AXWEESANOÓ SAGALOOA 17 - Biblía Axweesantá Hhohho' ar Mungú 2004

¹ Fa/ár ta /eetlo /ayi dinkwa nee wayda an gár hhoo', ta doó muruú /aymár yaariír kuwa qaasi dinkwa nee gila.

² Lawaalmoó sagaloó' ku uráy haniis daanduú barismoó barawásl wa ale. Kuri aalírí haniís adór na/oó wák oo do'odá'.

³ Sahaábuú gawít laqaá muqslidár peésa ar gawit aqo kan iiar ar asla. Ala munér muu AAKOÓ MUNGÚ gan iiara'ar.

⁴ Heé tlaákw iaawós gin siihh dír axweesanoó múk tlákw. Nee lamusmo iaawós gin siihh dír axweesanoó hhititiím.

⁵ Heé narkutmoó niqiím a Tleehharusmoowós gun /oosliislín. Tam heé slahh'amuú múk wa qaseseém, inós ku mayká muxtaaro.

⁶ Nángw naangw a slamángw bariise ir durbibiin, nee gár na/ii nir durbibina' a xwayliitér'ín.

⁷ Baraá afér daktanaaro axweesanoó ganaá' i harinká, áx alók a adoomá axweesanoó lama baraá afér geeraharuuseero.

⁸ Slukuma a adór hirísi dír heé ga duxaxima, umuúqo amór i kaya gadaádá' i slai gan sláy.

⁹ Heé tlakweema gaa gurtlay in sla'aarír leelehhiit, Ala heé tlakweemaá inslasláw in ilaá gaamiis.

¹⁰ Dír heé muruú tsatsahhama iigahhaata i gunqarutká, ta muxta tsiiru ar heé daktani i slaya.

¹¹ Heé tlaákw gár i leelehhiiti a dee/anu kilós, Ala ya/abusmoó xaraásl kun amoorós i ya/aaw.

¹² Tsiní bár hee nee duúbuú /ameeni oo ta na/ii hayóh ta doogiyé', ta tiwa doogiia nee daktani baraá daktu'uumár i alé.

¹³ Heé tlehhmuú hhoó' gu bu'uúm ar tlakweema, Tlakweema dír do'ose i bihhaá xuiaaká.

¹⁴ Gila adór kir iimu/aa/in a adór dír niina ar ma'aay nira kotsoqotiyé', Gimsé', xasliité' dír gila nira uui'iiká.

¹⁵ Heé tlakweema gaa hhooeema tleehh, nee heé hhooeema gaa tlakweema tleehh. Mukwí tsaraawo ti sláy, AAKOÓ MUNGÚ gi waak.

¹⁶ Gár heé daktani is sagalooár tlaxwtá wa slai, barqo inós i fuqurángw konká.

¹⁷ Mulqumoó ló' deelo sleémeero i sla'aarír kón, tam hhiya' kunguna laqwaál as uwa tu/i baraá slahh'amko.

¹⁸ Heé arhaánír qamiím daanduú heé wa alé i fuqurángw konká, tam kudá' aa sihhiit daanduú heé wa alé.

¹⁹ Heé gilaá slaá' a tlakweema gin slaa', nee heé ti kilós ureemiís a hhiturutarós gan leelehhiit.

²⁰ Heé sagagawít hhooeema gi slayká, nee heé afaa tlí/tár axweemamiís i qeqtín.

²¹ Garmoó daktani baabuúwós gu gurhamiír ar gaas, nee baabuú daktani gaa laqwaal qaseengós i kaahh.

²² Muunuú qwalalaá/ a maasoó lawiím, Ala slaqwa in naasút bar muuná i gurhaamuut.

²³ Heé tlaákw slukuma gan oh ar naaqo, as kahhó' tlehhmuú ganaá' oo hee kuwa warqeesi.

²⁴ Heé tsaahhár koóm guruuwós amór ngwa xu'ús a amór sagalooa. Ala heé daktani sagós gár i slai a kángw yaamu.

²⁵ Garmoó daktani baabuúwós gu gurhaamír ar gaas. A adór inkaahhoó intsauú koóm dír aayoodá' gwa xwayluuri.

²⁶ Heé aa dakuusiiká kuwa doohhisi i qoondaaká, Tam geeraharusmo kuwa kuwa mux as kuwa tsá' a dakuús.

²⁷ Heé afkós ila/aro gwa aleeslay i xu'utír kón, Heé tsá' i tsaahhár kón.

²⁸ Hee tam daktanto bira dirós i xasliít kun harafaar tawa heé sagaloó'. Bar afkós ngwa mutsutsuú' tari ooi, «Heewí i fuqurángw kón.»