AXWEESANOÓ SAGALOOA 18 - Biblía Axweesantá Hhohho' ar Mungú 2004

¹ Heé dír múk sla'aaká gár i slai a tós kilós, Bar ku gurbu'úngw hhó' í kah in slaaqw.

² Heé daktani gaa tsaahharo ga slaiiká, gár i slai a tós gan kah.

³ Heé tlaákw birna hardáh waqa'ama nin hardihiyá' sleeme, Murekeesay nin dah nee tli/imisuuwo.

⁴ Axweesanoó afkú hee a adór iltá ma'aay, a adór tsiqaá sagalooa nee kutltá ma'aay niwa ti'imitiya'.

⁵ Heé tlakweemaá tlehhiít kuwa ilamurut i qoondaaká, tam hariímár heé ganaá' kawa /itiin i qoondaaká.

⁶ Axweesanoó daktani i gilaá huwahuuw, daqtá yaariire gila gin igu'umiis ar axweesantós.

⁷ Heé daktani gár gu qwaarees a afkós, nee tsifraangós an xotloompír inós gu oh,

⁸ Kaantusmo i afa hhohhoaa'áy adór muruú /aymár tsuú', Axweesantós sleémeero in dát baraá muuná.

⁹ Heé tli/usmo baraá gadiyeede, a daa'awmoó heé hhitusmo.

¹⁰ Umuú AAKOÓ MUNGÚ a koo/ír gawit, Heé hota ganaá' gun i goow, kuri saxamaár,

¹¹ Daqaarmo ngiwa xui daqaari'iimarós a gixsár /uuruú koom, A adór koo/ir ló'wa gáwtí tleer, gár dah i káhh.

¹² Dír heé ira hhiturutiiká in ala geerií daara/uut, dír hee kura ilaiwawa/iiká tin ala niinawees.

¹³ Hee axweesantá aa axaasiiká bar ngi tlaxún, heé adoorí a daktani slám a mure dirose.

¹⁴ Qeeruú hee tiqtír slaqwtós ga saqiitl, Ala qeeruú aa slahhaa' heé gu saqiítl.

¹⁵ Heé fuqurángw koóm xu'uti ga sláy, nee iaá heé sagaloó' kángw xu'uti ngu slaiyá'.

¹⁶ Heé taa aleesleemuú i haniís kwaa loohirí tleéhh. Iri dah ay dír geeraá múk urén.

¹⁷ Heé ti aleekala/aám hargeeraawo kwaáo' axweesantós ar ló', Ay dír heé kangós gu xuú' burngwa yaahamiís, un sangw tsáhh.

¹⁸ Tsawdo múk ti tlaampa'amiís gu har'ót, kwasleemár waawituú ti tlampa'aamiís gan tsát.

¹⁹ Hhiyoó taa buhhtís ku gawít haraki/isaro ta koo/ír gawit ar gixsaro, Ala gila a adór muqslír taa afkú dó' ar tsegaagiti.

²⁰ Hee kun aaxiis nee axweesanaywós, iri bu'uut mamaá axweesantose.

²¹ Gwa'ara nee slafiingw baraá tsifraango i dayá', Múk kangós slaá' ngu slayá' oo bu'uút.

²² Heé hare gaa slay gár hhoo' gaa sláy, Heewí kwa gurií baá/ nee AAKOÓ MUNGÚ.

²³ Narkutmo gaarós a firo. Ala daqaarmo hee gun mu/aywaats ar xarasleema.

²⁴ Mukko tin ilaqaamiis tawa mulqe, ala mulqumoó ló' i deer tam daa'awmoowós gun alúr kón.