AXWEESANOÓ SAGALOOA 14 - Biblía Axweesantá Hhohho' ar Mungú 2004

¹ /Ameenír sagaloo' do'ós gu tléhh, Ala ar daktani gun fé/ ar dabaawós awa kilá'.

² Heé gan'amúr hoót i AAKOÓ MUNGÚ ilaiwawaa/, Ala heé aa parangaa/ i Mungú waaqaqaa'.

³ Heé daktani kun muux as axweesantós, Ala heé sagaloó' kun de'én nee axweesantós.

⁴ Doó awér doosla iwa kahh, kuuntoó dooín ku kaaharen, Ala balángw yaariír ku sláy ar /uuruú awér doosla.

⁵ Lamabu'usmoó inkihhimuú koóm lama ga tsatiiká. Ala heé lamusmo gaa a lama gan tawo tlinqimiis.

⁶ Heé waaqaqaá' sagalooa gan leelehhiit dír ngiwa slayká, Ala dír heé daharuú kooma tsaahha ka inslaahh.

⁷ Dír heé daktani geexaweegáy, Asma dirose /aymuú hhoó' u axaská.

⁸ Sagalooár heé daharuú koóm a hotaawós gin aldakuut, Ala heé daktani daktu'uumarós gun al/agiín.

⁹ Dír heé tlaakwe dakuús a hhaslorooká, Ala heé hhoó' ku gurií baa/ nee Mungú.

¹⁰ Hee slahh'amuú baraawós gun xuu' inós kilós, tam qwal/uú baraawós i dirií' heé hatlá' gu enká.

¹¹ Heé tlaákw do'ós i qwaar, Ala doó heé hota ganaá' i hotaatín.

¹² Loohirka hee birngi ga/áy kwaáo' i qoón, Ala laatí aluuwo a loohír gwa'ara.

¹³ Tam a qaseseenda gurhaami iqo deer, nee qwala/ gár ngu alu har a /aa/e.

¹⁴ Heé sagagawít bu'utuuwós gu sláy, tam heé hhoó' sleeme mamaá hhooarós gi /aay.

¹⁵ Heé iimibó/ umuú gaaro gan haratlintaatii' Xuaa wasle i /o/ooda /aa/ák. Ala heé daharusmo daanqamis gun ar hoot.

¹⁶ Heé sagaloó' tlakweema gi da'ayumiit nee giri kwirihhiit, Ala heé daktani i paslaahh nee i fadaaq.

¹⁷ Heé tawo xwar'amiít buhhtaawo a daktani, Ala heé fuqurángw koóm i qiqtlín.

¹⁸ Heé iimiboó/ daktu'uuma gan aal, Ala múk daharuú koóm tsaahha ga sláy.

¹⁹ Múk tlákw i tumbarara'aat dír múk hhó' i alé, nee kudá' tlakweemaá tlehhaahhitá' i tumbarara'atiyá' dír afér maraá múk gan'amúr hoót.

²⁰ Narkutmo ku slaiiká tam nee inslaawaywós, Ala daqaarmo ku mulqe yaariír.

²¹ Heé inslaawmoowós gu waaqaqaá' i tlakweemaá tlehhiit, Ala heé narkutmo gu gurtlatláw ku amohhoó'.

²² Áx mukdá' tlakweemaá eeharahár taqo dakuusikáhe, Ala mukdá' hhooeemaá eeharahár gár ta laqan a sla'aari nee inkihhimuuín.

²³ Baraá umuúqo gadiyeede slaasláw i deer, Ala axweesanoó tawo gár ni huwi i káhh.

²⁴ Slamángw heé sagaloó' a daqaari'iimarós, Ala slamángw daktani a daktu'uumarós.

²⁵ Lamabu'usmoó looeemaá káh slafíngw muu gu tuu/, Ala lamusmo in múk geewaqaqatín.

²⁶ Heé AAKOÓ MUNGÚ gu ilaiwawaá/ harahhifór /uuruú koom gaa sláy, Tam na/iiwós sleeme dír ni guwiya' ngi slayá'.

²⁷ Heé AAKOÓ MUNGÚ gu ilaiwawaá/ a adór tsinqár slafiingw, Heé adoorí /akwseeyír gwa'ara gu otká.

²⁸ Waawutmo gár ir daara/an a mukós bar ku yaariír, Ala bar muu i kaahh waawuti'iimarós i káhh sleeme.

²⁹ Heé buhhtaawo inslaahheeká tsaahhár yaariir ga kón, Ala heé buhhta inslaáhh daktu'uuma ga iiatleemiis.

³⁰ Muuná burku amohhoó' slaqwa i mét, ala ilatleerír tlakw fadu gin tsutsu'ús.

³¹ Heé narkutmoó baramaanuús a Tleehharusmoowós gun /oosliislín, Ala heé gwaa sa hhooay a tleehharusmoowós gun ilamurumiit.

³² Múk tlákw kun qwaarees ar tlehhmi'ii'ín kudá' tlakw. Ala heé hota ganaá' dír amohhoo' ga kón baraá gwa'ararose.

³³ Sagalooa i baraá inslawoó heé tsaahhár koóm, Ala baraá inslawoó daktanto i káhh.

³⁴ Xoorór hota ganaa' in iiatleeruúr, Ala tlakweema a qwanaay dír umuúqo heewo.

³⁵ lawaalmoó sagalooárár hoót waawutmo gu gurií baa/, Ala xarasleemaawós in gawaá heé mure wásl.