóm i baraaká' wa hoot.

²² Ala múk tlákw ku kwaahh baraá yaamuwo, nee al/aymuuse ka hingees baraakae.