AXWEESANOÓ SAGALOOA 16 - Biblía Axweesantá Hhohho' ar Mungú 2004

¹ Alhotaariro hee gár i ooi gan ala baraá guruuwós i qoomees, Ala /aymuú qoóm a amór AAKOÓ MUNGÚ gan daahh.

² Hee ngiwa xui tlehhmi'iiwós sleémeero i ganaaiyá', Ala AAKOÓ MUNGÚ munér muu gan xuuxu'ún.

³ Gadiyeérók sleémeero dabaá AAKOÓ MUNGÚ ti sayiin, Daqaní muruuwók kudá' sleémeero taa qoomaamés i tleehharuut.

⁴ AAKOÓ MUNGÚ umuúqo gaaro gana tleéhh ar sla'aarirós, Tam múk tlákw sleeme in deer as deelór slahh'amu.

⁵ Umuúqo heé daara/ama ku waak nee AAKOÓ MUNGÚ, Heé adoorí sakwasleemaro i pa/iiká.

⁶ Tlakweemaá hee kin gurtláy as iialooa nee inkihhimu, tam heé AAKOÓ MUNGÚ gu ilaiwawaá/ tlakweema gin geewakáy.

⁷ Hotaá hee bar AAKOÓ MUNGÚ ngwa sla'atisiyé', tam nee wakuuseerós tiri slaiyá'.

⁸ Tsiní daqaari'iimár niina dinkwa nee hotaá ganaa'á' Ta slaasláwár yaariir ar lo'odaá koom.

⁹ Hee muruuwós gun qoomees, Ala AAKOÓ MUNGÚ digir wakeetiingós gun boo/ees.

¹⁰ Waawutmo kwasleema gan tsaat ar geeraharu'uumár AAKOÓ MUNGÚ, nee kwasleema binga tsaát aa dakuusiiká.

¹¹ AAKOÓ MUNGÚ qoomoó múk al/agimaaká gu slaa', Tam tlaa/eedá' tar qoomeemeesi a kós sleeme.

¹² Ka waak waawutmo tlakweema ngiwa tleehhi, Asma waawuti'iima in kumaamít as tlehhma'aá ganaa'á'.

¹³ Waawitá múk axweesanay'ín ganaá' gu slaa', Inooín mukdá' axweesanoó qoóm gu axweés ku slaa'.

¹⁴ Buhhtaá waawutmo a adór heé gwa'ara naa ya/áp. Ala heé sagalooár koóm gin har'oh.

¹⁵ Waawutmo bir qwalalaa/ slafiingw i deer hhooeemaawós a adór huunkír buhaare.

¹⁶ A gár hhoo' sagalooa kawa sleer ta sahaábuwo, sleeme a gár hhoo' tsaahha kawa sleer ta muqslidár peésaaro.

¹⁷ Gár slahhaa' dír heé hhooe a tlakweema gin geewakáy, nee heé hotaawós gaa harmagaahh a slafiingw gun amohhe'eemiis.

¹⁸ Heé hhitiruút in ala daaraa/uut, nee dee/aanu in giirín dír hee ira huuiiká.

¹⁹ Tsiní tsaeema dinkwa nee narakw, ta marando kawa qasmisa' nee heé daara/aám.

²⁰ Heé axweesantá alqaytsimiít hhooeema gi sláy, Heé amohhoó' a kudá' AAKOÓ MUNGÚ gu harahhiíf.

²¹ Heé sagaloó' kun bay heé daharuú koóm, nee axweesanoó sla'atamís muu gu afaa/aslín.

²² Sagalooa a adór kutltá slafiingw dír heé ga kooma, Ala daktu'uuma an hhartá ta daktanár muxi.

²³ Heé sagalooár koóm sagalooa gun tú/ iwa axweesi ar adór qoom, axweesanaywós i múk afaa/aslín.

²⁴ Axweesanoó qoóm a adór xaaramtá danú, I tsuu' baraá muunahe tam slaqwa sleeme iri hhooeér.

²⁵ Loohirka bar hee ngi ga/áy kwaáo' i qoón, Ala laatí aluuwo a loohír gwa'ara.

²⁶ Heé /aymár slaá' gadiyeé gan tleehh as inós, asma guruuwós gun harakeemiis baraá gadiyeédí ale.

²⁷ Heé tlaákw aqo tlakweema gin qoomeemees, Axweesantós sleeme a adór asltá xaraasl.

²⁸ Heé saga gawít a tlaahhi gan qamín umuúqo diiro, nee foolusmo partlito gan huuw dír mulqeero.

²⁹ Heé xaraásl inslaawmoowós gun afaa /aasl ar lama, guri geerahaar amór loohír qoomaaká.

³⁰ Heé kutliím ar iltós tlehhma'aá tlakw gin qoomeemees, nee heé afaa kaahaár gár tlaakw ngi huuw.

³¹ Al/awtani a slamángw xirif, barnaxes hee gana sláy ar hotaá ganaa'á'.

³² Heé buhhtaawo inslaahheeká ku hhoó' ta migusmoowo, Heé kilós ti aleesláw ilaa/aro ku hhoó' ta heé gixsa ngaa hayoohi.

³³ Muu tsawdo gan tleehh. Ala heé ta tsawaari a AAKOÓ MUNGÚ gun sláy.