AXWEESANOÓ SAGALOOA 19 - Biblía Axweesantá Hhohho' ar Mungú 2004

¹ Tsiní hee bar narkutmo inós bir daanqamisúr hoot ta daktantá sagagawdúr axweesa.

² A mak gár qoomaaká hee iwa xu'utír konká nee heé gaansliím baraá gaaro tlakweema gi tleehh.

³ Hee bira hhitiruút as daktu'uumarós, Aluuwo in ooi, kaangwí oo AAKOÓ MUNGÚ,

⁴ Daqaari'iima u mulqér yaariír i húp. Ala narkutmo kungun sii' nee mulqumoowós.

⁵ Lamabu'usmoó lamusmo ku pa/asiiká muxtaaro, tam heé lamusmo gar /uyká.

⁶ Múk yaariír tin kilooín sla'atamamisiyá' dír geeraharuuse, nee umuúqo heewo ga slaa' tawa mulqumo dír heé múk /iimisa.

⁷ Narkutmo hhaeewós sleémeero ngun aahhiyá' mulqeerós kár maweek, gun ak ilaagóp, tam ngi eeharahaduú áy ar axweesanoó hhó', ala gi ariiká.

⁸ Heé sagalooár koóm a tin kilós slaa'. Heé tsaahha gar hoót diihhooa ga sláy.

⁹ Lamabu'usmoó lamusmo ku pa/asiiká muxtaaro. Nee heé lamtá axweemamiís i qwaar.

¹⁰ Hotaá diihhooa i dír daktantá wá harina'aaká, in ak qoondaaká lawaalmo geeraharusmo nguwa geerahari.

¹¹ Heé fuqurángw koóm ku tawo tseweneeká buhhtaawo. Inós tlakweemaá hee ngiwa gurtlay an xirfuuwós.

¹² Buhhtaá waawutmo a adór /orootlór diraangw, Ala hhooeemaawós a adór har'uú baraá tsaaráy.

¹³ Garmoó daktani hhitár ur ga huuw dír baabuúwose, nee gilaá hare a adór tluwtani.

¹⁴ Do' nee daqaari'iimaro a aalír hee i slay dír xwaylitérose. Ala harér sagaloo' dír hee ngiwa slay a dír AAKOÓ MUNGÚ.

¹⁵ Tli/a hee gu saaqír ar eér, nee heé tli/usmo slahh'amuú qwari gu tsaaq.

¹⁶ Heé dabe gaa oh a slafiingós gun amohhe'eemiis, ala heé axweesantá waaqaqaá' i gwaa'.

¹⁷ Heé narkutmo gwaa /iis a AAKOÓ MUNGÚ guna kirkitís. Inós ku buu' nee Mungú tlehhmuuwós kwí hhooe.

¹⁸ Na/aywók naanaqeek asma harahhifo i deer, ma ak ooaar, «Aa hhituruút.»

¹⁹ Heé buhhta yaariír kun doohhamamiis, bar ugwa mak tú/ wa'aá wake ka xú' kuúng aqo malé kí/.

²⁰ Gurbua axaaseek nee naanaqa ya/ameek, daqaní kuúng sagalooa a sleér amoosír aluuwo.

²¹ Muu muruú yaariír gun mak qoomaamees, Ala gár tleehharuut a tidá' AAKOÓ MUNGÚ aa ya/án.

²² Gár heéwá hariim a kuwa inkihhím, nee narkutmo ku hara'áy ta lamusmoowo.

²³ AAKOÓ MUNGÚ kuwa ilaiwawa/i an gár hee gu baraá slafíngw i huuw. Heé adoorí in hoot ar saxareema, gár tlaakw ar gu sláw i káhh.

²⁴ Tli/usmo dawa gun mak qaas baraá fa/a, ala baraá afkwií huwto in slaaqaat.

²⁵ Heé niqusmo slahheek daqaní heé iimiboó/ dahar gu sláy, Heé muruú tsatsahhaám naanaqeek daqaní xu'uti ga sláy.

²⁶ Heé baabuúwós gu iialooeemisaaká nee aayirós ga gusaasiím, a garmoó mureekeemiís nee oo lo'o ngaa dahaas.

²⁷ Garmaaeé', a tsiní intsaahhatisa bara meér axamiisuuwo, barqo gaa a xú' an sí' eeharto.

²⁸ Lamabu'usmoó amoowásl tlehhmuú ganaá' gun niqín, afér múk tlákw tlakweema gin tawo waawa'amít.

²⁹ Sakwasleema kaa amohhe'eés as heé niqusmo, nee qawaay kwaa amohhe'eés as muxtár daktana.