AXWEESANOÓ SAGALOOA 15 - Biblía Axweesantá Hhohho' ar Mungú 2004

¹ Heé aa buuhh burkwa mu/aywaáts ar tsaeema buuhhtaawós gin máy, Ala afaatli/a i buhhtaá dogít.

² Heé sagaloó' afkose gár i axweesi a muruú i xui, Ala afér daktana aqo daktu'uuma gan kát.

³ Ilaá AAKOÓ MUNGÚ umuú diiro i xumiisiyá', Heé tlaákw nee heé hhooe ngu ga/ayá'.

⁴ Axweesanoó hhó' a adór xa'aanoó slafiingw, Ala afaatli/a i múk hhititiín.

⁵ Na/oó daktani gurbu'utá baabuúwós gan waaqaqaa', Ala na/oó gurbu'ungwdá' gu aldakuút i daharuú kón.

⁶ Maraá múk hota ganaa'á' muruú yaariír oo hhó' i deer, Ala slaasláwár múk tlákw gin slahh'amuú yaariír ar eér.

⁷ Afér múk sagelooén xu'uti gan alki/ít, Inslawoó daktana adoorí ga i diri'iiká.

⁸ Ilahhooár muruú ta tsu/i ar heé tlaákw AAKOÓ MUNGÚ ga waak, Ala firór heé hhoó' gun qwal/atimís.

⁹ Lohdaá tlakw AAKOÓ MUNGÚ gi waak, Ala heedá' hotaá ganaa'á' gi i qwatliít gun slaa'.

¹⁰ Fahharusmo muxtár gurtleemu wasl gu sleér, nee heé naanaqa ga sla'aaká i gwaa'.

¹¹ AAKOÓ MUNGÚ gi'i nee hhituru'uumaro gi ga/áy, Áx alók inslawoó baraá munér muu gun ak xuiikáhe.

¹² Heé múk waaqaqaá' kuwa naanaqi ga slaiiká, sleeme i daqayká amór heé sagalooe.

¹³ Muuná bira qwalaá/ gitse/aá hee in hhoohhoouyá' sleeme, Ala slahh'amu i muunuú hhitiitín.

¹⁴ Inslawoó heé muruú tsatsahhaám, a xu'uti gan leelehhiit, Ala afér múk daktana gár i sla' aqo daktu'uuma.

¹⁵ Dír heé ta baramaanuusi baalár hhoo' i káhh, Ala heé qwalalaá/ a adór heé muruú /aymár hhó' gwaa slay.

¹⁶ Daqaari'iimár niina dinkwa nee AAKOÓ MUNGÚ bur ilaiwaawá/, an gár hhoo' ta daqaari'iimár yaariire dinkwa nee slahh'amu.

¹⁷ A tsiní múk ti slaá' oo fa/ar'ín /aáy ar naanuú bó/, ta múk taa wakawaki oo /ayiím ar fu'unaá awú wahhaár.

¹⁸ Heé buhhabuúhh i gilaá dukún Ala heé buhhataawo inslaahheeká slaqwara ga har'oh.

¹⁹ Tli/usmo loohirós laqaya' ngi al ti'iitiyá', Ala loohír heé hhoó' ka iintlaaxw.

²⁰ Garmoó sagaloó' baabuúwós gu qwal/atis, Ala daktani aayoorós gan kaángwí sí'.

²¹ Dír heé sagawasle daktu'uuma a qwala/, Ala heé tsaahhár koóm hotaawós gi qoomees.

²² Múk ti axweesani axamiisaaká gár ta tleehhi i káhh. Ala as gurbu'uusér yaariire gaa tleehhamooro ka asláy.

²³ Hee bar /aymuú qoóm gwaa oó' afkose i qwal/atimis, nee /aymuú sla'amuút bar kunga oó' qoomár iwa harina i tsuu'.

²⁴ Loohír heé sagaloó' amór slafiingw gana xú', as kahhó' miwa baraá gi'ií dáh.

²⁵ Doó heé daara/aám ku yaamií slaax nee AAKOÓ MUNGÚ, Ala digmuú /ameenír kwaalo'o gun xún.

²⁶ Inslawoó múk tlákw AAKOÓ MUNGÚ gu waak, Ala axweesanoó hhó' gu sla'atamis.

²⁷ Heé slaasláwár ilatleeruús ar loohír gana'aaká, múk do'ós gu baambeeúy, Ala heé slukuma ga sla'aaká i hoot.

²⁸ Inslawoó heé hota ganaá' /aymu nguwa ooi gun ala aldaakw, Ala afér múk tlákw axweesanoó tlákw gun tawo wa/amiín.

²⁹ AAKOÓ MUNGÚ ku saáw dír heé tlaakwe, Ala firór heé hota ganaá' gan axamiis.

³⁰ Heé gurtleemuú koóm i qwal/atamis, Ya/abtór hho' slaqwa gan kwa/ás.

³¹ Heé naanaqtá hho' ga axamiís in hoot baraá tla/ángw múk sagelooén wa alé,

³² Heé gurbu'utá waaqaqaá' tin kilós waaqaqaa', Ala heé gurbu'úngw axamiís tsaahha ga sláy.

³³ AAKOÓ MUNGÚ bur ilaiwaawá/ a sagalooa kan intsaahhatamis, nee heé ti kilós niinawemiís ilaiwa/ame ga aluú wa sláy.